ప్రియమైన ఆంధ్రప్రవాసి పాఠక భక్తులారా,
సాక్షాత్తు వ్యాస భగవానుని కృపా ప్రసాదంతో, గీతామాత ఆరాధనకు మనకు లభించిన ఈ పవిత్ర అవకాశాన్ని మీతో పంచుకోవడం ఆనందకరమైన కర్తవ్యంగా భావిస్తున్నాం..
సాక్షాత్తు భగవంతుని వ్యక్తస్వరూపము, మూర్తి స్వరూపమైన శ్రీమద్భగవద్గీత మానవాళికి అందిన రోజు గీతా జయంతి రోజు. డిసెంబర్ ఒకటవ తేదీకి గీతా జయంతి వస్తుంది. ఈ గీతా జయంతి సందర్భంగా, పూజ్య శ్రీ గురుదేవుల ఆశీస్సులతో శ్రీమద్భగవద్గీత అష్టోత్తర శతనామావళిలోని ఈరోజు 43వ రోజు నామాన్ని మీ ముందుకు తీసుకొస్తున్నాము.
ప్రతి నామం వెనుక ఉన్న అర్థం, ఆధ్యాత్మికత, భక్తి సారాన్ని తెలుసుకొని మనం గీతామాతను మరింతగా ఆరాధించుకుందాం. ఈ పవిత్ర ప్రయత్నంలో భాగంగా, ఆంధ్రప్రవాసి Devotional విభాగంలో ప్రతి రోజు ఒక నామాన్ని మీకు అందజేస్తూ, మన గీతామాత కరుణకు అంజలి ఘటిస్తున్నాము.
ఓం వ్యాసదేవాయ నమః
పూజ్యశ్రీ భవఘ్నీ గురుదేవుల వారి అనుగ్రహం తో
శ్రీమద్భగవద్గీత అష్టోత్తర శతనామావళి
44. ఓం సర్వ కామఫల ప్రదాయై నమః
అర్థం: కామం అంటే కోరిక. కామ ఫలాలు అంటే మనం కోరుకునే ఫలితాలు. సంపద కోసం, అధికారం కోసం, ఉద్యోగం కోసం, పుత్రుల కోసం - ఇట్లా తమ కోర్కెలు నెరవేరటానికై, స్వభావానుగుణంగా, భక్తి శ్రద్ధలతో వివిధ దేవతారూపాలను ఆరాధిస్తుంటారు. ఇది సకామ భక్తి.
సకామ భక్తులకు ఆ భక్తి శ్రద్ధలను ఇచ్చినదీ నేనే, ఆయా దేవతల ద్వారా వారి కోర్కెలను నెరవేర్చేది నేనే అని శ్రీమద్భగవద్గీతలో పరమాత్మ అంటున్నారు. వారు పొందే సుఖసంతోషాలు ఏవైనా అవి తాత్కాలికాలే అని చెపుతున్నారు. ఎందువలన అంటే కోరికలకు అంతు లేదు. అవి సముద్రంలో అలల వంటివి. ఒక దాని వెంట మరొకటి వస్తూనే ఉంటాయి. సుఖభోగాలు ఎన్ని అనుభవించినా తృప్తి ఉండదు. ఇంకా ఏదో వెలితి ఉంటూనే ఉంటుంది. అది తీరని దాహం. కాబట్టి లౌకికమైన కోర్కెల వలన లభించే సుఖాలు నిత్యమైనవి కావు. నిండైనవి కావు. మరి నిత్యమైన, పరిపూర్ణమైన సుఖ సంతోషాలు పొందాలంటే నిత్యుడైన పరిపూర్ణుడైన పరమాత్మ ద్వారానే సాధ్యం.
ధర్మావిరుద్ధో భూతేషు కామో-స్మి । 7.11
అర్థం: ప్రాణులలో ధర్మవిరుద్ధం కాని కోర్కెను నేనే అంటున్నారు పరమాత్మ. నీకు హితకరమైన కోరికలు, ధర్మబద్ధమైన కోరికలు ఫలప్రదం అవుతాయి అని చెపుతున్నారు. నన్ను ఆశ్రయించిన భక్తులు వారు కోరుతున్న ఫలాలు పొందటమే కాక చివరకి నన్నే పొందగలరు అంటున్నారు.
