iBOMMA పైరసీ వెబ్సైట్ వ్యవహారంలో అరెస్టయ్యి ప్రస్తుతం రెండో విడత పోలీసు కస్టడీలో ఉన్న రవి, దర్యాప్తు అధికారులకు పలు కీలక వివరాలు వెల్లడించినట్లు సమాచారం. సినిమా పరిశ్రమకు తీవ్రమైన నష్టం కలిగించిన ఈ వెబ్సైట్ ఎలా పనిచేసేదీ, దానికి వెనుక ఉన్న సాంకేతిక వ్యవస్థ, అంతర్జాతీయ నెట్‌వర్క్‌పై దర్యాప్తు కొనసాగుతోంది. పైరసీకి సంబంధించిన అనేక షాకింగ్ వివరాలు బయటకు వస్తున్నాయి.
పోలీసుల విచారణలో రవి iBOMMA అంటే ఇంటర్నెట్ బొమ్మ అని అర్థం చెప్పినట్లు తెలిసింది. విశాఖ ప్రాంతంలో సినిమా బొమ్మ అని పిలుస్తారని, అదే భావనతో వెబ్సైట్ పేరు పెట్టానని చెప్పినట్లు సమాచారం. తర్వాత రెండవ వెబ్సైట్‌ను ప్రారంభించాలన్న ఆలోచనలో ‘బలపం’ అనే పేరు పెట్టాలని భావించినా, సాంకేతిక కారణాల వలన అది కుదరక బప్పం గా మార్చినట్లు వెల్లడించాడు.
రవి ఇచ్చిన వివరాల ప్రకారం, పైరసీ టీం టెలిగ్రామ్ గ్రూపులు, OTT అకౌంట్లు, థియేటర్ రికార్డింగ్ నెట్‌వర్క్ సహాయంతో కొత్త సినిమాలను సేకరించేది. వాటిని ముందుగా రా ప్రింట్లుగా తీసుకురాగానే, క్వాలిటీ ఎన్హాన్సింగ్ కోసం కరీబియన్ దీవుల్లో ఉన్న టెక్నీషియన్ల‌కు పంపేవారు. వారితో ప్రత్యేక ఒప్పందాలు ఉన్నట్లు చెప్పిన రవి, క్వాలిటీ పెరిగిన వెంటనే సినిమాను ప్రపంచవ్యాప్తంగా ఉన్న మిర్రర్ సర్వర్ల ద్వారా అప్లోడ్ చేసేవారని తెలిపారు. కొన్ని నిమిషాల్లోనే లక్షల డౌన్‌లోడ్లు జరుగుతుండేవని వెల్లడించారు.
అతను చెప్పిన మరో ముఖ్య విషయం ఏమంటే, ఈ వ్యాపారం వెనుక డబ్బు చెలామణి పూర్తిగా క్రిప్టోకరెన్సీ ద్వారానే జరిగేది. ప్రకటనల కోసం కూడా విదేశీ ఏజెన్సీలను వాడేవారని, ట్రాఫిక్ ఎక్కువగా భారత్‌, అమెరికా, UAE, న్యూజిలాండ్ నుంచి వచ్చేదని తెలిపాడు. మూవీ రిలీజ్ రోజునే అప్లోడ్ చేస్తే ఎక్కువగా ఆదాయం వస్తుందని, అంతర్జాతీయ ప్రకటన కంపెనీలు భారీగా చెల్లించేవని వివరించాడు.
తెలుగు సినిమా పరిశ్రమకు iBOMMA కారణంగా భారీ నష్టం జరిగిందని, విడుదలైన ప్రతి సినిమా బాక్సాఫీస్ కలెక్షన్లలో కోట్లు కోల్పోయిందని ఇప్పటికే నిర్మాతలు వెల్లడించారు. ఈ వ్యవహారంలో మరోమంది ప్రముఖులు కూడా ఉన్నారా అన్న దానిపై దర్యాప్తు జరుగుతోంది. ఇప్పుడు రవి చేసిన వివరాలు వెలుగులోకి రావడంతో మొత్తం వ్యవస్థ బయటపడే అవకాశం ఉందని అధికారులు చెబుతున్నారు. పైరసీకి ముగింపు పలకడానికి ప్రభుత్వం కఠిన చర్యలు తీసుకుంటుందని వర్గాలు తెలిపారు.
