Prajavedhika: ఫోర్జరీ రికార్డుల తో ఆన్ లైన్ లో రిజిస్ట్రేషన్! నాలుగో తరం వారసులు, 80 సం క్రితం భూమి ఎమ్మార్వో సహకారంతో స్వాహా!

• రీ-సర్వే పేరుతో 21 సెంట్లు గల్లంతు..?: కాళ్లరిగేలా తిరుగుతున్నా పట్టించుకోని రెవెన్యూ యంత్రాంగం!

• దశాబ్దాల బండి బాటనే ఆక్రమించేశారు..?: టీడీపీ గ్రీవెన్స్‌లో అనకాపల్లి రైతు ఆవేదన!

• 1950 నాటి పూర్వీకుల ఆస్తులపై తప్పుడు నోటీసులు..?: వేధింపులపై స్పందించిన బాధితుడు!

Prajavedhika: మంగళగిరిలోని తెలుగుదేశం పార్టీ జాతీయ కేంద్ర కార్యాలయంలో 16-09-2026న నిర్వహించిన ప్రజావేదిక కార్యక్రమంలో రాష్ట్రంలోని వివిధ జిల్లాల నుంచి తరలివచ్చిన బాధితులు తమ సమస్యలపై పెద్ద ఎత్తున అర్జీలు అందజేశారు. ఆంధ్రప్రదేశ్ ఇండస్ట్రియల్ డెవలప్‌మెంట్ కార్పొరేషన్ లిమిటెడ్ (APIDCL) చైర్మన్ శ్రీ డేగల ప్రభాకర్ గారు ప్రజల నుంచి నేరుగా వినతులను స్వీకరించి వారి గోడును ఆలకించారు. గత ప్రభుత్వ హయాంలో చోటుచేసుకున్న భూ కబ్జాలు, అధికారుల బాధ్యతారాహిత్యం, రీ-సర్వే తప్పిదాలు మరియు వేధింపులపై బాధితులు ఆధారాలతో సహా మొరపెట్టుకున్నారు.

అనకాపల్లి జిల్లాలో బండి బాటతో సహా భూమి ఆక్రమణ

అనకాపల్లి జిల్లా నర్సీపట్నంకి చెందిన కోట ప్రసాద్ ప్రజావేదికలో అర్జీ సమర్పిస్తూ.. గొలుగొండ మండలం పాకలపాడు గ్రామంలో తనకున్న వ్యవసాయ భూమిలో సుమారు 30 నుంచి 32 సెంట్ల భూమిని గండి నాగ సత్య భాస్కరరావు, గండి చంద్రశేఖరరావు అనే సోదరులు అక్రమంగా తమ భూమిలో కలిపేసుకున్నారని వాపోయారు. 2023లో గత ప్రభుత్వ హయాంలో రీ-సర్వే నెపంతో మండల రెవెన్యూ అధికారులను ప్రలోభపెట్టి, అసలు రీ-సర్వే అధికారి సంతకం లేకుండానే అనధికారిక పద్ధతుల్లో రికార్డులను ఫోర్జరీ చేసి తమ పేర్లతో ఆన్‌లైన్‌లో నమోదు చేయించుకున్నారని వివరించారు.

దశాబ్దాల దారి మూసివేత – అధికారుల నిర్లక్ష్యంపై ఫిర్యాదు

పొలానికి వెళ్లేందుకు దశాబ్దాలుగా ఉన్న 10 అడుగుల ఉమ్మడి ‘బండి బాట’ను సైతం సదరు ఆక్రమణదారులు రెవెన్యూ అధికారుల సహకారంతో తమ సొంత భూమిగా మార్చుకొని రాకపోకలకు తీవ్ర ఆటంకం కలిగిస్తున్నారని కోట ప్రసాద్ పేర్కొన్నారు. రికార్డులను తారుమారు చేసి తమ జీవనాధారమైన దారిని, వ్యవసాయ భూమిని లాక్కున్న వారిపై చట్టపరమైన విచారణ జరిపి తక్షణమే కఠిన చర్యలు తీసుకోవాలని, తమకు న్యాయం చేసి భూమిని, దారిని తిరిగి ఇప్పించాలని చైర్మన్ డేగల ప్రభాకర్‌ను వేడుకున్నారు.

