NHAI: రాజధాని రింగ్ రోడ్ మాస్టర్ ప్లాన్‌లో భారీ మార్పులు.. 6,500 కోట్లు ఆదా... NHAI ప్రణాళికలు!

• సర్వీస్ రోడ్డు లేదు, స్పర్ రోడ్డు లేదు: అమరావతి ఓఆర్ఆర్ ప్లాన్ మార్చిన ఎన్హెచ్ఏఐ.
• డబుల్ ఇంజిన్ సర్కార్‌కు పరీక్ష: అమరావతి రింగ్ రోడ్ మార్పులపై ఏపీ సర్కార్ ఆందోళన.
• భవిష్యత్తుకు ముప్పు: ఓఆర్ఆర్ సర్వీస్ రోడ్ల రద్దుతో ట్రాఫిక్ కష్టాలు తప్పవా

NHAI: ఆంధ్రప్రదేశ్ రాజధాని అమరావతి అభివృద్ధిలో అత్యంత కీలకమైన ఔటర్ రింగ్ రోడ్ (ORR) నిర్మాణానికి ప్రారంభ దశలోనే అనుకోని అడ్డంకులు ఎదురవుతున్నాయి. త్వరలోనే భూసేకరణ పూర్తిచేసి పనులు మొదలుపెట్టాలని భావిస్తున్న తరుణంలో, జాతీయ రహదారుల సంస్థ (NHAI) ఈ ప్రాజెక్టు మాస్టర్ ప్లాన్‌లో ఏకపక్షంగా కొన్ని కీలక మార్పులు తీసుకువచ్చింది. రాష్ట్ర ప్రభుత్వ అభిప్రాయం తీసుకోకుండా కేంద్రం చేసిన ఈ సవరణల వల్ల రింగ్ రోడ్ నిర్మాణంలో జాప్యం జరిగే అవకాశం స్పష్టంగా కనిపిస్తోందని రాజకీయ మరియు సామాజిక విశ్లేషకులు భావిస్తున్నారు.

అసలు ప్రణాళిక ప్రకారం అమరావతి చుట్టూ సుమారు 190 కిలోమీటర్ల మేర 12 వరుసల హై స్పీడ్ రహదారిని నిర్మించాల్సి ఉంది. భవిష్యత్తులో మెట్రో రైలు ఏర్పాటుకు కూడా వీలుగా, హైవేకు ఇరువైపులా (లోపల, బయట) సర్వీస్ రోడ్లు ఉండేలా దీనిని డిజైన్ చేశారు. ఈ మొత్తం ప్రాజెక్టు అంచనా వ్యయం 38,450 కోట్ల రూపాయలు కాగా, దీనిని పూర్తిగా కేంద్ర ప్రభుత్వమే భరించాలని నిర్ణయించారు. దీనికి ప్రతిగా రాష్ట్ర ప్రభుత్వం 1,200 కోట్ల రూపాయల మేర జీఎస్టీ మినహాయింపులు ఇవ్వడానికి అంగీకరించింది, అలాగే భూసేకరణకు అవసరమైన 6,500 కోట్లు కూడా ఈ బడ్జెట్ లోనే కలిపి అంచనా వేశారు.

అయితే, ప్రాజెక్టు వ్యయాన్ని తగ్గించుకునే ఉద్దేశ్యంతో ఎన్హెచ్ఏఐ (NHAI) ఇప్పుడు రెండు ప్రధానమైన కోతలను ప్రతిపాదించింది. మొదటిది, ఔటర్ రింగ్ రోడ్‌కు రెండు వైపులా సర్వీస్ రోడ్లు నిర్మించాల్సి ఉండగా, ఇప్పుడు కేవలం లోపలి వైపు (ఇన్ సైడ్) మాత్రమే సర్వీస్ రోడ్డు నిర్మించి, బయటి వైపు (అవుట్ సైడ్) సర్వీస్ రోడ్డును రద్దు చేస్తూ సవరణలు చేశారు. రెండవది, తెనాలి పట్టణాన్ని మరియు ఎన్హెచ్-16 ని అమరావతి కోర్ క్యాపిటల్ కు కలుపుతూ ప్రతిపాదించిన 17 కిలోమీటర్ల ఆరు వరుసల 'స్పర్ రోడ్' నిర్మాణాన్ని కూడా ఎన్హెచ్ఏఐ తాజా ప్రతిపాదనలో తొలగించింది.

ఎన్హెచ్ఏఐ చేసిన ఈ కోతల వల్ల కేంద్రానికి సుమారు 6,500 కోట్ల రూపాయలు ఆదా అవుతాయి, ప్రాజెక్ట్ వ్యయం 32,000 కోట్లకు తగ్గుతుంది. కానీ, దీనివల్ల అమరావతి భవిష్యత్తుకు తీవ్ర నష్టం వాటిల్లుతుందని రాష్ట్ర ప్రభుత్వం ఆందోళన చెందుతోంది. స్పర్ రోడ్ లేకపోవడం వల్ల తెనాలి, రేపల్లె, మచిలీపట్నం ప్రాంతాల ప్రజలకు క్యాపిటల్ తో కనెక్టివిటీ దెబ్బతింటుంది. 2047 నాటి అవసరాలను దృష్టిలో ఉంచుకుని ఈ ప్రాజెక్టును డిజైన్ చేయగా, ఇప్పుడు బయటి సర్వీస్ రోడ్డు నిర్మించకపోతే, భవిష్యత్తులో హైదరాబాద్ ఔటర్ రింగ్ రోడ్ కు ఎదురవుతున్న ట్రాఫిక్ సమస్యలే అమరావతికి కూడా వస్తాయని, అప్పుడు సర్వీస్ రోడ్ల నిర్మాణం అత్యంత వ్యయ ప్రయాసలతో కూడుకున్నది అవుతుందని నిపుణులు హెచ్చరిస్తున్నారు.

ఈ సవరణలపై రాష్ట్ర ప్రభుత్వం తీవ్ర అసంతృప్తితో ఉంది. రాష్ట్ర ముఖ్యమంత్రి నారా చంద్రబాబు నాయుడు గతంలోనే కేంద్ర మంత్రి నితిన్ గడ్కరీని కలిసి ప్రాజెక్టును ఎలాంటి మార్పులు లేకుండా యధాతథంగా ఆమోదించాలని కోరారు. ఇప్పుడు ఏకపక్షంగా మళ్ళీ ఈ కుదింపుల సమస్య రావడంతో, ఎన్డిఏ కూటమి ప్రభుత్వంలోని 'డబుల్ ఇంజిన్ సర్కార్' ఈ సమస్యను ఎలా పరిష్కరిస్తుందనేది ఆసక్తికరంగా మారింది. పాత డిజైన్ ప్రకారమే ప్రాజెక్టును ఆమోదించి, భూసేకరణకు అవసరమైన 6,500 కోట్ల నిధులు కేంద్రం వెంటనే సమకూర్చాలని రాష్ట్ర ప్రభుత్వం ముమ్మరంగా సంప్రదింపులు జరుపుతోంది.