నాని ఎరక్కపోయి చెప్పాడు.. వంశీ ఇరుక్కు పోయాడు! 10వేల కోట్లా.. కేసు ఖాయం!

• శంకరపల్లిలో 200 ఎకరాల భూములు.. కొడాలి నాని వ్యాఖ్యలతో ఏపీలో అలజడి!

• ఎన్నికల సంఘానికి తప్పుడు లెక్కలు చూపించారా.. అఫిడవిట్‌లో రూ.198 కోట్లు.. బయట రూ.10వేల కోట్లా!

• 1996లోనే అంత భారీ భూములు ఎలా కొన్నారు... వంశీ ఆస్తులపై సమగ్ర దర్యాప్తుకు కూటమి నేతల డిమాండ్!

Andhrapradesh: గన్నవరం మాజీ ఎమ్మెల్యే వల్లభనేని వంశీ ఆస్తుల వ్యవహారంపై ఆయన సన్నిహిత మిత్రుడు, మాజీ మంత్రి కొడాలి నాని చేసిన వ్యాఖ్యలు ఆంధ్రప్రదేశ్ రాజకీయాల్లో పెను దుమారం రేపుతున్నాయి. వల్లభనేని వంశీకి ఏకంగా రూ.10వేల కోట్ల విలువైన ఆస్తులు ఉన్నాయని, అంతటి మహా సంపన్నుడు నకిలీ ఇళ్ల పట్టాలు పంపిణీ చేశాడని, గ్రావెల్ అమ్ముకున్నాడని కేసులు బనాయించడం హాస్యాస్పదమని నాని వ్యాఖ్యానించారు. వంశీ అనుమతితోనే తాను ఈ వివరాలను బహిరంగపరుస్తున్నట్లు పేర్కొన్న కొడాలి నాని, ఈ కేసులు ముమ్మాటికీ రాజకీయ కక్ష సాధింపు చర్యలేనని కొట్టిపారేశారు.

హైదరాబాద్ శంకరపల్లిలో 200 ఎకరాలు – ఎకరం రూ.50 కోట్లు

తాము రాజకీయాల్లోకి రాకముందు, 1996–1997 ప్రాంతంలోనే హైదరాబాద్ సమీపంలోని శంకరపల్లి మార్గంలో వంశీ ఎకరం లక్ష నుంచి రూ.1.5 లక్షల చొప్పున భారీగా భూములు కొనుగోలు చేశారని నాని వెల్లడించారు. కాలక్రమేణా హైదరాబాద్ నగరం విస్తరించడంతో ప్రస్తుతం అక్కడ ఎకరం భూమి విలువ మార్కెట్లో సుమారు రూ.50 కోట్లకు చేరిందని వివరించారు. ఆ లెక్కన అక్కడ వంశీ పేరిట ఉన్న 200 ఎకరాల భూమి మార్కెట్ విలువ రూ.10వేల కోట్లకు పైమాటేనని ఆయన స్పష్టం చేశారు. వేల కోట్ల అధిపతి అయిన వ్యక్తి చిన్న చిన్న మొత్తాల కోసం అక్రమాలకు పాల్పడతాడా అని ప్రశ్నించారు.

2024 ఎన్నికల అఫిడవిట్‌లో ఈ ఆస్తుల ప్రస్తావనేది?

అయితే కొడాలి నాని చేసిన వ్యాఖ్యలు వల్లభనేని వంశీకి కొత్త న్యాయపరమైన చిక్కులు తెచ్చిపెట్టేలా ఉన్నాయి. 2024 సార్వత్రిక ఎన్నికల్లో గన్నవరం నియోజకవర్గం నుంచి దాఖలు చేసిన ఎన్నికల అఫిడవిట్‌లో వంశీ తన కుటుంబ మొత్తం ఆస్తుల విలువను కేవలం రూ.198.42 కోట్లుగా మాత్రమే పేర్కొన్నారు. అందులో రూ.191.35 కోట్ల స్థిరాస్తులు, రూ.7.06 కోట్ల చరాస్తులు, రూ.14.66 కోట్ల అప్పులను చూపారు. వీటితో పాటు మెర్సిడెస్ బెంజ్ లగ్జరీ కార్లు, 2,900 గ్రాములకు పైగా బంగారు ఆభరణాలు ఉన్నట్లు రికార్డుల్లో పేర్కొన్నారు. కానీ కొడాలి నాని చెప్పిన రూ.10వేల కోట్ల విలువైన 200 ఎకరాల శంకరపల్లి భూముల ప్రస్తావన ఎన్నికల అఫిడవిట్‌లో ఎక్కడా కనిపించకపోవడం గమనార్హం.

దర్యాప్తు కోరుతున్న కూటమి నేతలు – ఎన్నికల సంఘం నిబంధనల ఉల్లంఘన?

కొడాలి నాని చేసిన ఈ ఆస్తుల వ్యాఖ్యలపై కూటమి నేతలు తీవ్రస్థాయిలో విరుచుకుపడ్డారు. 1996లోనే అంత భారీ ఎత్తున భూములు కొనుగోలు చేయడానికి వంశీకి ఎక్కడి నుంచి నిధులు వచ్చాయి, ఆయన ఆదాయ వనరులేమిటి అనే అంశంపై పూర్తిస్థాయి దర్యాప్తు జరపాలని డిమాండ్ చేశారు. అంతేకాకుండా ఎన్నికల సంఘానికి సమర్పించిన అధికారిక అఫిడవిట్‌లో వేల కోట్ల రూపాయల స్థిరాస్తుల వివరాలను దాచిపెట్టి, రాజ్యాంగ వ్యవస్థలను తప్పుదోవ పట్టించినందుకు వల్లభనేని వంశీపై ప్రజాప్రాతినిధ్య చట్టం ప్రకారం క్రిమినల్ కేసులు నమోదు చేయాలని కూటమి వర్గాలు హెచ్చరిస్తున్నాయి.

రాజకీయ కక్ష సాధింపు ఆరోపణలు – లోకల్ బాడీ ఎన్నికల సవాల్

మరోవైపు టీడీపీ ఆఫీస్‌పై దాడి, నకిలీ ఇళ్ల పట్టాలు, బెదిరింపులు, ఎస్సీ ఎస్టీ అట్రాసిటీ మరియు కిడ్నాప్ కేసుల్లో అరెస్టయి అనారోగ్య కారణాలతో బెయిల్‌పై విడుదలైన వంశీ ప్రస్తుతం క్రియాశీలకం అవుతున్నారు. ఈ క్రమంలో వంశీ తర్వాత తానే ప్రభుత్వ టార్గెట్ అని కొడాలి నాని స్వయంగా పేర్కొన్నారు. ఇలాంటి తప్పుడు కేసులకు తాము బెదిరేది లేదని, రాబోయే స్థానిక సంస్థల ఎన్నికల్లో ప్రతి స్థానంలోనూ పోటీకి దిగి విజయమో వీరస్వర్గమో తేల్చుకుంటామని ఆయన సవాలు విసిరారు. ఏది ఏమైనా, మిత్రుడిని కాపాడాలనే ఉద్దేశంతో కొడాలి నాని బయటపెట్టిన ఈ రూ.10వేల కోట్ల ఆస్తుల వ్యవహారం ఇప్పుడు ఏపీ రాజకీయాల్లో వంశీ మెడకు కొత్త ఉచ్చుగా మారేలా కనిపిస్తోంది.