Google: విశాఖ భవిష్యత్తును మార్చే పెట్టుబడి.. గూగుల్ ఏఐ డేటా సెంటర్ చారిత్రాత్మకం.. పల్లా శ్రీనివాసరావు కీలక వ్యాఖ్యలు!

నీటి కొరత, విద్యుత్ సంక్షోభం వస్తుందన్న ప్రచారం అవాస్తవం: టీడీపీ రాష్ట్ర అధ్యక్షుడు.. 

పర్యావరణానికి హాని లేని ప్రాజెక్ట్.. గ్రీన్ ఎనర్జీతో గూగుల్ ఏఐ డేటా సెంటర్..

విశాఖపట్నం: ప్రతిపాదిత గూగుల్ ఏఐ డేటా సెంటర్‌పై వస్తున్న ఆందోళనలు వాస్తవాలపై ఆధారపడలేదని టీడీపీ రాష్ట్ర అధ్యక్షుడు, గాజువాక ఎమ్మెల్యే పల్లా శ్రీనివాసరావు అన్నారు. ఈ ప్రాజెక్ట్ ఆంధ్రప్రదేశ్ చరిత్రలోనే అతిపెద్ద సాంకేతిక పెట్టుబడుల్లో ఒకటిగా నిలుస్తుందని, విశాఖ నగర ఆర్థిక భవిష్యత్తును మార్చే అవకాశముందని పేర్కొన్నారు.

డేటా సెంటర్ వల్ల నీటి కొరత, విద్యుత్ సమస్యలు, పర్యావరణ నష్టం జరుగుతుందంటూ కొంతమంది చేస్తున్న ప్రచారంలో వాస్తవాలు లేవని ఆయన స్పష్టం చేశారు. సోషల్ మీడియా ప్రచారాలు, ఊహాగానాల ద్వారా ప్రజల్లో అనవసర ఆందోళన కలిగించే ప్రయత్నాలు జరుగుతున్నాయని అన్నారు.

గూగుల్ ఏఐ డేటా సెంటర్ సాధారణ పరిశ్రమ కాదని, భవిష్యత్ ఏఐ ఆధారిత ఆర్థిక వ్యవస్థలో విశాఖకు కీలక స్థానాన్ని కల్పించే డిజిటల్ మౌలిక వసతి ప్రాజెక్ట్ అని పల్లా శ్రీనివాసరావు తెలిపారు.

ముఖ్యమంత్రి చంద్రబాబు నాయుడు నాయకత్వంలో రాష్ట్రంలో అమలు చేస్తున్న పెట్టుబడిదారులకు అనుకూల విధానాలు, సింగిల్ విండో అనుమతులు, పారదర్శక పాలన వల్లే అంతర్జాతీయ సంస్థలు ఏపీ వైపు ఆకర్షితమవుతున్నాయని చెప్పారు. గూగుల్‌తో పాటు కాగ్నిజెంట్, రిలయన్స్, టీసీఎస్ వంటి సంస్థలు రాష్ట్రంలో పెట్టుబడులు పెట్టేందుకు ముందుకు రావడానికి ఇవే కారణమన్నారు.

నీటి లభ్యతపై వస్తున్న విమర్శలను ఖండిస్తూ, భవిష్యత్ అవసరాలను దృష్టిలో పెట్టుకుని ప్రభుత్వం పట్టణ నీటి మౌలిక వసతులను బలోపేతం చేస్తోందని తెలిపారు. పోలవరం ప్రాజెక్ట్‌కు అనుసంధానంగా అదనపు నీటి వనరులు, మౌలిక సదుపాయాల అభివృద్ధి ద్వారా విశాఖ నీటి సరఫరా సామర్థ్యం మరింత పెరుగుతుందని చెప్పారు.

డేటా సెంటర్ కోసం ప్రజల నీటిని మళ్లించడం లేదని, భవిష్యత్ జనాభా, పారిశ్రామిక అవసరాలకు సరిపడేలా నీటి వనరులను పెంచుతున్నామని పేర్కొన్నారు. నీటి రీసైక్లింగ్ కోసం కామన్ ఎఫ్లుయెంట్ ట్రీట్‌మెంట్ ప్లాంట్లు (CETP), సీవేజ్ ట్రీట్‌మెంట్ ప్లాంట్లు (STP) వంటి ఆధునిక వ్యవస్థలు ఉపయోగిస్తామని తెలిపారు.

విద్యుత్ అవసరాలపై కూడా పల్లా స్పందిస్తూ, ఈ ప్రాజెక్ట్ పునరుత్పాదక ఇంధన ఆధారంగా రూపొందుతోందని చెప్పారు. సౌర, పవన, హైబ్రిడ్ ఎనర్జీ వనరులతో పాటు అదనపు ట్రాన్స్‌మిషన్ సదుపాయాలు, గ్రీన్ ఎనర్జీ ఉత్పత్తి, ఎనర్జీ స్టోరేజ్ వ్యవస్థల అభివృద్ధికి చర్యలు తీసుకుంటారని తెలిపారు.

డేటా సెంటర్ వల్ల ఇళ్లకు, వ్యాపారాలకు అందాల్సిన విద్యుత్ తగ్గదని, పైగా రాష్ట్ర విద్యుత్ సామర్థ్యాన్ని పెంచేలా ఈ ప్రాజెక్ట్ ఉపయోగపడుతుందని అన్నారు.

ఇది కాలుష్య పరిశ్రమ కాదని, ఆధునిక సాంకేతికత, స్వచ్ఛ ఇంధనంపై ఆధారపడిన డిజిటల్ మౌలిక వసతి ప్రాజెక్ట్ అని పల్లా శ్రీనివాసరావు వివరించారు. అభివృద్ధి, పర్యావరణ పరిరక్షణ రెండూ కలిసి ముందుకు సాగవచ్చని పేర్కొన్నారు.

గూగుల్ ఏఐ డేటా సెంటర్ రాకతో విశాఖలో ఏఐ, క్లౌడ్ కంప్యూటింగ్, సైబర్ సెక్యూరిటీ, డేటా అనలిటిక్స్, సాఫ్ట్‌వేర్ సేవలు వంటి రంగాలు అభివృద్ధి చెందే అవకాశం ఉందన్నారు. ప్రత్యక్ష, పరోక్ష ఉపాధి అవకాశాలు పెరగడంతో పాటు స్టార్టప్‌లు, పరిశోధనా సంస్థలు, విద్యాసంస్థలు, లాజిస్టిక్స్, హాస్పిటాలిటీ రంగాలకు ఊతమిస్తుందని చెప్పారు.

హైదరాబాద్ టెక్నాలజీ హబ్‌గా ఎదిగిన విధంగానే విశాఖ కూడా ఏఐ, డిజిటల్ ఎకానమీకి కేంద్రంగా మారే అవకాశం ఉందని అన్నారు. ఇలాంటి పెద్ద పెట్టుబడులు అరుదుగా వస్తాయని, ప్రజలు వాస్తవాల ఆధారంగా చర్చించాలని, అపోహలను నమ్మవద్దని పల్లా శ్రీనివాసరావు కోరారు.