Pregnancy Care: గర్భిణీలు ఫోన్ వాడుతున్నారా? అయితే ఈ జాగ్రత్తలు మీ కోసమే!

Mobile Phone Use During Pregnancy: నేటి కాలంలో స్మార్ట్‌ఫోన్ అనేది మన  జీవితంలో ఒక భాగం అయిపోయింది. పొద్దున లేచింది మొదలు రాత్రి పడుకునే వరకు చేతిలో ఫోన్ లేకపోతే ఏదో వెలితిగా అనిపిస్తుంది. అయితే, గర్భవతులు ఫోన్ వాడటం విషయంలో రకరకాల ప్రచారాలు సోషల్ మీడియాలో కనిపిస్తుంటాయి. ఫోన్ వాడితే పుట్టబోయే బిడ్డపై ప్రభావం పడుతుందని కొందరు, అసలు వాడకూడదని మరికొందరు భయపెడుతుంటారు.  నిపుణుల అభిప్రాయం ప్రకారం, ఫోన్‌ను పూర్తిగా పక్కన పెట్టాల్సిన అవసరం లేదు, కాకపోతే వాడే పద్ధతిలో కొన్ని మార్పులు చేసుకోవడం చాలా ముఖ్యం.

ముందుగా రేడియేషన్ గురించి మాట్లాడుకుంటే, స్మార్ట్‌ఫోన్ల నుంచి వచ్చే రేడియో ఫ్రీక్వెన్సీ వల్ల బిడ్డకు నేరుగా హాని జరుగుతుందని చెప్పడానికి ఇప్పటివరకు ఎలాంటి బలమైన శాస్త్రీయ ఆధారాలు లేవు. అయితే, గర్భిణీలు ఫోన్‌ను తమ పొత్తికడుపు (అబ్డొమెన్) దగ్గర పెట్టుకోకుండా జాగ్రత్త పడాలి. కాల్స్ మాట్లాడేటప్పుడు ఫోన్‌ను నేరుగా చెవి దగ్గర ఉంచుకోకుండా, ఇయర్‌ఫోన్స్ లేదా స్పీకర్ మోడ్ వాడటం వల్ల రేడియేషన్ ప్రభావాన్ని గణనీయంగా తగ్గించవచ్చు. ముఖ్యంగా సిగ్నల్ తక్కువగా ఉన్నప్పుడు ఫోన్ వాడకపోవడమే మంచిది, ఎందుకంటే ఆ సమయంలో రేడియేషన్ ఎక్కువగా ఉంటుంది.

రేడియేషన్ కంటే కూడా ఫోన్ వాడేటప్పుడు మనం కూర్చునే లేదా పడుకునే భంగిమ  వల్ల ఎక్కువ సమస్యలు వస్తాయి. గంటల తరబడి తల వంచి ఫోన్ చూడటం వల్ల మెడ నొప్పి, వెన్నునొప్పి వంటి ఇబ్బందులు ఎదురవుతాయి. ప్రెగ్నెన్సీ సమయంలో ఇప్పటికే శరీరంపై బరువు పెరుగుతుంది కాబట్టి, ఫోన్ వాడేటప్పుడు వెన్ను నిటారుగా ఉండేలా చూసుకోవాలి. అలాగే, సోషల్ మీడియాలో వచ్చే నెగటివ్ వార్తలు లేదా వీడియోలు చూడటం వల్ల అనవసరమైన ఆందోళన, మానసిక ఒత్తిడి పెరిగే అవకాశం ఉంది. కాబట్టి అవసరమైన పనులకు మాత్రమే మొబైల్‌ను పరిమితం చేయడం మంచిది.

మరో ముఖ్యమైన విషయం 'నిద్ర'. గర్భిణీ స్త్రీలకు ప్రశాంతమైన నిద్ర చాలా అవసరం. కానీ రాత్రిపూట లైట్లు ఆపేసి ఫోన్ చూడటం వల్ల అందులో నుంచి వచ్చే 'బ్లూ లైట్' మన మెదడులోని మెలోటినిన్ అనే హార్మోన్‌ను దెబ్బతీస్తుంది. దీనివల్ల నిద్రలేమి సమస్యలు తలెత్తుతాయి. కాబట్టి నిద్రపోవడానికి కనీసం ఒక గంట ముందే ఫోన్‌ను దూరంగా పెట్టే అలవాటు చేసుకోవాలి. ఫోన్ చూడటానికి బదులుగా మంచి పుస్తకాలు చదవడం లేదా ప్రశాంతమైన సంగీతం వినడం వల్ల తల్లికి, బిడ్డకు ఇద్దరికీ మేలు జరుగుతుంది.

 టెక్నాలజీకి ఎంత ప్రాధాన్యత ఇస్తారో, మీ ఆహారం హ వ్యాయామంపై కూడా అంతే శ్రద్ధ పెట్టాలి. సరైన ప్రోటీన్లు, ఐరన్  కాల్షియం ఉన్న ఆహారం తీసుకోవడంతో పాటు రోజూ 20 నుండి 30 నిమిషాల పాటు తేలికపాటి వాకింగ్ చేయడం వల్ల రక్త ప్రసరణ బాగుంటుంది. రోజూ కనీసం 3-4 లీటర్ల నీరు తాగుతూ శరీరాన్ని హైడ్రేటెడ్‌గా ఉంచుకోవాలి. ఏ చిన్న ఆరోగ్య సమస్య లేదా సందేహం ఉన్నా ఇంటర్నెట్‌లో వెతకడం కంటే, మీ డాక్టర్‌ను సంప్రదించి సలహా తీసుకోవడమే అన్నిటికంటే సురక్షితమైన మార్గం.