TCA: టీసీఏ ‘హ్యూస్టన్ ఐడల్’కు రంగం సిద్ధం.. ప్రవాస తెలుగు ప్రతిభకు భారీ వేదిక!

ప్రవాస తెలుగు ప్రతిభకు భారీ వేదికగా ‘హ్యూస్టన్ ఐడల్’..

సింగ్.. డాన్స్.. షైన్.. టీసీఏ నుంచి యువతకు సువర్ణావకాశం..

హ్యూస్టన్: అమెరికాలోని తెలుగు సమాజంలో ప్రతిభను ప్రోత్సహించేందుకు హ్యూస్టన్ తెలుగు సాంస్కృతిక సమితి (TCA) మరో ప్రత్యేక కార్యక్రమానికి శ్రీకారం చుట్టింది. సంస్థ 50వ వార్షికోత్సవ స్వర్ణోత్సవ వేడుకల సందర్భంగా ‘హ్యూస్టన్ ఐడల్’ పేరుతో భారీ టాలెంట్ పోటీలను నిర్వహించనున్నట్లు ప్రకటించింది.

“సింగ్.. డాన్స్.. షైన్” అనే ఆకర్షణీయమైన నినాదంతో నిర్వహిస్తున్న ఈ పోటీలు సంగీతం, నృత్య రంగాల్లో ప్రతిభ కలిగిన ప్రవాస తెలుగు వారికి తమ నైపుణ్యాన్ని ప్రదర్శించుకునే అరుదైన అవకాశాన్ని అందించనున్నాయి.

జూన్ 27, 2026 శనివారం ఉదయం 10 గంటల నుంచి రాత్రి 10 గంటల వరకు టెక్సాస్ రాష్ట్రంలోని ఫుల్షీర్ నగరంలో ఉన్న ఐరిన్ స్టెర్న్ కమ్యూనిటీ సెంటర్‌లో ఈ పోటీలు జరగనున్నాయి.

పోటీల్లో భాగంగా సోలో సింగింగ్, సోలో డాన్స్, గ్రూప్ డాన్స్ విభాగాల్లో పోటీలు నిర్వహించనున్నారు. గ్రూప్ డాన్స్ విభాగంలో కనీసం ఇద్దరు, గరిష్టంగా పది మంది సభ్యులు పాల్గొనే అవకాశం ఉంటుంది.

వయస్సు ఆధారంగా పోటీలను మూడు విభాగాలుగా విభజించారు. 8 నుంచి 13 సంవత్సరాల మధ్య వయస్సు గలవారు సబ్ జూనియర్, 14 నుంచి 19 సంవత్సరాల వారు జూనియర్, 20 సంవత్సరాలు పైబడిన వారు సీనియర్ విభాగంలో పోటీపడవచ్చు.

పోటీల్లో పాల్గొనదలచిన ప్రతి ఒక్కరికీ 30 డాలర్ల రిజిస్ట్రేషన్ ఫీజు నిర్ణయించారు. నమోదు చేసుకునేందుకు చివరి తేదీ జూన్ 15, 2026గా ప్రకటించారు. ఆసక్తి గలవారు సంస్థ వెబ్‌సైట్ లేదా ఫ్లయ్యర్‌లో ఉన్న క్యూ ఆర్ కోడ్ ద్వారా తమ పేర్లను నమోదు చేసుకోవచ్చు.

ఈ పోటీల్లో విజేతలుగా నిలిచిన వారికి ప్రత్యేక అవకాశం కూడా లభించనుంది. ఆగస్టు 8, 2026న ఫోర్ట్ బెండ్ ఎపిసెంటర్‌లో జరిగే టీసీఏ 50వ స్వర్ణోత్సవ ప్రధాన వేడుకల్లో వేలాది మంది ప్రేక్షకుల సమక్షంలో ప్రత్యక్ష ప్రదర్శన ఇచ్చే అవకాశం కల్పించనున్నారు.

ప్రవాస తెలుగు యువతలో దాగి ఉన్న ప్రతిభను వెలికితీసి, వారికి పెద్ద వేదికను అందించడమే ఈ కార్యక్రమం ప్రధాన ఉద్దేశమని నిర్వాహకులు తెలిపారు. ఈ కార్యక్రమాన్ని విజయవంతం చేయాలని టీసీఏ అధ్యక్షుడు యాదగిరి రెడ్డి కుడుముల, కన్వీనర్ జితేందర్ రెడ్డి, సాంస్కృతిక కమిటీ చైర్‌పర్సన్లు స్నేహలత చిర్ర, శాంత సురేష్‌తో పాటు ఎగ్జిక్యూటివ్ బోర్డు సభ్యులు పిలుపునిచ్చారు.

మరిన్ని వివరాల కోసం స్నేహ, ఆశ జ్యోతి తదితర నిర్వాహకులను సంప్రదించవచ్చని టీసీఏ ప్రతినిధులు తెలిపారు. ప్రవాస తెలుగు కళాకారులకు ఇది ఒక అద్భుతమైన అవకాశమని వారు పేర్కొన్నారు.