భారత నౌకాదళానికి మరింత బలం.. రూ.53,866 కోట్లతో 8 అత్యాధునిక యుద్ధనౌకలు!

Indian Navy 8 New Warships: భారత నౌకాదళాన్ని మరింత శక్తిమంతంగా తీర్చిదిద్దే దిశగా కేంద్ర ప్రభుత్వం కీలక నిర్ణయం తీసుకుంది. సముద్ర జలాల్లో దేశ రక్షణ సామర్థ్యాలను పెంచే లక్ష్యంతో ఏకంగా 8 అత్యాధునిక నెక్స్ట్ జనరేషన్ కార్వెట్ (Next Generation Corvette) యుద్ధనౌకల నిర్మాణానికి భారీ ఒప్పందం కుదుర్చుకుంది. ఇందుకోసం రూ.53,866.50 కోట్లను వెచ్చించనుంది. ఈ మేరకు ఢిల్లీలో రక్షణ మంత్రిత్వ శాఖ అధికారికంగా ఒప్పంద పత్రాలపై సంతకాలు చేసింది.

Ch Rajasekhar

Published November 2, 2026, 2:49 PM IST

2 min read

8 New Warships for Indian Navy

భారత నౌకాదళ బలోపేతానికి కేంద్రం రూ.53,866.50 కోట్లతో ఒప్పందం కుదుర్చుకుంది.
GRSE సంస్థ 5, గోవా షిప్‌యార్డ్ 3 యుద్ధనౌకలను తయారు చేయనున్నాయి.

Indian Navy 8 New Warships: భారత నౌకాదళాన్ని మరింత శక్తిమంతంగా తీర్చిదిద్దే దిశగా కేంద్ర ప్రభుత్వం కీలక నిర్ణయం తీసుకుంది. సముద్ర జలాల్లో దేశ రక్షణ సామర్థ్యాలను పెంచే లక్ష్యంతో ఏకంగా 8 అత్యాధునిక నెక్స్ట్ జనరేషన్ కార్వెట్ (Next Generation Corvette) యుద్ధనౌకల నిర్మాణానికి భారీ ఒప్పందం కుదుర్చుకుంది. ఇందుకోసం రూ.53,866.50 కోట్లను వెచ్చించనుంది. ఈ మేరకు ఢిల్లీలో రక్షణ మంత్రిత్వ శాఖ అధికారికంగా ఒప్పంద పత్రాలపై సంతకాలు చేసింది.

రెండు సంస్థలకు నిర్మాణ బాధ్యతలు

ఈ ప్రాజెక్టులో భాగంగా ప్రభుత్వ రంగానికి చెందిన రెండు ప్రముఖ నౌకా నిర్మాణ సంస్థలకు బాధ్యతలు అప్పగించారు. గార్డెన్ రీచ్ షిప్‌బిల్డర్స్ అండ్ ఇంజినీర్స్ (GRSE) ఐదు యుద్ధనౌకలను నిర్మించనుండగా.. గోవా షిప్‌యార్డ్ లిమిటెడ్ (GSL) మరో మూడు నౌకల తయారీ చేపట్టనుంది. మొత్తం ఎనిమిది నౌకలను అత్యాధునిక సాంకేతిక పరిజ్ఞానంతో రూపొందించనున్నారు.

మూడు విభాగాల్లో ఏకకాలంలో దాడులు

ఈ కొత్త తరం కార్వెట్ల ప్రత్యేకత వాటి బహుముఖ యుద్ధ సామర్థ్యం. గగనతలం, సముద్ర ఉపరితలం, సముద్ర గర్భంలో ఎదురయ్యే ముప్పులను ఏకకాలంలో ఎదుర్కొనేలా వీటిని అభివృద్ధి చేయనున్నారు. శత్రు దేశాల నుంచి వచ్చే వివిధ రకాల దాడులను గుర్తించి, సమర్థంగా తిప్పికొట్టే అధునాతన వ్యవస్థలను వీటిలో ఏర్పాటు చేయనున్నారు. దీంతో భారత నౌకాదళ నిఘా, రక్షణ, దాడి సామర్థ్యాలు మరింత మెరుగుపడనున్నాయి.

దేశీయ పరిశ్రమలకు భారీ ప్రోత్సాహం

కేంద్ర ప్రభుత్వం ప్రతిష్ఠాత్మకంగా చేపట్టిన 'మేక్ ఇన్ ఇండియా' కార్యక్రమంలో భాగంగా ఈ యుద్ధనౌకల నిర్మాణం పూర్తిగా స్వదేశీ డిజైన్, సాంకేతిక పరిజ్ఞానానికి ప్రాధాన్యమిస్తూ చేపట్టనున్నారు. ఈ ప్రాజెక్టు వల్ల దేశీయ నౌకా నిర్మాణ రంగానికి కొత్త ఊపు లభించడంతో పాటు అనుబంధ పరిశ్రమలకు కూడా భారీగా అవకాశాలు ఏర్పడనున్నాయి.

లక్షల మందికి ఉపాధి అవకాశాలు

ఈ భారీ ప్రాజెక్టు ద్వారా ప్రత్యక్షంగా, పరోక్షంగా ఉపాధి అవకాశాలు పెరగనున్నాయి. నౌకా నిర్మాణ సంస్థల్లో సుమారు 72 లక్షల పని దినాలు, సూక్ష్మ, చిన్న, మధ్యతరహా పరిశ్రమల్లో (MSMEs) సుమారు 4.6 కోట్ల పని దినాల మేరకు ఉపాధి లభించనున్నట్లు రక్షణ మంత్రిత్వ శాఖ వెల్లడించింది. మొత్తంగా ఈ ఒప్పందం భారత నౌకాదళ బలోపేతంతో పాటు దేశీయ రక్షణ ఉత్పత్తి రంగానికి కూడా కీలక ముందడుగుగా నిలవనుంది.