TDP: వైసీపీ హయాంలో ఆక్వా రంగం నష్టపోయింది.. ప్రభుత్వ సలహాదారు షరీఫ్ విమర్శలు!

వైసీపీ హయాంలో ఆక్వా రంగం నష్టపోయిందని విమర్శలు.. రైతుల కోసం రాయితీలు కొనసాగిస్తున్నామని వెల్లడి..

ఆక్వా రంగంపై రాజకీయాలు వద్దు.. రైతుల ప్రయోజనాలే ముఖ్యం..

మంగళగిరి: ఆంధ్రప్రదేశ్‌లో ఆక్వా రంగ అభివృద్ధికి కూటమి ప్రభుత్వం ప్రత్యేక ప్రాధాన్యం ఇస్తోందని ప్రభుత్వ సలహాదారు ఎం.ఏ. షరీఫ్ తెలిపారు. గత ఐదేళ్లలో ఆక్వా రైతులకు ఇచ్చిన హామీలను అమలు చేయకుండా వైసీపీ ప్రభుత్వం ఈ రంగాన్ని ఇబ్బందుల్లోకి నెట్టిందని ఆయన విమర్శించారు.

మంగళగిరిలోని ఎన్టీఆర్ భవన్‌లో నిర్వహించిన మీడియా సమావేశంలో షరీఫ్ మాట్లాడుతూ.. రాష్ట్రానికి సుమారు 900 కిలోమీటర్ల సుదీర్ఘ సముద్ర తీరం ఉండటం ఆక్వా రంగానికి పెద్ద అవకాశమని పేర్కొన్నారు. చేపలు, రొయ్యల సాగు ద్వారా రైతుల ఆదాయం పెంచే దిశగా గతంలో నుంచే ముఖ్యమంత్రి చంద్రబాబు నాయుడు చర్యలు తీసుకుంటున్నారని తెలిపారు.

ఆక్వా రంగంలో సీడ్, ఫీడ్, ప్రాసెసింగ్ యూనిట్ల సమస్యలను గత ప్రభుత్వం పట్టించుకోలేదని షరీఫ్ ఆరోపించారు. ఫీడ్ ధరలు పెరిగిన సమయంలో మౌనంగా ఉన్న వైసీపీ ఇప్పుడు రాజకీయ ఆరోపణలు చేస్తోందని విమర్శించారు. అంతర్జాతీయ పరిస్థితులు, ముడి సరుకుల ధరలు, పశ్చిమాసియాలో యుద్ధ పరిస్థితుల వల్ల ఫీడ్ ధరలపై ప్రభావం పడిందని అన్నారు.

2019 నుంచి 2024 మధ్య కాలంలో ఆక్వా ఫీడ్ ధరలు భారీగా పెరిగాయని, కిలో ఫీడ్ ధర రూ.90.40 నుంచి రూ.110కు పైగా చేరడంతో రైతులపై అదనపు భారం పడిందని వివరించారు. టన్నుకు దాదాపు రూ.20 వేలకుపైగా అదనపు ఖర్చు వచ్చిందని తెలిపారు.

వైసీపీ ప్రభుత్వం ఫీడ్, సీడ్ కంపెనీలపై ఒత్తిడి తీసుకువచ్చి వేల కోట్ల రూపాయలు వసూలు చేసిందని షరీఫ్ ఆరోపించారు. జే-ట్యాక్స్ పేరుతో సుమారు రూ.5 వేల కోట్ల వరకు అక్రమ వసూళ్లు జరిగాయని, ఆ భారాన్ని చివరకు రైతులే భరించాల్సి వచ్చిందని అన్నారు.

ఆక్వా రైతులకు యూనిట్ విద్యుత్‌ను రూ.1.50కే ఇస్తామని గత ప్రభుత్వం ఇచ్చిన హామీ పూర్తిగా అమలు కాలేదని ఆయన విమర్శించారు. ఆక్వా జోన్, నాన్-జోన్ పేరుతో రైతులను విభజించి కొందరికి మాత్రమే సబ్సిడీలు అందించారని అన్నారు. దీంతో అనేక మంది రైతులు నష్టపోయారని తెలిపారు.

వైసీపీ హయాంలో విద్యుత్ కోతల కారణంగా రైతులు డీజిల్ జనరేటర్లపై ఆధారపడాల్సి వచ్చిందని, దీంతో ఎకరానికి అదనంగా వేల రూపాయల ఖర్చు పెరిగిందని చెప్పారు. విద్యుత్ సబ్సిడీ బకాయిలు కూడా మిగిలిపోయాయని ఆరోపించారు.

రొయ్యల ధరల విషయంలోనూ రైతులకు న్యాయం జరగలేదని షరీఫ్ అన్నారు. మద్దతు ధర ప్రకటించినా రైతులకు పూర్తి ప్రయోజనం అందలేదని తెలిపారు. మార్కెట్ సెస్ పెంపుతో కూడా రైతులపై అదనపు భారం పడిందని విమర్శించారు.

అమెరికా దిగుమతి సుంకాల కారణంగా రొయ్యల ఎగుమతులు ఇబ్బందుల్లో పడిన సమయంలో కూటమి ప్రభుత్వం వెంటనే స్పందించిందని చెప్పారు. ముఖ్యమంత్రి చంద్రబాబు నాయుడు కేంద్ర ప్రభుత్వంతో చర్చలు జరిపి ఎగుమతులు కొనసాగేందుకు చర్యలు తీసుకున్నారని తెలిపారు.

ప్రస్తుతం కూటమి ప్రభుత్వం ఆక్వా రైతులకు అండగా నిలుస్తోందని షరీఫ్ పేర్కొన్నారు. ఆక్వా జోన్, నాన్-జోన్ తేడా లేకుండా అర్హులైన రైతులందరికీ యూనిట్ విద్యుత్‌ను రూ.1.50కే అందిస్తున్నామని తెలిపారు. గతంలో పరిమితంగా ఉన్న సౌకర్యాలను ఇప్పుడు అన్ని అర్హులైన రైతులకు వర్తింపజేస్తున్నామని చెప్పారు.

మార్కెట్ సెస్‌ను పూర్తిగా రద్దు చేశామని, ఆక్వా విద్యుత్ సబ్సిడీ కోసం ప్రభుత్వం మరింత నిధులు కేటాయిస్తోందని వెల్లడించారు. రైతుల ఆదాయం పెంచేందుకు ప్రభుత్వం చర్యలు తీసుకుంటుందని అన్నారు.

ప్రధానమంత్రి మత్స్య సంపద యోజన కింద బాపట్ల జిల్లా నిజాంపట్నంలో రూ.88.08 కోట్లతో ఇంటిగ్రేటెడ్ ఆక్వా పార్క్ నిర్మిస్తున్నామని తెలిపారు. దీని ద్వారా ఆక్వా ఉత్పత్తుల నాణ్యత, ఉత్పాదకత, ఎగుమతులు పెరుగుతాయని చెప్పారు.

ఆక్వా రంగ అభివృద్ధిని రాజకీయ కోణంలో చూడకుండా రైతుల ప్రయోజనాల కోసం అందరూ కలిసి పనిచేయాలని షరీఫ్ కోరారు. అసత్య ప్రచారాలను నమ్మకుండా వాస్తవాలను గమనించాలని రైతులకు విజ్ఞప్తి చేశారు.