ఆంధ్రప్రదేశ్‌లో క్వాంటం టెక్నాలజీ రంగంలో కెరీర్‌లు ప్రారంభించాలని ఆశపడుతున్న యువతకు శుభవార్త. విశాఖపట్నంలో నిర్వహించిన CII పార్ట్‌నర్‌షిప్ సమ్మిట్–2025లో రాష్ట్ర నైపుణ్యాభివృద్ధి సంస్థ (APSSDC) అంతర్జాతీయ స్థాయి సంస్థలతో కీలక భాగస్వామ్యాన్ని ఏర్పాటు చేసింది. ఈ ఒప్పందం ద్వారా రాష్ట్రంలో క్వాంటం టెక్నాలజీ నైపుణ్యాల పెంపుకు కొత్త దారులు తెరుచుకున్నాయి.
ఈ భాగస్వామ్యంలో అమెరికాకు చెందిన వాషింగ్టన్ ఇన్స్టిట్యూట్ ఫర్ STEM, ఏంట్రప్రెన్యూర్షిప్ & రీసెర్చ్ (WISER), కుబిటెక్ స్మార్ట్ సొల్యూషన్స్, క్యూక్రిషి క్వాంటం వంటి ప్రముఖ సంస్థలు కూడా చోటు దక్కించుకున్నాయి. వీటి సహకారంతో ఆంధ్రప్రదేశ్ యువతకు ప్రపంచస్థాయి శిక్షణ, ఆధునిక ప్రయోగశాలల అనుభవం, పరిశ్రమ స్థాయి జ్ఞానం అందించనున్నట్లు అధికారులు తెలిపారు.
ప్రస్తుతం దేశవ్యాప్తంగా క్వాంటం సాంకేతికత రంగంలో అవకాశాలు వేగంగా పెరుగుతున్న నేపథ్యంలో ఈ కార్యక్రమం రాష్ట్రానికే కాదు దేశానికి కూడా ఎంతో ప్రాముఖ్యమైనదిగా కనిపిస్తోంది. ఈ భాగస్వామ్యంతో రాష్ట్రంలో 50,000 మందికి పైగా విద్యార్థులు, పరిశోధకులు, పరిశ్రమల నిపుణులు లాభం పొందనున్నారు.
వర్చువల్ ల్యాబ్‌ల ద్వారా క్వాంటం కంప్యూటింగ్, క్వాంటం కమ్యూనికేషన్, క్వాంటం సెక్యూరిటీ వంటి కీలక రంగాల్లో ప్రత్యక్ష అనుభవం కల్పించేందుకు ప్రణాళిక రూపొందించారు. గతంలో ఈ రంగాల్లో శిక్షణ పొందేందుకు విదేశాలకు వెళ్లాల్సిన అవసరం ఉండేది. ఇప్పుడు అదే స్థాయి శిక్షణలు రాష్ట్రంలోనే అందుబాటులోకి రావడం వినూత్న పరిణామంగా భావిస్తున్నారు.
అమరావతి క్వాంటం వ్యాలీ అభివృద్ధికి కూడా ఈ భాగస్వామ్యం బలంగా తోడ్పడనుంది. ప్రభుత్వం ఇప్పటికే అమరావతిని గ్లోబల్ టాలెంట్ హబ్‌గా తీర్చిదిద్దేందుకు చర్యలు చేపట్టిన విషయం తెలిసిందే. ఈ కొత్త ఒప్పందం ఆ లక్ష్యాన్ని మరింత ముందుకు తీసుకెళుతుందని నిపుణులు అభిప్రాయపడుతున్నారు.
క్వాంటం టెక్నాలజీ ప్రపంచవ్యాప్తంగా వేగంగా అభివృద్ధి చెందుతున్న రంగం కావడంతో భవిష్యత్‌లో అధిక వేతనాలు పరిశోధన అవకాశాలు యువతకు అందుబాటులోకి రానున్నాయి. ఈ రంగంలో ముందుగా శిక్షణ పొందిన విద్యార్థులకు ప్రపంచ మార్కెట్లో డిమాండ్ మరింత పెరగనుంది.
రాష్ట్రంలోని ప్రతిభావంతులైన యువత సాంకేతిక రంగంలో ముందంజలో నిలవాలనే ప్రభుత్వ లక్ష్యానికి ఈ భాగస్వామ్యం బలమైన మద్దతు ఇస్తోంది. ప్రపంచ స్థాయి శిక్షణతో పాటు, పరిశోధన అవకాశాలు, ఉద్యోగ మార్గాలు తెరుచుకోవడం ఆంధ్రప్రదేశ్‌ను వచ్చే దశాబ్దంలో క్వాంటం టెక్నాలజీ కేంద్రంగా నిలపగలదని నిపుణులు అంచనా వేస్తున్నారు.
