ప్రియమైన ఆంధ్రప్రవాసి పాఠక భక్తులారా,
సాక్షాత్తు వ్యాస భగవానుని కృపా ప్రసాదంతో, గీతామాత ఆరాధనకు మనకు లభించిన ఈ పవిత్ర అవకాశాన్ని మీతో పంచుకోవడం ఆనందకరమైన కర్తవ్యంగా భావిస్తున్నాం..
సాక్షాత్తు భగవంతుని వ్యక్తస్వరూపము, మూర్తి స్వరూపమైన శ్రీమద్భగవద్గీత మానవాళికి అందిన రోజు గీతా జయంతి రోజు. డిసెంబర్ ఒకటవ తేదీకి గీతా జయంతి వస్తుంది. ఈ గీతా జయంతి సందర్భంగా, పూజ్య శ్రీ గురుదేవుల ఆశీస్సులతో శ్రీమద్భగవద్గీత అష్టోత్తర శతనామావళిలోని ఈరోజు 39వ రోజు నామాన్ని మీ ముందుకు తీసుకొస్తున్నాము.
ప్రతి నామం వెనుక ఉన్న అర్థం, ఆధ్యాత్మికత, భక్తి సారాన్ని తెలుసుకొని మనం గీతామాతను మరింతగా ఆరాధించుకుందాం. ఈ పవిత్ర ప్రయత్నంలో భాగంగా, ఆంధ్రప్రవాసి Devotional విభాగంలో ప్రతి రోజు ఒక నామాన్ని మీకు అందజేస్తూ, మన గీతామాత కరుణకు అంజలి ఘటిస్తున్నాము.
ఓం వ్యాసదేవాయ నమః
పూజ్యశ్రీ భవఘ్నీ గురుదేవుల వారి అనుగ్రహం తో
శ్రీమద్భగవద్గీత అష్టోత్తరశత నామావళి
39. ఓం సదాచార ప్రదాయై నమః
అర్థం: తరతరాల నుండి పెద్దలు పాటిస్తున్న సంప్రదాయ పద్ధతులే ఆచారం. కర్మాచరణలో శాస్త్రము, పెద్దల ఆచరణ ప్రమాణాలుగా గ్రహించాలని గీతాబోధ. శాస్త్ర విహితమైన సత్కర్మలనే ఆచరించాలని శ్రీమద్భగవద్గీత మనకు తెలియజేస్తుంది. శాస్త్రోక్తమైన విధిని విడిచిపెట్టి, ఇష్టానుసారం ప్రవర్తించేవాడు పురుషార్థాలు సాధించలేడు. సుఖశాంతులు పొందలేడు. ఆపై మోక్షమూ పొందలేడు. శాస్త్ర విహితం కాని కర్మ ఘోరమైనది.
తస్మాచ్ఛాస్త్రం ప్రమాణం తే కార్యాకార్య వ్యవస్థితౌ ।
జ్ఞాత్వా శాస్త్ర విధానోక్తం కర్మ కర్తుమిహార్హసి ॥ ౧౬.౨౪
అర్థం: చేయదగినవి, చేయదగనివి నిర్ణయించే సందర్భంలో శాస్త్రం ప్రమాణమై ఉన్నది. శాస్త్రంలో చెప్పినదాన్ని తెలుసుకొని, దానిని అనుసరించి కర్మ చెయ్యాలి.
కనుక శాస్త్ర పరిచయం వలన, అపరా విద్య వలన ఉత్తమ కార్యాచరణ సాధ్యం అవుతుంది. ఆ విధంగా చిత్తశుద్ధి కలుగగా అచిరకాలంలో పరావిద్య, అనగా ఆత్మానుభూతి కూడా లభించే అవకాశం ఉంది. అయితే ఏ శాస్త్రం మనకు ప్రమాణం? అన్ని శాస్త్రాలకన్న ప్రామాణికమైన శాస్త్రం శ్రీమద్భగవద్గీత.
