ఇజ్రాయెల్ ప్రపంచ రక్షణ రంగంలో మరో కీలక అడుగు వేసింది. అత్యాధునిక లేజర్ రక్షణ వ్యవస్థ ‘ఐరన్ బీమ్’ (Iron Beam) ను పూర్తిస్థాయిలో సిద్ధం చేసి సైన్యానికి అందించేందుకు సిద్ధమైంది. ఈ వ్యవస్థను డిసెంబర్ 30న ఇజ్రాయెల్ డిఫెన్స్ ఫోర్సెస్కి అప్పగించనున్నట్లు రక్షణ శాఖ ప్రకటించింది. శత్రు దాడులను క్షణాల్లో ఎదుర్కోవడానికి ఈ లేజర్ వెపన్ను ప్రత్యేకంగా రూపొందించారు. విమానాలు, క్షిపణులు, రాకెట్లు, మార్టార్లు, UAVలు మరియు డ్రోన్లను భూమిపై నుంచే లక్ష్యంగా తీసుకొని గాల్లోనే పేల్చి వేయగల సామర్థ్యం ఇందులో ఉంది. సాంప్రదాయ రాకెట్లు లేదా మిసైల్లను ప్రయోగించాల్సిన అవసరం లేకుండా, కేవలం లేజర్ కిరణాలతోనే దాడిని అడ్డుకోవడం ఈ టెక్నాలజీ ప్రత్యేకత.
‘ఐరన్ బీమ్’ ప్రాజెక్ట్ను ఇజ్రాయెల్ 2014లోనే ప్రకటించింది. అయితే విపరీతంగా క్లిష్టమైన ఈ సాంకేతికతపై దాదాపు 11 సంవత్సరాల పాటు పరిశోధనలు, ప్రయోగాలు, అభివృద్ధి పనులు సాగాయి. అనేక పరీక్షల్లో విజయం సాధించిన తర్వాతే దీనిని పూర్తిస్థాయిలో అమలు చేయడానికి సిద్ధమైంది. ఈ వ్యవస్థలో లేజర్ వేగం అత్యంత అధికంగా ఉండటంతో టార్గెట్ను కొన్ని సెకన్లలోనే ఖచ్చితంగా నాశనం చేయగలదు. అంతేకాకుండా ఇది ఇతర రక్షణ వ్యవస్థల కంటే చాలా తక్కువ ఖర్చుతో పని చేస్తుంది. ఉదాహరణకు, ఒక మిసైల్ను అడ్డుకోవడానికి లక్షల రూపాయలు ఖర్చు అవుతుండగా, లేజర్ను ప్రయోగించడం మాత్రం చాలా తక్కువ వ్యయంతో సాధ్యం.
ఇజ్రాయెల్ భౌగోళికంగా వివాదాస్పద ప్రాంతంలో ఉండటంతో రాకెట్ మరియు మిసైల్ దాడుల నుంచి రక్షణ అత్యంత ముఖ్యమైనది. ఇప్పటికే ఐరన్ డోమ్ వ్యవస్థను విజయవంతంగా ఉపయోగిస్తున్న ఇజ్రాయెల్, ఇప్పుడు ‘ఐరన్ బీమ్’ను అదనపు భద్రతా కవచంగా జతచేస్తోంది. రక్షణ నిపుణుల అభిప్రాయం ప్రకారం భవిష్యత్ యుద్ధాల్లో లేజర్ టెక్నాలజీ కీలక పాత్ర పోషించనుంది. దీనితో యుద్ధ విధానాలు పూర్తిగా మారిపోయే అవకాశముంది.
ప్రస్తుతం అమెరికా, యూరప్, ఆసియా దేశాలు ఈ టెక్నాలజీపై ప్రత్యేక ఆసక్తి చూపుతున్నాయి. రాబోవు కాలంలో ఇతర దేశాలకు కూడా ఈ వ్యవస్థను ఇజ్రాయెల్ అందించవచ్చని అంచనా. రక్షణ రంగంలో ఇది ఒక చరిత్రాత్మక మలుపుగా, ప్రపంచ భద్రతా వ్యవస్థలో విప్లవాత్మక మార్పుగా భావించబడుతోంది.
