Pawan Kalyan: డ్రోన్లతో సీడ్ బాల్స్ పంపిణీ వేగవంతం.. ఎర్రచందనం స్మగ్లర్లపై ఉక్కుపాదం.. ఉప ముఖ్యమంత్రి పవన్ కల్యాణ్ ఆదేశాలు!

రాష్ట్రంలో 50% హరిత విస్తీర్ణమే లక్ష్యం.. అటవీ శాఖకు డిప్యూటీ సీఎం ఆదేశాలు..

అందుబాటులో లేని అడవుల్లో డ్రోన్లతో విత్తనాల చల్లింపు.. పునరుద్ధరణకు వేగం..

విజయవాడ: రాష్ట్రంలో అడవుల పునరుద్ధరణకు ఆధునిక సాంకేతికతను వినియోగిస్తూ డ్రోన్ల ద్వారా సీడ్ బాల్స్ పంపిణీని మరింత వేగవంతం చేయాలని ఉప ముఖ్యమంత్రి, అటవీ–పర్యావరణ శాఖ మంత్రి కొణిదెల పవన్ కల్యాణ్ అధికారులను ఆదేశించారు. అదే సమయంలో ఎర్రచందనం అక్రమ రవాణాకు సహకరించే వారెవ్వరినీ, ప్రభుత్వ ఉద్యోగులైనా సరే, ఉపేక్షించబోమని స్పష్టం చేశారు.

అటవీశాఖ పనితీరుపై నిర్వహించిన సమీక్ష సమావేశంలో పవన్ కల్యాణ్ పలు కీలక ఆదేశాలు జారీ చేశారు. అందుబాటులోకి చేరడం కష్టమైన అటవీ ప్రాంతాల్లో డ్రోన్ల సాయంతో సుమారు 1,000 ఎకరాల్లో సీడ్ బాల్స్ వెదజల్లాలని సూచించారు. వర్షపాతం, నేలలో తేమ పరిస్థితులను నిరంతరం పరిశీలిస్తూ సరైన సమయంలో సీడ్ బాల్స్ పంపిణీ జరిగేలా చర్యలు తీసుకోవాలని అధికారులకు దిశానిర్దేశం చేశారు.

రాష్ట్రంలో అటవీ విస్తీర్ణాన్ని, పచ్చదనాన్ని 50 శాతానికి పెంచడం ప్రభుత్వ ప్రధాన లక్ష్యం అని పవన్ కల్యాణ్ తెలిపారు. ఈ లక్ష్య సాధనలో భాగంగా 30 వేల హెక్టార్లలో అడవుల పునరుద్ధరణ కార్యక్రమాన్ని నిర్దేశిత గడువులో పూర్తి చేయాలని, నాటిన మొక్కలు నిలకడగా పెరిగేలా ప్రత్యేక చర్యలు తీసుకోవాలని అధికారులను ఆదేశించారు.

అధికారులు సమీక్షలో వెల్లడించిన వివరాల ప్రకారం రాష్ట్రవ్యాప్తంగా 3 కోట్లకు పైగా సీడ్ బాల్స్ సిద్ధం చేశారు. వాటిలో ఇప్పటివరకు 63 లక్షలకు పైగా సీడ్ బాల్స్ దాదాపు 6,500 హెక్టార్లలో వెదజల్లారు.

వీటిలో 59 లక్షల సీడ్ బాల్స్‌ను మానవశక్తితో సుమారు 6 వేల హెక్టార్లలో పంపిణీ చేయగా, తొలిసారిగా డ్రోన్ల ద్వారా చేరుకోలేని అటవీ ప్రాంతాల్లో సుమారు 1,000 ఎకరాల్లో సీడ్ బాల్స్ చల్లినట్లు అధికారులు తెలిపారు.

రాష్ట్రంలో రాజమహేంద్రవరం అటవీ వలయంలోనే అత్యధికంగా 28 లక్షల సీడ్ బాల్స్ పంపిణీ చేశారు. వీటిలో 2.26 లక్షల సీడ్ బాల్స్‌ను డ్రోన్ల ద్వారా వెదజల్లడం విశేషం. ప్రస్తుతం చింతూరు, పీటీ ఆత్మకూరు, గిద్దలూరు, మార్కాపురం, వైఎస్సార్ కడప అటవీ విభాగాల్లో కూడా డ్రోన్ ఆధారిత కార్యక్రమం కొనసాగుతోంది.

ఎల్‌నినో ప్రభావంతో వర్షాభావ పరిస్థితులు ఎదురైనా పనుల్లో జాప్యం ఉండకూడదని, అవసరమైతే మరిన్ని డ్రోన్లను వినియోగించాలని పవన్ కల్యాణ్ అధికారులను ఆదేశించారు.

మరోవైపు ఎర్రచందనం అక్రమ రవాణాపై నిర్వహించిన ప్రత్యేక సమీక్షలో ఉప ముఖ్యమంత్రి తీవ్ర హెచ్చరికలు జారీ చేశారు. ‘ఆపరేషన్ అరణ్య’ను మరింత సమర్థవంతంగా అమలు చేసి స్మగ్లింగ్‌ను పూర్తిగా అరికట్టాలని అధికారులకు సూచించారు. అక్రమ రవాణాకు సహకరించిన వారిపై, ప్రభుత్వ ఉద్యోగులైనా సరే, కఠిన చర్యలు తప్పవని స్పష్టం చేశారు.

కడప జిల్లా అవధూత కాశినాయన మండలంలోని జ్యోతి గుడి సమీపంలో రూ.1.5 కోట్ల విలువైన 78 ఎర్రచందనం దుంగలను స్వాధీనం చేసుకున్న ఘటనపై పవన్ కల్యాణ్ వివరాలు తెలుసుకున్నారు.

గూఢచారి సమాచారంతో ఎర్రచందనం అక్రమ రవాణా నిరోధక దళం బొలెరో మ్యాక్స్ వాహనాన్ని తనిఖీ చేసి, ఇంటి సామగ్రి కింద దాచిన ఎర్రచందనం దుంగలను గుర్తించింది. ఈ కేసులో హర్యానాకు చెందిన అంతర్రాష్ట్ర స్మగ్లర్లు సన్నీ, రమేష్లను అరెస్టు చేశారు. దర్యాప్తులో జ్యోతి అటవీ బీట్ అధికారిగా పనిచేస్తున్న మల్లికార్జున అక్రమ రవాణాకు సహకరించినట్లు గుర్తించి అతడిని కూడా అరెస్టు చేసినట్లు అధికారులు వెల్లడించారు.

ఈ స్మగ్లింగ్ ముఠాకు సంబంధించిన ప్రధాన సూత్రధారులు బెంగళూరు, హర్యానా, కోల్‌కతా ప్రాంతాల్లో ఉన్నట్లు అధికారులు గుర్తించినట్టు తెలిపారు. మిగిలిన నిందితులను త్వరగా పట్టుకునేందుకు ప్రత్యేక బృందాలను ఏర్పాటు చేయాలని పవన్ కల్యాణ్ ఆదేశించారు. అలాగే బీట్ అధికారిపై శాఖాపరమైన సమగ్ర విచారణ జరిపి నివేదిక సమర్పించాలని సూచించారు.

అటవీ సంరక్షణతో పాటు ఎర్రచందనం అక్రమ రవాణా నిర్మూలనలో ప్రభుత్వం రాజీపడబోదని, పర్యావరణ పరిరక్షణకు సాంకేతికతను విస్తృతంగా వినియోగిస్తూ ముందుకు సాగుతామని ఉప ముఖ్యమంత్రి స్పష్టం చేశారు.