కర్మాచరణలో శాస్త్ర ప్రమాణమే కాక ఆచార్య ప్రమాణం కూడా ఉంది. అనగా పెద్దలు, గురువులు, శ్రేష్ఠులు ఏ ఆచారాలు పాటించారో వాటిని ఆదర్శాలుగా స్వీకరించాలి. ఈ విషయంలో భగవద్గీత ఇట్లా చెపుతుంది.
యద్యదాచరతి శ్రేష్ఠః తత్త దేవేతరో జనః ।
స యత్ప్రమాణం కురుతే లోకస్తదనువర్తతే ॥ ౩.౨౧
అర్థం: గొప్ప వ్యక్తి ఏ కర్మ చేస్తాడో దానినే తక్కినవారూ చేస్తారు. అతడు దేనిని ప్రమాణంగా గ్రహిస్తాడో దానినే లోకం అనుసరిస్తుంది. మహర్షులు, ఆచార్యులు, పెద్దలు కర్మాచరణలో ఏమార్గాన్ని అనుసరించారో అదే సామాన్య జనులందరికి ఆదర్శం అవుతుంది.
ఈ విధంగా ఏది సదాచారమో, ఏది దురాచారమో నాకు తెలియజేసింది గీతామాత. ఈ జన్మను సార్థకం చేసుకోవటానికి కర్తవ్య కర్మలను గూర్చి, మోక్షధర్మాలను గూర్చి తెలియజెప్పింది. త్రివిధ తపస్సులు, సద్గుణాలను గురించి వివరించింది. యుక్తాహార విహారాలను బోధించింది.
ఉత్తమాచారాలను తెలిపి, నాలో వివేకజ్యోతి వెలిగించిన గీతామాతకు శ్రద్ధతో చేతులు జోడించి నమస్కరిస్తున్నాను.
ఈక్రింది telegram channel లింకు ద్వారా మనం పూజ్య శ్రీ భవఘ్ని గురుదేవుల వారి సత్సంగాలు శ్రవణం చేయవచ్చు
లింకు లో జాయిన్ అవండి
ఇంతటి మహత్తరమైన అవకాశాన్ని మనకందించిన గురుదేవుల వారికి అమ్మకు కృతజ్ఞతలు తెలియజేస్తూ
జై గురుదేవ్
నామం 36 : Bhagavad Gita :సుఖం ఉన్నంత మాత్రాన శాంతి ఉండదు.. కర్మ, భక్తి, జ్ఞాన యోగాల మార్గదర్శిని గీతా -36!
నామం 29 : Bhagavad Gita: భయంలేని జీవితం దైవసంపదతోనే సాధ్యం.. కర్మ, భక్తి, జ్ఞాన యోగాల మార్గదర్శిని గీతా -29!
నామం 28 : Bhagavad Gita: మోక్షానికి మూలం ధ్యానం, ధ్యానానికి మూలం దివ్యశక్తి.. కర్మ, భక్తి, జ్ఞాన యోగాల మార్గదర్శిని గీతా -28!
నామం 26 : Bhagavad Gita: జన్మ మరణాలను జయించేది సమస్థితి అదే మోక్షమార్గం.. కర్మ, భక్తి, జ్ఞాన యోగాల మార్గదర్శిని గీతా -26!
నామం 24 : జీవాత్మ నుండి పరమాత్మ వరకు గీతా ప్రబోధం.. కర్మ, భక్తి, జ్ఞాన యోగాల మార్గదర్శిని గీతా -24!
నామం 16 : Bhagavad Gita: నశించేది జగత్తే.. నిలిచేది ఆత్మ స్వరూపమే.. కర్మ, భక్తి, జ్ఞాన యోగాల మార్గదర్శిని గీతా -16!
నామం 15 : Bhagavad Gita: భగవద్గీత పఠనమే జన్మదుఃఖ విముక్తి మార్గం.. కర్మ, భక్తి, జ్ఞాన యోగాల మార్గదర్శిని గీతా -15!
నామం 14 : Bhagavad Gita: ధర్మాన్ని హరిస్తే అది మనల్ని హరిస్తుంది.. కర్మ, భక్తి, జ్ఞాన యోగాల మార్గదర్శిని గీతా-14!
