డిప్యూటీ స్పీకర్ రఘురామరాజుకి బెంగళూరులో ఏమైంది?

ఏపీ డిప్యూటీ స్పీకర్ రఘురామ కృష్ణంరాజుకు సర్జరీ.. కిడ్నీలో రాళ్ల సమస్యకు కారణం అదే..

రఘురామ కృష్ణంరాజుకు థైరాయిడెక్టమీ ఆపరేషన్.. స్వయంగా వెల్లడించిన డిప్యూటీ స్పీకర్..

ఆంధ్రప్రదేశ్ శాసనసభ డిప్యూటీ స్పీకర్, ఉండి ఎమ్మెల్యే రఘురామ కృష్ణంరాజుకు బెంగళూరులో శస్త్రచికిత్స జరిగింది. ఈ విషయాన్ని ఆయనే స్వయంగా సోషల్ మీడియా వేదిక ఎక్స్‌ (X) ద్వారా వెల్లడించారు. నవంబర్ 11, బుధవారం బెంగళూరులోని కిమ్స్ ఆసుపత్రిలో తనకు థైరాయిడెక్టమీ శస్త్రచికిత్స జరిగినట్లు తెలిపారు. కొంతకాలంగా తరచూ కిడ్నీలో రాళ్ల సమస్యతో ఇబ్బందులు పడుతున్నానని, వైద్య పరీక్షల అనంతరం ఈ సమస్యకు పారాథైరాయిడ్ గ్రంథి కారణమని వైద్యులు గుర్తించినట్లు వివరించారు.

సాధారణంగా కిడ్నీలో రాళ్లు ఏర్పడటానికి అనేక కారణాలు ఉంటాయి. అయితే తన విషయంలో పారాథైరాయిడ్ గ్రంథి పనితీరులో సమస్య కారణంగా తరచూ కిడ్నీలో రాళ్లు ఏర్పడుతున్నట్లు వైద్యులు నిర్ధారించారని రఘురామ కృష్ణంరాజు తెలిపారు. దీంతో సమస్యకు శాశ్వత పరిష్కారం కోసం శస్త్రచికిత్స ద్వారా సంబంధిత పారాథైరాయిడ్ గ్రంథిని తొలగించినట్లు వెల్లడించారు.

బెంగళూరులోని కిమ్స్ ఆసుపత్రిలో ప్రముఖ వైద్యుడు డాక్టర్ సందీప్ నాయక్ ఆధ్వర్యంలో ఈ ఆపరేషన్ జరిగినట్లు ఆయన తన పోస్టులో పేర్కొన్నారు. శస్త్రచికిత్స అనంతరం ప్రస్తుతం కోలుకుంటున్నానని, తన ఆరోగ్య పరిస్థితి మెరుగుపడుతోందని తెలిపారు.

ఈ సందర్భంగా తనకు వైద్య సేవలు అందించిన డాక్టర్లు, ఆసుపత్రి సిబ్బందికి రఘురామ కృష్ణంరాజు ప్రత్యేకంగా కృతజ్ఞతలు తెలియజేశారు. అంతేకాకుండా తన ఆరోగ్యం మెరుగుపడాలని దేవుడిని ప్రార్థించిన అభిమానులు, పార్టీ నాయకులు, కార్యకర్తలు, శ్రేయోభిలాషులందరికీ ధన్యవాదాలు తెలిపారు.

రఘురామ కృష్ణంరాజు స్వయంగా తన ఆరోగ్య పరిస్థితిపై సమాచారం ఇవ్వడంతో ఆయన అభిమానులు, రాజకీయ వర్గాల్లో ఆసక్తి నెలకొంది. ఆయన త్వరగా పూర్తిస్థాయిలో కోలుకుని తిరిగి విధుల్లో చేరాలని పలువురు ఆకాంక్షిస్తున్నారు.