ట్రాఫిక్‌ సిగ్నల్‌ నుంచి ఎమ్మెల్యే కార్యాలయం వరకు.. ట్రాన్స్‌జెండర్‌ కి MLA ఉద్యోగం!

బిక్షాటన నుంచి ఎమ్మెల్యే కార్యాలయం వరకు.. ట్రాన్స్‌జెండర్‌ వర్షిణి గల్లా మాధవి గౌరవప్రదమైన ఉద్యోగం..

ఒకప్పుడు రూ.10 కోసం ఎదురుచూపులు.. ఇప్పుడు ఎమ్మెల్యే కార్యాలయంలో కీలక బాధ్యతలు..

సమాజంలో చదువుకున్నా సరైన ఉద్యోగం దొరక్క, వివక్ష కారణంగా ఎన్నో అవమానాలు ఎదుర్కొంటున్న ట్రాన్స్‌జెండర్లకు అండగా నిలవాల్సిన అవసరం ఎంతైనా ఉంది. మాటల్లో కాకుండా చేతల్లో ఆ మార్పును చూపించారు గుంటూరు పశ్చిమ నియోజకవర్గ టీడీపీ ఎమ్మెల్యే గల్లా మాధవి. బీకాం చదివి కూడా ఉపాధి దొరక్క ట్రాఫిక్‌ సిగ్నళ్ల వద్ద భిక్షాటన చేయాల్సిన పరిస్థితి ఎదుర్కొన్న వర్షిణి అనే ట్రాన్స్‌జెండర్‌కు ఆమె గౌరవప్రదమైన ఉద్యోగ అవకాశం కల్పించారు. తన వ్యక్తిగత సహాయకురాలిగా (పీఏ) నియమించి సమాజంలో గౌరవంగా జీవించే మార్గం చూపించారు.

వర్షిణి బీకాం డిగ్రీ పూర్తి చేశారు. చదువుకుని తన కాళ్లపై తాను నిలబడాలనే పట్టుదల ఉన్నప్పటికీ, ట్రాన్స్‌జెండర్‌ అనే కారణంతో పలుచోట్ల ఉద్యోగ అవకాశాలు దక్కలేదు. ఎంత ప్రయత్నించినా ఉపాధి లభించకపోవడంతో చివరకు జీవనోపాధి కోసం ట్రాఫిక్‌ సిగ్నళ్ల వద్ద భిక్షాటన చేయాల్సి వచ్చింది. చదువు ఉన్నా, పని చేయాలనే ఆసక్తి ఉన్నా సమాజంలోని వివక్ష తన జీవితాన్ని ఎంతలా ప్రభావితం చేసిందో ఆమె అనుభవించిన కష్టాలు తెలియజేస్తున్నాయి.

ఈ క్రమంలో ఎమ్మెల్యే గల్లా మాధవి నిర్వహిస్తున్న వారాంతపు ప్రజా ఫిర్యాదుల స్వీకరణ కార్యక్రమానికి వర్షిణి హాజరయ్యారు. ప్రతి మంగళవారం జరిగే ఈ కార్యక్రమంలో తన సమస్యను ఎమ్మెల్యేకు వివరించారు. బీకాం చదివినా ఉద్యోగం దొరక్క, బతుకుదెరువు కోసం సిగ్నళ్ల వద్ద అడుక్కోవాల్సి వస్తోందని చెబుతూ తన ఆవేదనను వ్యక్తం చేశారు. తనకు ఆర్థిక సాయం కంటే గౌరవంగా బతికేందుకు ఒక ఉద్యోగ అవకాశం కల్పించాలని కోరారు. తన కష్టాలను వివరిస్తూ కన్నీటి పర్యంతమయ్యారు.

వర్షిణి పరిస్థితిని అర్థం చేసుకున్న గల్లా మాధవి వెంటనే స్పందించారు. కేవలం తాత్కాలిక ఆర్థిక సాయం అందించి పంపించకుండా, ఆమెకు బాధ్యతాయుతమైన ఉద్యోగం కల్పించాలని నిర్ణయించుకున్నారు. తన వ్యక్తిగత సహాయకురాలిగా నియమిస్తూ అవకాశం ఇచ్చారు. దీంతో వర్షిణి ఇప్పుడు ఎమ్మెల్యే కార్యాలయంలో అధికారిక, రాజకీయ వ్యవహారాలను పర్యవేక్షిస్తున్నారు. ఎమ్మెల్యే కార్యక్రమాల సమన్వయం, అధికారిక షెడ్యూల్‌ నిర్వహణతో పాటు ప్రజల నుంచి వచ్చే సమస్యలు, వినతులను స్వీకరించి వాటి పరిష్కారానికి సహకరిస్తున్నారు.