పల్నాడు జిల్లా గురజాలలో 80 ఏళ్ల నాటి భూమి రికార్డుల తొలగింపు

పల్నాడు జిల్లా గురజాల మండలం పల్లెగుంత గ్రామానికి చెందిన పి. లింగమ్మ వినతిపత్రం అందిస్తూ.. తమ గ్రామ పరిధిలోని సర్వే నెం. 489-5-ఎ3లో గల 4.26 ఎకరాల భూమి తమ తాతగారైన దివంగత పెద్ద కోటయ్య స్వార్జితమని తెలిపారు. పెద్ద కోటయ్య తదనంతరం ఆయన కుమారులు (పెద్ద అప్పయ్య, వెంకట రామయ్య, వెంకట గురవయ్య), ప్రస్తుతం మూడో, నాలుగో తరాల వారసులు దాదాపు 80 ఏళ్లుగా ఈ భూమిని సాగు చేసుకుంటున్నామని, దీనికి సంబంధించి రిజిస్టర్డ్ దస్తావేజులు, పట్టాదారు పాసుపుస్తకాలు, ఈసీ, ఆర్‌ఓఆర్, అడంగల్ రికార్డులు, శిస్తు రసీదులు, బ్యాంక్ పంట రుణాల ఆధారాలన్నీ చట్టబద్ధంగా ఉన్నాయని స్పష్టం చేశారు.

రాజకీయ ఒత్తిళ్లతో వెబ్‌ల్యాండ్ నుంచి ఏకపక్షంగా తొలగింపు

అన్ని ఆధారాలు ఉన్నప్పటికీ గత రెండేళ్లుగా గురజాల తహసీల్దార్ రాజకీయ ఒత్తిళ్లకు తలొగ్గి నోటీసులు, ఎంక్వైరీల పేరుతో వేధింపులకు గురిచేస్తున్నారని లింగమ్మ ఆవేదన వ్యక్తం చేశారు. పైగా ఆర్డీవో (RDO) నుంచి స్పష్టమైన ఆదేశాలు ఉన్నప్పటికీ, తహసీల్దార్ రాజకీయ ప్రలోభాలకు లొంగి ఎలాంటి ముందస్తు నోటీసులు ఇవ్వకుండానే ఆన్‌లైన్ వెబ్‌ల్యాండ్ (అడంగల్) నుంచి సదరు 4.26 ఎకరాల వివరాలను ఏకపక్షంగా తొలగించారని ఫిర్యాదు చేశారు. నిబంధనలకు విరుద్ధంగా వ్యవహరించిన అధికారులపై చర్యలు తీసుకుని తమ భూమి రికార్డులను పునరుద్ధరించాలని కోరారు.

బిక్కవోలులో 1950 నాటి పూర్వీకుల ఆస్తులపై తప్పుడు నోటీసులు

తూర్పుగోదావరి జిల్లా బిక్కవోలు మండలం బలభద్రపురం గ్రామానికి చెందిన చింతా డేవిడ్ రాజారత్నం గ్రీవెన్స్‌లో అర్జీ ఇచ్చి విజ్ఞప్తి చేస్తూ.. 1950వ సంవత్సరం నుంచే చట్టబద్ధమైన దస్తావేజులతో కూడిన పూర్వీకుల ఇళ్లు, వ్యవసాయ పొలాలు, ఖాళీ స్థలాలు తమ స్వాధీనంలో ఉన్నాయని పేర్కొన్నారు. అయితే సదరు ఆస్తులు వారివి కావంటూ, అందులోని ఒక స్థలంలో ఉన్న చర్చిని తొలగించాలంటూ జిల్లా కలెక్టరేట్ ద్వారా నోటీసులు జారీ చేశారని వాపోయారు. ఇవి ప్రైవేటు ఆస్తులేనని సర్వేయర్, రెవెన్యూ, పంచాయతీ అధికారులు నిర్ధారించినా కలెక్టరేట్ అధికారులు తప్పును సరిదిద్దుకోకుండా నిర్లక్ష్యంగా వ్యవహరిస్తున్నారని, కక్షపూరితంగా బలవంతపు మతమార్పిడి వంటి తప్పుడు కేసులు బనాయించి జైలుకు పంపి వేధించారని, దీనివల్ల కుటుంబం రోడ్డున పడిందని న్యాయం చేయాలని వేడుకున్నారు.

నూజెండ్లలో రీ-సర్వే తప్పిదం – 21 సెంట్ల భూమి గల్లంతు

పల్నాడు జిల్లా నూజెండ్ల మండలం కంభంపాడు గ్రామానికి చెందిన బోడపాటి చంద్రమౌళి అర్జీ సమర్పిస్తూ.. సర్వే నెంబర్ 115/3 లో తన భార్య బోడపాటి రమాదేవి పేరు మీద గతంలో రికార్డులలో 3.39 ఎకరాలు నమోదై ఉండేదని తెలిపారు. సదరు భూమిని 11-04-1997న వినుకొండ సబ్-రిజిస్ట్రార్ కార్యాలయంలో వాకిరెడ్డి పిచ్చమ్మ వద్ద నుంచి కొనుగోలు చేశామని వివరించారు. అయితే ఇటీవల నిర్వహించిన రీ-సర్వేలో పూర్తి విస్తీర్ణం 3.39 ఎకరాలకు బదులుగా కేవలం 3.18 ఎకరాలకు మాత్రమే ఎల్పీ నెంబర్ కేటాయించి ఆన్‌లైన్ రికార్డుల్లో నమోదు చేశారని, దీనివల్ల 21 సెంట్ల భూమి తగ్గిపోయిందని, వీఆర్వో, సర్వేయర్, తహసీల్దార్ల చుట్టూ తిరిగినా "మీ భూమి అంతే ఉంది" అంటూ బాధ్యతారాహిత్యంగా సమాధానమిస్తున్నారని మొరపెట్టుకున్నారు.

