రైల్వే రిక్రూట్మెంట్ బోర్డు (RRB) గ్రూప్–డి పరీక్షలకు సంబంధించిన కొత్త తేదీలను విడుదల చేసింది. మొదట ఈ పరీక్షలు నవంబర్ 17 నుంచి ప్రారంభం కావాల్సి ఉండగా, నియామక ప్రక్రియపై కోర్టు కేసు రావడంతో పరీక్షలు వాయిదా పడ్డాయి. కోర్టు తాజా ఆదేశాల ఆధారంగా ఆర్ఆర్బీ ఇప్పుడు సవరించిన షెడ్యూల్ను ప్రకటించింది. కొత్త షెడ్యూల్ ప్రకారం, పరీక్షలు 2025 నవంబర్ 27 నుంచి 2026 జనవరి 16 వరకు జరగనున్నాయి.
పరీక్షలకు హాజరయ్యే అభ్యర్థులు తమ పరీక్ష నగరం, తేదీ వంటి వివరాలను తెలుసుకోవడానికి ‘సిటీ స్లిప్’ను ఆర్ఆర్బీ బుధవారం నుండి అందుబాటులో ఉంచనుంది. ఎస్సీ, ఎస్టీ అభ్యర్థులకు ఉచిత ప్రయాణ సర్టిఫికెట్లు కూడా సిటీ స్లిప్తో పాటు డౌన్లోడ్ చేసుకునే అవకాశం ఉంటుంది. అయితే అసలు అడ్మిట్ కార్డులు మాత్రం పరీక్షకు నలుగురు రోజుల ముందే విడుదల అవుతాయి. ఉదాహరణకు, నవంబర్ 27న పరీక్ష ఉన్నవారు నవంబర్ 23 లేదా 24 నుంచి హాల్ టికెట్ డౌన్లోడ్ చేసుకోవచ్చు.
అభ్యర్థులు పరీక్షకు హాజరయ్యే సమయంలో ఆధార్ కార్డు లేదా ఇ-వెరిఫైడ్ ఆధార్ ప్రింట్ తప్పనిసరిగా తీసుకురావాలి. పరీక్ష కేంద్రాల్లో ఆధార్–లింక్డ్ బయోమెట్రిక్ వెరిఫికేషన్ చేస్తారు. దరఖాస్తు సమయంలో ఆధార్ ధృవీకరణ చేయని అభ్యర్థులు rrbapply.gov.in వెబ్సైట్లో ముందుగానే ఆధార్ వెరిఫికేషన్ పూర్తి చేసుకోవాలని ఆర్ఆర్బీ సూచించింది. ఆధార్ అన్లాక్ అయ్యి ఉండడం కూడా తప్పనిసరి అని స్పష్టం చేసింది.
పరీక్ష కంప్యూటర్ ఆధారిత (CBT) విధానంలో ఉంటుంది. మొత్తం 90 నిమిషాల పాటు జరిగే ఈ పరీక్షలో 100 ప్రశ్నలు ఉంటాయి. జనరల్ సైన్స్ 25, మ్యాథ్స్ 25, రీజనింగ్ 30, కరెంట్ అఫైర్స్ 20 ప్రశ్నలుగా విభజించారు. ప్రతి తప్పు సమాధానానికి మూడో వంతు నెగెటివ్ మార్క్ ఉంటుంది. తుది మార్కుల లెక్కింపులో నార్మలైజేషన్ విధానాన్ని ఆర్ఆర్బీ అనుసరిస్తుంది.
పరీక్షలో ఉత్తీర్ణులైన అభ్యర్థుల్లో ఖాళీల సంఖ్యకు మూడు రెట్లు సమానమైన వారిని ఫిజికల్ ఎఫిషియెన్సీ టెస్ట్ (PET) కోసం ఎంపిక చేస్తారు. ఈ పరీక్షల తర్వాత మాత్రమే తుది ఎంపిక జరుగుతుంది. ఈ సవరించిన షెడ్యూల్తో పరీక్షలపై ఉన్న అనుమానాలు తొలగిపోయాయని, అభ్యర్థులు సన్నద్ధతను కొనసాగించాలని అధికారులు సూచించారు.
