తెలుగు సినీ ప్రేక్షకులకు వచ్చే ఏడాది సంక్రాంతి నిజంగా పండగగా మారబోతోంది. ఎందుకంటే ఈసారి ఏకంగా ఏడు పెద్ద సినిమాలు ఒకేసారి బరిలోకి దిగుతున్నాయి. టాలీవుడ్ మాత్రమే కాదు, కోలీవుడ్ నుంచి కూడా స్టార్ హీరోల మూవీస్ ఇదే సమయంలో థియేటర్లలో దుమ్మురేపేందుకు సిద్ధమవుతున్నాయి. సంక్రాంతి సెలవులు, వీకెండ్లు వరుసగా ఉండటంతో నిర్మాతలు జనవరి 9వ తేదీని కచ్చితమైన లక్ష్యంగా పెట్టుకున్నారు.
ప్రభాస్ నటిస్తున్న ది రాజా సాబ్ సినిమా సంక్రాంతి మొదటి పెద్ద రిలీజ్గా నిలుస్తోంది. ఇది రొమాంటిక్ హారర్–కామెడీగా తెరకెక్కుతుండటంతో పాటు, కల్కి 2898 AD తర్వాత ప్రభాస్ కనిపించే తదుపరి మూవీ కావడంతో భారీ అంచనాలు ఉన్నాయి. ఇదే సమయంలో చిరంజీవి – అనిల్ రావిపూడి కాంబినేషన్లో వచ్చే మన శంకర వరప్రసాద్ గారు కూడా భారీ హైప్ సృష్టిస్తోంది. ఈ సినిమాలో నయనతార హీరోయిన్గా, వెంకటేశ్ అతిథి పాత్రలో కనిపించడం అదనపు ఆకర్షణ.
రవితేజ నటిస్తున్న భర్త మహాశయులకు విజ్ఞప్తి కూడా సంక్రాంతి రేసుకు సిద్ధమవుతోంది. ఇది ఫ్యామిలీ ఎంటర్టైనర్ గా వస్తోంది. మరోవైపు, నవీన్ పొలిశెట్టి నటించిన అనగనగా ఒక రాజు కూడా చాలా రోజులుగా పెండింగ్లో ఉండి చివరకు సంక్రాంతినే ఎంచుకుంది. భారీ సినిమాల మధ్య ఇది ఎలా నిలబడుతుందో చూడాలి. శర్వానంద్ నటించిన నారి నారి నడుమ మురారి కూడా ఈ పండుగ బరిలో ఉంది.
తమిళ స్టార్ దళపతి విజయ్ తన రాజకీయ ప్రయాణానికి ముందు నటించిన చివరి చిత్రం జన నాయగన్ జనవరి 9న రిలీజ్ కానుంది. ఇది పొలిటికల్ యాక్షన్ థ్రిల్లర్ కావడంతో తమిళనాడులో భారీ అంచనాలు ఉన్నాయి. పూజా హెగ్డే, బాబీ డియోల్ కీలక పాత్రలు పోషిస్తున్నారు. అదే సమయంలో సుధా కొంగర దర్శకత్వంలో శివకార్తికేయన్ నటించిన పరాశక్తి కూడా జనవరి 14న ప్రేక్షకుల ముందుకు రాబోతోంది. 1965లో జరిగిన యాంటీ-హిందీ ఉద్యమాల నేపథ్యంలో దీనిని రూపొందించారు.
మొత్తం మీద, వచ్చే సంక్రాంతి బాక్సాఫీసు వద్ద అసలు పోరాటం జరగనుంది. స్టార్ హీరోల సినిమాలు వరుసగా థియేటర్లకు రావడంతో ప్రేక్షకులకు ఎంటర్టైన్మెంట్ పండుగ ఖాయం. ఏ సినిమా హిట్ అవుతుంది? ఎవరి సినిమా రికార్డులు బద్దలు కొడుతుంది? అన్న ఆసక్తి ఇప్పటికే మొదలైంది.
