Artemis 2: ఆర్టెమిస్-2 మిషన్‌లో కీలక దశ.. 40 నిమిషాల పాటు నిలిచిపోనున్న కమ్యూనికేషన్..

ఆర్టెమిస్‌-2.. కట్‌ కానున్న సంబంధాలు.. 

చంద్రుడి దిశగా మానవ యాత్రను మరోసారి ప్రారంభించేందుకు NASA చేపట్టిన Artemis II మిషన్‌ కీలక దశలోకి అడుగుపెడుతోంది. నలుగురు వ్యోమగాములతో కూడిన ఒరాయన్‌ వ్యోమనౌక చంద్రుడి చుట్టూ ప్రయాణిస్తూ, జాబిల్లి వెనుక భాగానికి చేరుకునే సమయంలో ఒక ప్రత్యేక పరిస్థితి ఎదురుకానుంది.

అంతరిక్ష యాత్రలో భాగంగా ఒరాయన్‌ వ్యోమనౌక చంద్రుడి వెనుక వైపుకు వెళ్లినప్పుడు, భూమిపై ఉన్న హ్యూస్టన్ మిషన్ కంట్రోల్‌తో సంబంధాలు తాత్కాలికంగా నిలిచిపోనున్నాయి. ఈ సమయంలో దాదాపు 40 నిమిషాల పాటు ఎలాంటి కమ్యూనికేషన్ ఉండదని అధికారులు వెల్లడించారు.

ఈ కమ్యూనికేషన్ గ్యాప్‌కు కారణం చంద్రుడి వెనుక భాగం. ఆ ప్రాంతంలోకి వ్యోమనౌక వెళ్లినప్పుడు, భూమికి నేరుగా సంకేతాలు పంపడం సాధ్యం కాదు. దీంతో కొంతసేపు వ్యోమగాములు పూర్తిగా స్వతంత్రంగా ప్రయాణాన్ని కొనసాగించాల్సి ఉంటుంది.

భారత కాలమానం ప్రకారం మంగళవారం తెల్లవారుజామున 4 గంటల సమయంలో ఈ కీలక దశ చోటుచేసుకునే అవకాశం ఉందని సమాచారం. ఈ సమయం అంతరిక్ష యాత్రలో అత్యంత ఉత్కంఠభరితంగా ఉండనుంది.

అయితే ఇది ముందే అంచనా వేసిన పరిస్థితి కావడంతో, వ్యోమగాములు అన్ని ఏర్పాట్లు చేసుకుని ప్రయాణాన్ని కొనసాగిస్తారని నాసా అధికారులు స్పష్టం చేస్తున్నారు. ఈ దశ విజయవంతంగా పూర్తైతే, మానవులను మళ్లీ చంద్రుడిపైకి పంపే దిశగా ఆర్టెమిస్ కార్యక్రమానికి ఇది మరో ముఖ్యమైన ముందడుగు అవుతుంది.