Nimmala Ramanaidu: రెండేళ్ల కూటమి పాలనకు ప్రజల బ్రహ్మరథం.. మంత్రి నిమ్మల రామానాయుడు కీలక వ్యాఖ్యలు!

రాజమండ్రిలో జరిగిన కార్యక్రమంలో వైసీపీపై విమర్శలు.. అభివృద్ధి, సంక్షేమానికి సమ ప్రాధాన్యత ఇస్తున్నామని వెల్లడి..

కూటమి పాలనపై ప్రజల్లో సంతృప్తి ఉంది: మంత్రి నిమ్మల..

తూర్పుగోదావరి జిల్లా రాజమండ్రిలో కూటమి ప్రభుత్వం రెండేళ్ల పాలన సందర్భంగా నిర్వహించిన కార్యక్రమంలో రాష్ట్ర జలవనరుల శాఖ మంత్రి నిమ్మల రామానాయుడు పాల్గొన్నారు. అభివృద్ధి, సంక్షేమ పథకాలకు సమాన ప్రాధాన్యత ఇస్తూ కూటమి ప్రభుత్వం ముందుకు సాగుతోందని ఆయన తెలిపారు.

“రెండేళ్ల నమ్మకం, అభివృద్ధి, సంక్షేమం” కార్యక్రమంలో మాట్లాడిన మంత్రి.. కూటమి ప్రభుత్వ పాలనపై ప్రజలు సంతృప్తిగా ఉన్నారని, పలు సర్వేలు కూడా ప్రజల మద్దతును సూచిస్తున్నాయని పేర్కొన్నారు.

వైసీపీ అధినేత జగన్‌పై విమర్శలు చేసిన మంత్రి రామానాయుడు.. అభివృద్ధికి అడ్డంకులు సృష్టించేందుకు కుట్రలు చేస్తున్నారని ఆరోపించారు. ప్రతిరోజూ అసత్య ప్రచారాలతో ప్రజలను తప్పుదోవ పట్టించే ప్రయత్నాలు జరుగుతున్నాయని అన్నారు. తప్పుడు ప్రచారాల పట్ల ప్రజలు అప్రమత్తంగా ఉండాలని ఆయన సూచించారు.

గత ప్రభుత్వ పాలనను ప్రస్తావించిన మంత్రి.. ఒక్క అవకాశం ఇవ్వాలని కోరడంతో ప్రజలు ఐదేళ్ల పాటు అధికారం ఇచ్చారని, కానీ పాలన ప్రజలకు దూరంగా సాగిందని విమర్శించారు. కక్షలు, వివక్ష, నియంతృత్వ ధోరణులతో పాలన సాగిందని ఆరోపించారు. ఐదేళ్ల పాలనకు, రెండేళ్ల కూటమి పాలనకు ఉన్న తేడాను ప్రజలు గమనించాలని కోరారు.

అధికారం కోల్పోయిన తర్వాత వైసీపీ పరిస్థితి బలహీనంగా మారిందని, పార్టీని నిలబెట్టుకునేందుకు అనేక మార్గాలను అనుసరిస్తోందని మంత్రి వ్యాఖ్యానించారు. 2029 ఎన్నికల్లో ఆ పార్టీకు ప్రజలు తగిన సమాధానం ఇస్తారని అన్నారు.

వైసీపీపై తీవ్ర ఆరోపణలు చేస్తూ.. రౌడీ షీటర్లు, బ్లేడ్ బ్యాచ్‌లు, గంజాయి బ్యాచ్‌లతో నిండిన పార్టీగా విమర్శించారు. బెట్టింగ్ వ్యవహారంతో సంబంధం ఉన్న వ్యక్తి కుటుంబాన్ని పరామర్శించడం, విగ్రహం ఏర్పాటు చేయడం వంటి అంశాలను ప్రస్తావిస్తూ రాజకీయ లబ్ధి కోసం ఇలాంటి చర్యలు చేస్తున్నారని ఆరోపించారు.

ఉద్యోగాలు, డీఎస్సీ అంశాలపై కూడా మంత్రి స్పందించారు. గతంలో ప్రతి ఏడాది డీఎస్సీ, మెగా డీఎస్సీ అంటూ హామీలు ఇచ్చినా ఒక్క టీచర్ పోస్టు కూడా భర్తీ చేయలేదని విమర్శించారు. ప్రస్తుతం కూటమి ప్రభుత్వం మెగా డీఎస్సీ ద్వారా 16,300 పోస్టుల భర్తీ చేపడుతుంటే దానిపై కూడా విమర్శలు చేయడం సరికాదన్నారు.

అలాగే గతంలో జాబ్ క్యాలెండర్ పేరుతో ప్రకటనలు చేసినా అమలు చేయలేదని ఆరోపించారు. కూటమి ప్రభుత్వం యువతకు అవకాశాలు కల్పించేందుకు చర్యలు తీసుకుంటోందని తెలిపారు.

కులాల మధ్య విభేదాలు సృష్టించే ప్రయత్నాలు చేస్తున్నారని మంత్రి ఆరోపించారు. గతంలో డీఎస్పీల నియామకాలపై వైసీపీ చేసిన ప్రచారం వాస్తవం కాదని, అధికారంలోకి వచ్చిన తర్వాత వాస్తవాలు బయటపడ్డాయని అన్నారు.

2024 ఎన్నికల్లో ప్రజలు ఇచ్చిన తీర్పు ఐదేళ్ల పాలనపై వారి అభిప్రాయాన్ని ప్రతిబింబించిందని, రాబోయే రోజుల్లో కూడా ప్రజలు అభివృద్ధి, సంక్షేమాన్ని కోరుకునే ప్రభుత్వానికే మద్దతు ఇస్తారని మంత్రి పేర్కొన్నారు.

కూటమి ప్రభుత్వం అమలు చేస్తున్న సంక్షేమ కార్యక్రమాలు, అభివృద్ధి పనులను కూడా మంత్రి వివరించారు. ఈ కార్యక్రమంలో మంత్రి కందుల దుర్గేష్‌తో పాటు కూటమి పార్టీ ఎమ్మెల్యేలు, నాయకులు, కార్యకర్తలు పెద్ద సంఖ్యలో పాల్గొన్నారు.