మానవుడు సాధించవలసిన పురుషార్థాలు నాలుగు. ధర్మార్థ కామ మోక్షాలు. వీటిలో ధర్మం మొదటిది. కనుక ఏ పురుషార్థం సాధించాలన్నా ముందుగా అది ధర్మబద్ధమా కాదా అనేది నిశ్చయించుకోవాలి. గీతలో పరమాత్మ బోధ ప్రకారం జీవితం తీర్చిదిద్దుకొనేటప్పుడు ధర్మబద్ధమైన మన కోర్కెలు అప్రయత్నంగానే ఫలిస్తాయి. నాకు హితకరమైన మహా ఫలాలను ప్రసాదిస్తున్న గీతామాతకు నిండు మనస్సుతో నమస్కృతి సమర్పిస్తున్నాను.
ఈక్రింది telegram channel లింకు ద్వారా మనం పూజ్య శ్రీ భవఘ్ని గురుదేవుల వారి సత్సంగాలు శ్రవణం చేయవచ్చు
లింకు లో జాయిన్ అవండి
ఇంతటి మహత్తరమైన అవకాశాన్ని మనకందించిన గురుదేవుల వారికి అమ్మకు కృతజ్ఞతలు తెలియజేస్తూ
జై గురుదేవ్
నామం 41 : Bhagavad Gita: జననం మరణం అనివార్యం.. ఇది తెలిసినవాడు శోకించడు... కర్మ, భక్తి, జ్ఞాన యోగాల మార్గదర్శిని గీతా -41!
నామం 40 : Bhagavad Gita: అహం బ్రహ్మాస్మి.. మనిషి నుంచి పరమాత్మ వైపు ఆత్మయాత్ర.. కర్మ, భక్తి, జ్ఞాన యోగాల మార్గదర్శిని గీతా - 40!
నామం 36 : Bhagavad Gita :సుఖం ఉన్నంత మాత్రాన శాంతి ఉండదు.. కర్మ, భక్తి, జ్ఞాన యోగాల మార్గదర్శిని గీతా -36!
నామం 29 : Bhagavad Gita: భయంలేని జీవితం దైవసంపదతోనే సాధ్యం.. కర్మ, భక్తి, జ్ఞాన యోగాల మార్గదర్శిని గీతా -29!
నామం 28 : Bhagavad Gita: మోక్షానికి మూలం ధ్యానం, ధ్యానానికి మూలం దివ్యశక్తి.. కర్మ, భక్తి, జ్ఞాన యోగాల మార్గదర్శిని గీతా -28!
నామం 26 : Bhagavad Gita: జన్మ మరణాలను జయించేది సమస్థితి అదే మోక్షమార్గం.. కర్మ, భక్తి, జ్ఞాన యోగాల మార్గదర్శిని గీతా -26!
నామం 24 : జీవాత్మ నుండి పరమాత్మ వరకు గీతా ప్రబోధం.. కర్మ, భక్తి, జ్ఞాన యోగాల మార్గదర్శిని గీతా -24!
నామం 16 : Bhagavad Gita: నశించేది జగత్తే.. నిలిచేది ఆత్మ స్వరూపమే.. కర్మ, భక్తి, జ్ఞాన యోగాల మార్గదర్శిని గీతా -16!
నామం 15 : Bhagavad Gita: భగవద్గీత పఠనమే జన్మదుఃఖ విముక్తి మార్గం.. కర్మ, భక్తి, జ్ఞాన యోగాల మార్గదర్శిని గీతా -15!
నామం 14 : Bhagavad Gita: ధర్మాన్ని హరిస్తే అది మనల్ని హరిస్తుంది.. కర్మ, భక్తి, జ్ఞాన యోగాల మార్గదర్శిని గీతా-14!