విజయవాడలో 40 ఏళ్ల నాటి అమ్మవారి ఆలయం కబ్జాకు యత్నం

ఎన్టీఆర్ జిల్లా విజయవాడ కె.ఎల్.రావు నగర్‌కు చెందిన దివ్యాంగురాలు జయదుర్గాబాయి వినతిపత్రం అందజేస్తూ.. 40 ఏళ్ల క్రితం తమ తాతగారైన బొందిలి నందగోపాల్ సింగ్ శ్రీ జంబులాంబ దేవి ఆలయాన్ని స్థాపించారని, ఆయన తర్వాత తండ్రి దూబే ఈశ్వర్ ప్రసాద్, ప్రస్తుతం తాను, తల్లి జమునాబాయి కలిసి దశాబ్దాలుగా ఆలయ నిర్వహణ, దసరా ఉత్సవాలు చేస్తున్నామని తెలిపారు. అయితే ఆలయాన్ని హస్తగతం చేసుకునేందుకు స్థానికులైన బొందిలి ప్రవీణ్ సింగ్, జగన్నాధ్ సింగ్, నాగమణిబాయి, జయలక్ష్మీబాయి, జ్యోతి తదితరులు వేధింపులకు గురిచేస్తున్నారని, దాతల సహకారంతో పునర్నిర్మాణం చేపడితే దాడులు చేస్తూ, దివ్యాంగురాలైన తనను, వృద్ధురాలైన తల్లిని చంపేస్తామని బెదిరిస్తున్నారని రక్షణ కల్పించాలని వేడుకున్నారు.

రేణిగుంట నేషనల్ హైవే పరిహారంలో కమిషన్ల దందా – 40% కోత

తిరుపతి జిల్లా రేణిగుంట మండలం కరకంబాడి గ్రామానికి చెందిన గీత గ్రీవెన్స్‌లో అర్జీ ఇచ్చి విజ్ఞప్తి చేస్తూ.. రేణిగుంట-కడప నాలుగు వరుసల జాతీయ రహదారి (NH-716) విస్తరణ పనుల్లో భాగంగా తమ గ్రామ పరిధిలోని సర్వే నెంబర్ 185 లోని నివాస గృహాలు పూర్తిగా తొలగింపునకు గురయ్యాయని తెలిపారు. పంచాయతీ పరిధిలోని అన్ని సర్వే నెంబర్లకు ఒకేసారి నోటిఫికేషన్ ఇచ్చి ఒకే మార్కెట్ విలువను ఖరారు చేసినప్పటికీ, రెవెన్యూ, కలెక్టరేట్ ఎల్.ఏ విభాగం అధికారులకు అడిగినంత కమిషన్ ముట్టజెప్పలేదన్న కారణంతో అధికారులు కక్షగట్టి 2023లో పరిహారం తీసుకున్న వారికంటే తమకు దాదాపు 30% నుంచి 40% వరకు పరిహారంలో కోత విధించారని, అదే ప్రాంతంలో ఇతరులకు ఎక్కువ ఇచ్చి తమకు అన్యాయం చేశారని తెలిపారు.

సామాజిక సమస్యలపై వినతులు & సమస్యల పరిష్కారానికి హామీ

వీటితో పాటు పలువురు లబ్ధిదారులు పింఛన్లు, రేషన్ కార్డులు, ఇళ్ల నిర్మాణ సమస్యల పరిష్కారం కోసం అర్జీలు సమర్పించగా, నిరుద్యోగ యువత ఉద్యోగావకాశాల నిమిత్తం రెస్యూమ్‌లు అందజేశారు. మరికొందరు తీవ్ర అనారోగ్య సమస్యలతో ఇబ్బంది పడుతున్నామని, వైద్య ఖర్చుల కోసం ప్రభుత్వం నుంచి ఆర్థిక తోడ్పాటు అందించాలని కోరారు. ప్రజావేదికలో వచ్చిన ప్రతి అర్జీని క్షుణ్ణంగా పరిశీలించిన APIDCL చైర్మన్ డేగల ప్రభాకర్.. గత ప్రభుత్వ అక్రమాలు, అధికారుల నిర్లక్ష్యంపై విచారణ జరిపించి సంబంధిత ఉన్నతాధికారుల దృష్టికి తీసుకెళ్లి బాధితులందరికీ సత్వర న్యాయం జరిగేలా చూస్తామని స్పష్టమైన భరోసా ఇచ్చారు.