Nepal: నేపాల్‌లో భారత కరెన్సీపై కొత్త నిబంధనలు.. రూ.200, రూ.500 నోట్లు మాత్రమే!

భారత్–నేపాల్ ప్రయాణికులకు ఊరట.. కొత్త కరెన్సీ నోట్లపై స్పష్టత..

నేపాల్‌లో భారత కరెన్సీపై ఆంక్షల సడలింపు.. రూ.25 వేల వరకు అనుమతి..

ఖాట్మండు: భారతీయులు, నేపాలీయులకు ప్రయోజనం చేకూర్చే కీలక నిర్ణయాన్ని నేపాల్ ప్రభుత్వం అమలు చేస్తోంది. నవంబర్ 9, 2016 తర్వాత ముద్రించిన భారతీయ రూ.200, రూ.500 నోట్లను ఒక్కో వ్యక్తి గరిష్ఠంగా రూ.25,000 విలువ వరకు నేపాల్‌లోకి తీసుకెళ్లడానికి లేదా అక్కడి నుంచి తీసుకురావడానికి అనుమతి ఉందని నేపాల్ రాష్ట్రీయ బ్యాంక్ (NRB) తాజాగా మరోసారి స్పష్టం చేసింది.

ఈ మేరకు నేపాల్ రాష్ట్రీయ బ్యాంక్ గురువారం విడుదల చేసిన ప్రకటనలో నిబంధనలను పునరుద్ఘాటించింది. ఇప్పటికే ఈ ఏడాది ఫిబ్రవరి 11న నేపాల్ గెజిట్‌లో ఈ నిబంధనలు ప్రకటించినప్పటికీ, వాటి అమలుపై స్పష్టత కల్పించేందుకు తాజా ప్రకటన విడుదల చేసినట్లు తెలిపింది. అయితే 2016 నవంబర్ 9కు ముందు ముద్రించిన రూ.500, రూ.1,000 భారతీయ కరెన్సీ నోట్లు ఇప్పటికీ నేపాల్‌లో పూర్తిగా నిషేధితమే అని ఎన్‌ఆర్‌బీ స్పష్టం చేసింది.

ఎన్‌ఆర్‌బీ ప్రతినిధి గురు ప్రసాద్ పౌడెల్ వివరాల ప్రకారం, నేపాలీయులు భారతదేశం నుంచి మాత్రమే భారతీయ కరెన్సీని నేపాల్‌కు తీసుకురావాలి. అలాగే నేపాల్ నుంచి భారతీయ కరెన్సీని భారత్ మినహా మరే మూడో దేశానికి తీసుకెళ్లేందుకు అనుమతి ఉండదని ఆయన తెలిపారు. ఈ నిబంధనలు భారతదేశం–నేపాల్ మధ్య అమల్లో ఉన్న ప్రస్తుత చట్టాలకు అనుగుణంగా ఉంటాయని పేర్కొన్నారు.

ఈ నిర్ణయం వల్ల నేపాల్‌కు వెళ్లే భారతీయ పర్యాటకులకు, అలాగే భారత్‌తో వ్యాపారం, ఉద్యోగాలు, విద్యా సంబంధాల కోసం తరచూ ప్రయాణించే నేపాలీయులకు గణనీయమైన సౌలభ్యం కలుగుతుందని అధికారులు అభిప్రాయపడ్డారు.

భారత్–నేపాల్ మధ్య సుదీర్ఘ సరిహద్దు, సన్నిహిత ప్రజా సంబంధాలు ఉన్న నేపథ్యంలో ఈ నిర్ణయం రెండు దేశాల మధ్య ఆర్థిక, వ్యాపార కార్యకలాపాలకు మరింత ఊతమిస్తుందని భావిస్తున్నారు. భారత్ నేపాల్‌కు అతిపెద్ద వాణిజ్య భాగస్వామి మాత్రమే కాకుండా, అత్యధిక సంఖ్యలో పర్యాటకులు వెళ్లే దేశంగా కూడా కొనసాగుతోంది. వేలాది మంది నేపాలీయులు భారత్‌లో ఉద్యోగాలు, విద్య, వ్యాపార కార్యకలాపాల్లో నిమగ్నమై ఉన్నారు.

నేపాల్‌లోకి ప్రవేశించే నేపాలీయులు, విదేశీ పర్యాటకులు అమెరికన్ డాలర్లలో 5,000 వరకు లేదా దానికి సమానమైన ఇతర విదేశీ కరెన్సీని కస్టమ్స్ ప్రకటన లేకుండానే తీసుకురావచ్చు. అయితే ఆ పరిమితిని మించిన మొత్తాన్ని తప్పనిసరిగా కస్టమ్స్ అధికారులకు ప్రకటించాలని ఎన్‌ఆర్‌బీ తెలిపింది.

భారత ప్రభుత్వం 2016 నవంబర్ 8న రూ.500, రూ.1,000 పాత నోట్లను రద్దు చేసి, కొత్త డిజైన్‌లో రూ.500 నోట్లను ప్రవేశపెట్టింది. అనంతరం విడుదలైన రూ.2,000 నోట్లను కూడా తర్వాత చలామణి నుంచి ఉపసంహరించింది. నోట్ల రద్దు అనంతరం నేపాల్ పాత భారతీయ కరెన్సీ వినియోగం, రవాణాపై కఠిన ఆంక్షలు విధించింది. తాజాగా అమల్లో ఉన్న నిబంధనలతో కొత్త రూ.200, రూ.500 నోట్ల రవాణాపై స్పష్టమైన మార్గదర్శకాలు మరోసారి వెల్లడించింది.