Zomato: పావ్ భాజీ ఆర్డర్ కి బీడీ లు ఫ్రీ! బెంగళూరు జొమాటో షాక్! సోషల్ మీడియా లో వైరల్!

పావ్ భాజీతో పాటు బీడీ డెలివరీ.. సోషల్ మీడియాలో వైరల్ అయిన ఘటన..

పావ్ భాజీ ఆర్డర్‌లో బీడీ.. స్పందించిన జొమాటో, రూ.100 కూపన్..

బెంగళూరు: ఆన్‌లైన్‌లో ఆహారం ఆర్డర్ చేస్తే రుచికరమైన భోజనం ఇంటి వద్దకు వస్తుందని ఆశిస్తాం. కానీ బెంగళూరుకు చెందిన ఓ వ్యక్తికి మాత్రం పావ్ భాజీ ఆర్డర్‌తో ఊహించని ‘ఫ్రీ గిఫ్ట్’ వచ్చింది. ఉల్లిపాయలు, చట్నీలతో పాటు ఓ బీడీ కూడా ప్యాక్‌లో కనిపించింది. దీంతో అతడు ఈ విషయాన్ని సోషల్ మీడియాలో పంచుకోవడంతో ఘటన వైరల్‌గా మారింది.

ఉల్లిపాయల మధ్య కాలిపోయిన బీడీ
లింక్డ్‌ఇన్ యూజర్ ప్రియమ్ తహబిల్దార్ ఈ ఘటనను సోషల్ మీడియాలో వెల్లడించారు. జొమాటోలో పావ్ భాజీ ఆర్డర్ చేసినట్లు తెలిపారు. ఆర్డర్‌తో వచ్చిన తరిగిన ఉల్లిపాయల మధ్య ఓ బీడీ కనిపించిందని చెప్పారు.

అది అప్పటికే పూర్తిగా కాలిపోయి ఉందని ఆయన పేర్కొన్నారు. ‘‘జొమాటోలో పావ్ భాజీ ఆర్డర్ చేస్తే బీడీ కూడా ఫ్రీగా వచ్చింది. నిజం చెప్పాలంటే నాకు ఇలాంటి ఫ్రీబీ అవసరం లేదు’’ అంటూ తన అనుభవాన్ని వివరించారు.

దీనికి సంబంధించిన ఫొటోను కూడా ఆయన పోస్టు చేశారు. పావ్ భాజీకి ఇచ్చిన ఉల్లిపాయల మధ్య బీడీ స్పష్టంగా కనిపించింది. సాధారణంగా కనిపించే ఆహార ఆర్డర్ ఒక్కసారిగా పరిశుభ్రత, ఆహార భద్రతపై ప్రశ్నలు లేవనెత్తే ఘటనగా మారింది.

స్పందించిన జొమాటో
ఈ పోస్టు జొమాటో దృష్టికి వెళ్లడంతో సంస్థ కూడా స్పందించింది. ఘటనపై దర్యాప్తు చేసేందుకు ఆర్డర్ వివరాలను పంపాలని ప్రియమ్‌ను కోరింది. ‘‘హాయ్ ప్రియమ్.. దీనిపై పరిశీలన చేసేందుకు మీ ఆర్డర్ ఐడీని డీఎంలో పంపండి’’ అని జొమాటో కామెంట్ చేసింది. తర్వాత ప్రియమ్ మరో అప్‌డేట్ ఇచ్చారు. తదుపరి ఆర్డర్ కోసం జొమాటో తనకు రూ.100 కూపన్ ఇచ్చిందని తెలిపారు.

సోషల్ మీడియాలో నవ్వులు.. ఆందోళనలు 
ఈ ఘటనపై నెటిజన్లు భిన్నంగా స్పందించారు. కొందరు సరదాగా కామెంట్లు చేయగా, మరికొందరు ఆహార పరిశుభ్రతపై ఆందోళన వ్యక్తం చేశారు. ‘‘రెస్టారెంట్ వాళ్లకు మీ అలవాటు తెలిసినట్టుంది’’ అంటూ ఓ వ్యక్తి సరదాగా కామెంట్ చేశాడు. మరో నెటిజన్ ‘‘ఎక్స్‌ట్రా స్మోక్ ఫ్లేవర్’’ అంటూ వ్యంగ్యంగా స్పందించాడు.

అయితే కొందరు మాత్రం ఘటనను సీరియస్‌గా తీసుకున్నారు. ‘‘ఇక ఇంటి వంట తినే సమయం వచ్చింది. ప్రశాంతంగా ఉండొచ్చు’’ అంటూ ఓ వ్యక్తి వ్యాఖ్యానించాడు.

మరో నెటిజన్ మాత్రం జొమాటోకు దీనితో సంబంధం ఉండకపోవచ్చని అభిప్రాయపడ్డాడు. సాధారణంగా ఆహారాన్ని ప్యాక్ చేసేది రెస్టారెంటే కాబట్టి, ప్యాకింగ్ సమయంలో జరిగిన పొరపాటుకు రెస్టారెంట్ బాధ్యత వహించాల్సి ఉంటుందని పేర్కొన్నాడు. జొమాటో కేవలం డెలివరీ భాగస్వామిగా వ్యవహరిస్తుందని వివరించాడు.

ప్యాకింగ్ సమయంలోనే జరిగిందా? 
బీడీ ప్యాక్‌లోకి ఎలా వచ్చిందనే దానిపైనా నెటిజన్లు ఊహాగానాలు చేశారు. ప్యాకింగ్ చేసే సమయంలో ఎవరో బీడీ కాలుస్తూ ఉండి ఉంటారని, దాన్ని అక్కడ పడేయకుండా పొరపాటున ఆహారంతో పాటు ప్యాక్ చేసి ఉండొచ్చని ఓ వ్యక్తి అభిప్రాయపడ్డాడు.

మరికొందరు దీనిని ‘‘సీజనల్ ఆఫర్’’ అంటూ సరదాగా తీసుకున్నారు. ‘‘మీకు సీజనల్ ఆఫర్ వచ్చింది. అభినందనలు’’ అంటూ కామెంట్ చేశారు. ఓ నెటిజన్ అయితే మొదట ఆ బీడీని వ్యక్తిగతంగా రాసిన చిన్న నోట్‌గా భావించానని చెప్పాడు. దగ్గరగా చూసిన తర్వాత అది నోట్ కాదని, అత్యంత అపరిశుభ్రమైన అనుకోని ‘సర్‌ప్రైజ్’ అని తెలుసుకున్నానని పేర్కొన్నాడు.

ఆహార పరిశుభ్రతపై మరోసారి చర్చ 
ఈ ఘటన నిజంగా ఎలా జరిగిందన్నది సంబంధిత దర్యాప్తుతోనే స్పష్టమవుతుంది. అయితే ఆన్‌లైన్ ఫుడ్ డెలివరీలో ఆహారం తయారీ, ప్యాకింగ్, డెలివరీ ప్రతి దశలో పరిశుభ్రత ఎంత ముఖ్యమో ఈ ఘటన మరోసారి గుర్తు చేసింది.

వినియోగదారుడి ఆర్డర్‌లో ఇలాంటి వస్తువు కనిపించడం సహజంగానే ఆహార భద్రతపై ఆందోళన కలిగిస్తుంది. ఈ నేపథ్యంలో రెస్టారెంట్లు ఆహారాన్ని ప్యాక్ చేసే సమయంలో మరింత జాగ్రత్తలు తీసుకోవాల్సిన అవసరం ఉందనే చర్చ మొదలైంది.