USA: 11 ఏళ్ల నిత్య తమ్మనకు అంతర్జాతీయ గుర్తింపు.. ‘మోట్ మిలియన్ డాలర్ ఛాలెంజ్’లో జాతీయ విజేతగా ఘనత!

నీటి సంరక్షణ కోసం చిన్న వయసులోనే గొప్ప ఆవిష్కరణ..

తెలుగమ్మాయి నిత్య తమ్మన సత్తా.. 5,300 మందిని అధిగమించి అమెరికా పోటీలో అగ్రస్థానం..

చిన్న వయసులోనే పెద్ద ఆలోచనలతో ముందుకు సాగితే అద్భుతాలు సృష్టించవచ్చని 11 ఏళ్ల తెలుగమ్మాయి నిత్య తమ్మన నిరూపించింది. అమెరికాలో ప్రతిష్టాత్మకంగా నిర్వహించే యువ ఔత్సాహిక పారిశ్రామికవేత్తల పోటీ ‘మోట్ మిలియన్ డాలర్ ఛాలెంజ్’లో జాతీయ విజేతగా నిలిచి నిత్య అందరి ప్రశంసలు అందుకుంది.

అమెరికాలోని ఐదో తరగతి నుంచి ఎనిమిదో తరగతి వరకు చదువుతున్న విద్యార్థులు 50 రాష్ట్రాల నుంచి ఈ పోటీలో పాల్గొన్నారు. 5,300 మందికి పైగా విద్యార్థులతో పోటీ పడిన నిత్య, అనేక దశల కఠినమైన ఎంపికల అనంతరం మిచిగాన్‌లో జరిగిన తుది పోటీల్లో విజేతగా నిలిచింది. ఈ విజయంతో ఆమెకు 40,250 డాలర్ల (సుమారు రూ.33 లక్షలకు పైగా) నగదు బహుమతి లభించింది.

నిత్య విజయం వెనుక ఉన్న అసలు ప్రత్యేకత ఆమె ఆలోచన విధానం. ప్రపంచవ్యాప్తంగా పెరుగుతున్న నీటి కొరత సమస్యకు పరిష్కారం చూపాలనే లక్ష్యంతో ఆమె ‘సేవ్ డ్రాప్’ పేరుతో ఒక ఉద్యమాన్ని ప్రారంభించింది. పిల్లలను కూడా ఇందులో భాగస్వాములను చేస్తూ నీటి పొదుపుపై అవగాహన కల్పిస్తోంది.

ప్రకృతి నుంచి నేర్చుకున్న అంశాలను ఆధారంగా చేసుకుని నిత్య స్వయంగా ఒక నీటి శుద్ధి పరికరాన్ని రూపొందించింది. ప్రయోగశాల పరీక్షల్లో ఈ పరికరం నీటిలో ఉండే ప్రమాదకరమైన సీసం వంటి విషపూరిత లోహాలను తొలగించి నీటిని శుద్ధి చేయగలదని నిర్ధారణ అయింది.

ఆవిష్కరణతో పాటు సామాజిక మార్పు కోసం కూడా నిత్య కృషి చేస్తోంది. హోటళ్లు, రెస్టారెంట్లలో నీటి వృథాను తగ్గించేందుకు ‘సగం గ్లాసు నీరు మాత్రమే ఇవ్వండి’ అనే ప్రచారాన్ని ప్రారంభించి ప్రజల్లో అవగాహన పెంచుతోంది. అలాగే నీటి పొదుపును పెంచేలా మోటార్ పంపుల వినియోగంపై నిబంధనలు తీసుకురావడానికి కూడా తన వంతు ప్రయత్నాలు చేస్తోంది.

చిన్న వయసులోనే పర్యావరణ పరిరక్షణ, సమాజ సేవపై నిత్య చూపుతున్న బాధ్యత, ఆమె సాధించిన విజయం ప్రపంచవ్యాప్తంగా ఉన్న భారతీయులకు గర్వకారణంగా మారింది. సైన్స్ ఆవిష్కరణను సామాజిక బాధ్యతతో కలిపి ముందుకు తీసుకెళ్తున్న నిత్య ప్రయాణం రాబోయే తరాలకు స్ఫూర్తిగా నిలుస్తోంది.