AP Politics: శ్రీకాకుళంలో వైసీపీ ఒక్క సీటు కూడా గెలవదు.. తమ్మినేని కుమారుడి సంచలన వ్యాఖ్యలతో రచ్చ రచ్చ!

• సర్వే నివేదికలు చూసుకోండి.. పార్టీ పరిస్థితి ఘోరం..?: మాజీ స్పీకర్ కుటుంబం నుంచే బిగ్ బాంబ్!
• బొత్సకు షాకిచ్చిన మజ్జి శ్రీను.. తమ్మినేని సైలెంట్..?: స్థానిక ఎన్నికల వేళ వైసిపికి భారీ దెబ్బ!
• ధర్మాన ప్రసాదరావు ముసిముసి నవ్వులపై ఆగ్రహం..?: గొర్లె కిరణ్ కామెంట్స్‌తో మొదలైన వార్!

AP Politics: ఉత్తరాంధ్ర ప్రాంతంలో వైఎస్సార్ కాంగ్రెస్ పార్టీకి గడ్డుకాలం నడుస్తున్న పరిస్థితులు స్పష్టంగా కనిపిస్తున్నాయి. విజయనగరం జిల్లాలో కీలక నేత మజ్జి శ్రీనివాసరావు (చిన్న శ్రీను) పార్టీని వీడి టీడీపీలో చేరడంతో మాజీ మంత్రి బొత్స సత్యనారాయణతో పాటు జగన్మోహన్ రెడ్డికి గట్టి ఎదురుదెబ్బ తగిలింది. ఆ షాక్ నుంచి పార్టీ శ్రేణులు తేరుకోకముందే శ్రీకాకుళం జిల్లా వైసిపిలో అంతర్గతంగా రగులుతున్న విభేదాలు ఒక్కసారిగా రచ్చకెక్కాయి. మాజీ స్పీకర్ తమ్మినేని సీతారాం కుమారుడు తమ్మినేని చిరంజీవి నాగ్ సొంత పార్టీ నేతల తీరుపై చేసిన తీవ్ర వ్యాఖ్యలు రాజకీయ వర్గాల్లో పెను ప్రకంపనలు సృష్టిస్తున్నాయి.

పార్టీ పరిస్థితి ఘోరం – ఒక్క సీటూ గెలవలేరంటూ కుండబద్దలు

శ్రీకాకుళం జిల్లాలో వైఎస్సార్ కాంగ్రెస్ పార్టీ పరిస్థితి ఏమాత్రం బాగోలేదని, ఇలాగే ఉంటే భవిష్యత్తులో కోలుకోవడం అసాధ్యమని చిరంజీవి నాగ్ కుండబద్దలు కొట్టారు. కావాలంటే ప్రస్తుతం వస్తున్న సర్వే నివేదికలను పరిశీలించుకోవాలని పార్టీ అధిష్టానానికి సవాల్ విసిరారు. జిల్లాలోని సీనియర్ నేతల వ్యవహారశైలి ఇలాగే కొనసాగితే రాబోయే స్థానిక సంస్థల ఎన్నికల్లో శ్రీకాకుళం జిల్లా వ్యాప్తంగా వైసిపి ఒక్క సీటు కూడా గెలిచే పరిస్థితి లేదని ఆయన చేసిన హెచ్చరికలు పార్టీ కేడర్‌ను తీవ్ర ఆందోళనకు గురిచేస్తున్నాయి.

ధర్మాన సోదరులు, గొర్లె కిరణ్‌పై తీవ్రస్థాయిలో ఆగ్రహం

స్థానిక సంస్థల ఎన్నికల సమన్వయ కమిటీ సమావేశంలో మాజీ ఎమ్మెల్యే గొర్లె కిరణ్ కుమార్ చేసిన వ్యాఖ్యలను చిరంజీవి నాగ్ తీవ్రంగా ఖండించారు. మాజీ మంత్రి సీదిరి అప్పలరాజు అరెస్ట్‌ను రాజకీయం చేస్తూ, తమ్మినేని సీతారాంను టీడీపీ నేత కోన రవికుమార్‌తో ఉన్న బంధుత్వం కారణంగానే అరెస్ట్ చేయలేదని గొర్లె కిరణ్ మాట్లాడటాన్ని తప్పుపట్టారు. ఆ సమయంలో వేదికపై ఉన్న మాజీ మంత్రులు ధర్మాన ప్రసాదరావు, ధర్మాన కృష్ణదాస్ ఆ వ్యాఖ్యలను వారించకుండా ముసిముసి నవ్వులు నవ్వడాన్ని ఆయన తీవ్రంగా ఆక్షేపించారు. ధర్మాన సోదరులు పార్టీ కంటే కులానికే అధిక ప్రాధాన్యం ఇస్తున్నారని ఆరోపించారు.

పదవి కోల్పోయిన నాటి నుంచే తమ్మినేని అసంతృప్తి

గత ప్రభుత్వంలో స్పీకర్‌గా పనిచేసిన తమ్మినేని సీతారాం ప్రతిపక్షాలపై, అమరావతిపై తీవ్రస్థాయిలో విరుచుకుపడేవారు. అయితే అధికారం కోల్పోయిన అనంతరం జగన్మోహన్ రెడ్డి ఆయనను ఆమదాలవలస నియోజకవర్గ ఇంఛార్జ్ పదవి నుంచి తప్పించి చింతాడ రవికి బాధ్యతలు అప్పగించారు. తమ్మినేనికి కేవలం పార్లమెంటరీ సమన్వయకర్త బాధ్యతలు మాత్రమే ఇవ్వడంతో అప్పటినుంచే ఆయన వర్గం తీవ్ర అసంతృప్తితో ఉంది. తమ్మినేని సీతారాం కూడా పార్టీ కార్యక్రమాల్లో క్రియాశీలకంగా పాల్గొనకుండా దూరంగా ఉంటూ వస్తున్నారు.

స్థానిక సంస్థల ఎన్నికల్లో ఫ్యాన్ పార్టీకి భారీ ముప్పు

శ్రీకాకుళం జిల్లాలో తమ్మినేని కుటుంబం అసంతృప్తితో మౌనంగా ఉండటం, మరోవైపు ధర్మాన వర్గంతో విభేదాలు బహిర్గతం కావడం రాబోయే స్థానిక ఎన్నికల్లో పార్టీ విజయావకాశాలపై తీవ్ర ప్రభావం చూపనుంది. అటు విజయనగరంలో కీలక నేతలు జారిపోవడం, విశాఖలో ద్వితీయ శ్రేణి నాయకులు పక్కచూపులు చూడటంతో ఉత్తరాంధ్ర జిల్లాల్లో వైసిపి గ్రాఫ్ వేగంగా పడిపోతోందని రాజకీయ విశ్లేషకులు భావిస్తున్నారు. అంతర్గత కుమ్ములాటలను చక్కదిద్దకపోతే రాబోయే ఎన్నికల్లో ఆ పార్టీకి పరాభవం తప్పదనే సంకేతాలు వెలువడుతున్నాయి.