ఒకప్పుడు ట్రాఫిక్‌ సిగ్నల్‌ వద్ద రూ.10 కోసం ఎదురుచూసిన వర్షిణి.. ఇప్పుడు ఎమ్మెల్యే కార్యాలయంలో బాధ్యతలు నిర్వహించే స్థాయికి చేరుకున్నారు. ఆమె జీవితంలో వచ్చిన ఈ మార్పు కేవలం ఉద్యోగం లభించడమే కాదు, ఆత్మగౌరవంతో జీవించే అవకాశం దక్కడం కూడా. ప్రజాప్రతినిధి కార్యాలయంలో కీలక బాధ్యతలు నిర్వహించడం ద్వారా ట్రాన్స్‌జెండర్లు కూడా అన్ని రంగాల్లో సమర్థంగా పనిచేయగలరనే సందేశం వెలువడుతోంది.

ఈ నియామకంపై ఆంధ్రప్రదేశ్‌ మంత్రి నారా లోకేశ్‌ కూడా స్పందించారు. సోషల్‌ మీడియా వేదికగా గల్లా మాధవి నిర్ణయాన్ని అభినందిస్తూ, నిజమైన సామాజిక మార్పునకు ఇది ఒక ‘గోల్డెన్‌ స్టాండర్డ్‌’ అని పేర్కొన్నారు. మైకుల ముందు పెద్దపెద్ద ప్రసంగాలు చేయడం వల్ల సమాజంలో మార్పు రాదని, ఆ మార్పును ఆచరణలో చూపించినప్పుడే నిజమైన ఫలితం కనిపిస్తుందని ఆయన అభిప్రాయపడ్డారు.

ఎమ్మెల్యే తన వెంట ఒక ట్రాన్స్‌జెండర్‌ వ్యక్తిగత సహాయకురాలిని తీసుకెళ్లి, అధికారిక కార్యక్రమాల్లో ఆమెతో కలిసి పనిచేస్తున్నప్పుడు సమాజంలోని ఇతరులు కూడా ఆమెను గౌరవంగా చూడాల్సిన పరిస్థితి ఏర్పడుతుందని లోకేశ్‌ పేర్కొన్నారు. ప్రభుత్వ అధికారులు, రాజకీయ నాయకులు, ప్రజలు వర్షిణితో గౌరవంగా వ్యవహరించడం ద్వారా ఆ గౌరవం ఒక్క వ్యక్తికే పరిమితం కాకుండా మొత్తం ట్రాన్స్‌జెండర్‌ సమాజానికి విస్తరిస్తుందని ఆయన వివరించారు.

గల్లా మాధవి తీసుకున్న ఈ నిర్ణయాన్ని ఆంధ్రప్రదేశ్‌లోనే కాకుండా దేశవ్యాప్తంగా పలువురు ప్రశంసిస్తున్నారు. ట్రాన్స్‌జెండర్లకు కేవలం సానుభూతి చూపించడం కాకుండా, వారి విద్యార్హతలు, నైపుణ్యాలకు తగిన ఉద్యోగ అవకాశాలు కల్పించాల్సిన అవసరాన్ని ఈ ఘటన మరోసారి గుర్తు చేస్తోంది. వర్షిణికి లభించిన అవకాశం మరెందరికో స్ఫూర్తిగా నిలవాలని పలువురు అభిప్రాయపడుతున్నారు.

సామాజిక సమానత్వం అనేది ప్రసంగాల్లో చెప్పే మాటగా మిగిలిపోకుండా, ప్రతి ఒక్కరికీ గౌరవంగా జీవించే అవకాశం కల్పించినప్పుడే నిజమైన మార్పు సాధ్యమవుతుంది. వర్షిణికి ఉద్యోగం కల్పించిన గల్లా మాధవి నిర్ణయం ఆ దిశగా ఒక మంచి ఉదాహరణగా నిలిచింది.