BSNL Kavach Number: ఫోన్ నంబర్ ఇవ్వక్కర్లేదు.. బీఎస్‌ఎన్‌ఎల్ 'కవచ్' ఉంటే చాలు!

BSNL Kavach Number: ప్రస్తుత డిజిటల్ కాలంలో మన వ్యక్తిగత వివరాల్లో అత్యంత కీలకమైనది మొబైల్ నంబర్. బ్యాంకు లావాదేవీల నుంచి సోషల్ మీడియా ఖాతాల వరకు ప్రతిదీ ఫోన్ నంబర్‌తోనే ముడిపడి ఉంది. అయితే, బయట షాపుల్లో రీఛార్జ్ చేయించుకోవాలన్నా లేదా పబ్లిక్ ప్రదేశాల్లో మొబైల్ నంబర్ ఇవ్వాలన్నా మహిళలకు భద్రతా పరమైన ఆందోళనలు ఎదురవుతున్నాయి. గుర్తుతెలియని వ్యక్తుల నుంచి వేధింపులు వచ్చే అవకాశం ఉండటంతో, దీనికి పరిష్కారంగా ప్రభుత్వ రంగ టెలికాం సంస్థ బీఎస్‌ఎన్‌ఎల్ (BSNL) అద్భుతమైన ఫీచర్‌ను అందుబాటులోకి తెచ్చింది. 

మహిళల గోప్యతను కాపాడటమే లక్ష్యంగా అంతర్జాతీయ మహిళా దినోత్సవం  సందర్భంగా ఈ సేవలను ప్రారంభించారు. కవచ్ నంబర్ అనేది ఒక తాత్కాలిక 10 అంకెల మొబైల్ నంబర్. ఇది మీ అసలు మొబైల్ నంబర్‌కు వెనుక వైపు అనుసంధానమై ఉంటుంది. మీరు బయట ఎక్కడైనా రీఛార్జ్ చేయించుకోవాల్సి వచ్చినప్పుడు మీ ఒరిజినల్ నంబర్ చెప్పాల్సిన అవసరం లేదు. దానికి బదులుగా ఈ 'కవచ్' నంబర్ చెబితే సరిపోతుంది. ఆ నంబర్‌కు చేసిన రీఛార్జ్ ఆటోమేటిక్‌గా మీ అసలు నంబర్‌కు క్రెడిట్ అవుతుంది.

చాలా సందర్భాల్లో పబ్లిక్ వైఫై వాడేటప్పుడు లేదా కొన్ని రకాల సర్వే ఫారాలు నింపేటప్పుడు మొబైల్ నంబర్ తప్పనిసరి అవుతుంది. అటువంటి సమయాల్లో ఈ తాత్కాలిక నంబర్‌ను వాడటం ద్వారా మన వ్యక్తిగత డేటా దుర్వినియోగం కాకుండా చూసుకోవచ్చు. ఒకవేళ ఆ తాత్కాలిక నంబర్‌కు అనవసర కాల్స్ వచ్చినా, వాటిని సులభంగా నియంత్రించే అవకాశం ఉంటుంది. దీనివల్ల ప్రైవసీకి భంగం కలగదు.

బీఎస్‌ఎన్‌ఎల్ కస్టమర్లు చాలా సులభంగా ఈ ఫీచర్‌ను యాక్టివేట్ చేసుకోవచ్చు. ముందుగా గూగుల్ ప్లే స్టోర్ లేదా యాపిల్ యాప్ స్టోర్ నుంచి 'BSNL Self Care' యాప్‌ను డౌన్‌లోడ్ చేసుకోవాలి. అందులో లాగిన్ అయిన తర్వాత మెనూలో 'Kavach Number' అనే ఆప్షన్ కనిపిస్తుంది. దానిపై క్లిక్ చేస్తే మీకు ఒక తాత్కాలిక నంబర్ కేటాయించబడుతుంది. ఈ వివరాలు మీకు ఎస్ఎంఎస్  రూపంలో కూడా అందుతాయి.

ప్రైవేట్ టెలికాం సంస్థలతో పోటీ పడుతున్న బీఎస్‌ఎన్‌ఎల్, ఇలాంటి వినూత్న ఫీచర్లను తీసుకురావడం పట్ల వినియోగదారులు హర్షం వ్యక్తం చేస్తున్నారు. ముఖ్యంగా గ్రామీణ  పట్టణ ప్రాంతాల్లో ఉండే మహిళలకు ఇది ఒక రక్షణ కవచంలా పనిచేస్తుందని టెక్ నిపుణులు చెబుతున్నారు. టెక్నాలజీ పెరుగుతున్న కొద్దీ సైబర్ నేరాలు కూడా పెరుగుతున్న నేపథ్యంలో, ఇలాంటి జాగ్రత్తలు తీసుకోవడం ఎంతో అవసరమని బీఎస్‌ఎన్‌ఎల్ యాజమాన్యం స్పష్టం చేస్తోంది.