TANA: తానా 'నెల నెలా తెలుగు వెలుగు' – శస్త్ర చికిత్స పితామహుడు మహర్షి శుశ్రూతుడిపై అంతర్జాతీయ సదస్సు!

• యూకే రాయల్ కాలేజ్ ఆఫ్ సర్జన్స్‌లో మహర్షి శుశ్రూతుని 90 కిలోల కాంస్య విగ్రహం.. డాక్టర్ చంద్ర చెరువు వెల్లడి!

• పాఠశాల పాఠ్యాంశాల్లో 'శుశ్రూత సంహిత' విశేషాలు చేర్చాలి.. తానా సమావేశంలో డాక్టర్ ప్రసాద్ తోటకూర విజ్ఞప్తి!

• ప్రాచీన భారతీయ వైద్య విజ్ఞానం అద్భుతం.. మహర్షి శుశ్రూతుని ఆవిష్కరణలపై ప్రపంచవ్యాప్త వైద్యుల ప్రశంసలు!

TANA: ప్రపంచ వైద్య విజ్ఞాన రంగానికి ప్రాచీన భారతదేశం అందించిన నిరుపమాన కానుక మహర్షి శుశ్రూతుడు. శస్త్ర చికిత్సకు పితామహుడిగా, ఆయుర్వేద వైద్య శాస్త్రానికి ఆద్యుడిగా పరిగణించబడే శుశ్రూతుని ప్రాచీన వైద్య పద్ధతులు, పరిశోధనలు మరియు ఆవిష్కరణలను నేటి తరం లోతుగా అధ్యయనం చేయాల్సిన అవసరం ఎంతైనా ఉందని పలువురు వైద్య నిపుణులు, ప్రముఖులు పిలుపునిచ్చారు. ఉత్తర అమెరికా తెలుగు సంఘం (తానా) సాహిత్య విభాగం 'తానా ప్రపంచ సాహితీ వేదిక' ఆధ్వర్యంలో 'నెల నెలా తెలుగు వెలుగు' శీర్షికన 94వ అంతర్జాతీయ వర్చువల్ సమావేశం ఎంతో విజ్ఞానదాయకంగా నిర్వహించబడింది.

ఈ ప్రత్యేక అంతర్జాతీయ సమావేశానికి యునైటెడ్ కింగ్‌డమ్‌లో ప్రసిద్ధి చెందిన శస్త్ర చికిత్స నిపుణులు డాక్టర్ చంద్ర చెరువు ముఖ్య అతిథిగా హాజరయ్యారు. యుకేలోని రాయల్ కాలేజ్ ఆఫ్ సర్జన్స్ ఆఫ్ ఎడిన్‌బర్గ్‌లో తమ కుటుంబం తరపున ఆచార్య శుశ్రూతుని 90 కిలోల భారీ కాంస్య విగ్రహాన్ని ప్రతిష్టించి ఆవిష్కరించడం తమ జీవితంలో లభించిన గొప్ప అదృష్టంగా భావిస్తున్నట్లు ఆయన తెలిపారు. వేల సంవత్సరాల క్రితమే శుశ్రూతుడు ఉదాహరణలతో సహా వివరించిన వైద్య విధానాలు, శస్త్రచికిత్సా పరికరాల జాబితా నేటి ఆధునిక వైద్య ప్రపంచాన్ని సైతం ఎంతగానో ఆశ్చర్యపరుస్తుందని పేర్కొన్నారు. ఈ సందర్భంగా 'మహర్షి శుశ్రూత ఏ కంపెండియం-ఫాదర్ ఆఫ్ సర్జరీ' గ్రంథాన్ని వెలువరించడంలో సహకరించిన సహచర వైద్య మిత్రులకు, విగ్రహ ఆవిష్కరణకు సహకరించిన అధికారులకు ఆయన కృతజ్ఞతలు తెలుపుతూ, 'శుశ్రూత సంహిత' లోని అంశాలు ప్రపంచ భాషలన్నింటిలోకీ అనువాదం కావాలని ఆకాంక్షించారు.

తానా ప్రపంచ సాహితీ వేదిక నిర్వాహకులు డాక్టర్ ప్రసాద్ తోటకూర మాట్లాడుతూ, ప్రపంచ నాగరికత ఇంకా సంపూర్ణంగా రూపుదిద్దుకోని కాలంలోనే శుశ్రూతుడు సంస్కృతంలో 184 అధ్యాయాలతో కూడిన 'శుశ్రూత సంహిత' అనే అద్భుతమైన ఆయుర్వేద గ్రంథాన్ని రచించారని కొనియాడారు. ఇది ప్రపంచంలోనే వైద్యులకు లభించిన మొట్టమొదటి ప్రామాణిక మరియు సమగ్ర గ్రంథమని స్పష్టం చేశారు. సమాజానికి పరిపూర్ణ ఆరోగ్య విజ్ఞానాన్ని అందించిన ఆచార్య శుశ్రూతుని పరిశోధనా విశేషాలను పాఠశాల స్థాయి నుంచే విద్యార్థులకు పాఠ్యాంశాలుగా చేర్చాలని, దీనివల్ల ప్రాచీన భారతీయ శాస్త్రీయ విజ్ఞానం పట్ల నేటి తరానికి సరైన అవగాహన ఏర్పడుతుందని ఆయన కేంద్ర, రాష్ట్ర ప్రభుత్వాలకు విజ్ఞప్తి చేశారు.

ఈ సమావేశంలో విశిష్ట అతిథులుగా పాల్గొన్న పలువురు వైద్య నిపుణులు శుశ్రూతుని విభిన్న పరిశోధనా అంశాలపై విలువైన ప్రసంగాలు చేశారు. డాక్టర్ బుచ్చిబాబు పైడిపాటి ప్రాచీన కాలంలో శుశ్రూతుడు నిర్దేశించిన మెడికల్ ఎథిక్స్ (వైద్య నైతిక విలువలు) గురించి వివరించగా, డాక్టర్ వీళ్లే రాజు ప్రాచీన కాలంలోనే శుశ్రూతుడు అందుబాటులోకి తెచ్చిన కంటి వైద్య పద్ధతులు (Cataract & Ophthalmic Surgeries) గురించి వివరించారు. అలాగే డాక్టర్ శేషు శర్మ మాట్లాడుతుండగా.. శుశ్రూత సంహితలోని వాత, పిత్త, కఫ దోషాలను సమతుల్యం చేయడానికి సరైన ఆహార నియమాలు, వ్యాయామం, నిద్ర అలవాట్లు ఎంత కీలకమో విశదీకరించగా, డాక్టర్ పండరి గంటి ఆయుర్వేద చికిత్సా విధానం పనిచేసే తీరును మరియు నేటి ఆధునిక కాలంలోనూ దాని ద్వారా పొందే ఫలవంతమైన ఆరోగ్య ఫలితాలను విశ్లేషించారు.

ప్రాచీన భారతీయ వైద్య విజ్ఞాన మహోన్నత శిఖరమైన మహర్షి శుశ్రూతుని చరిత్రను, ఆయన సాధించిన ఆవిష్కరణలను అంతర్జాతీయ వేదికపై పునరావిష్కరించిన ఈ సమావేశం ప్రపంచవ్యాప్తంగా ఉన్న తెలుగువారిని, వైద్య రంగానికి చెందిన ప్రముఖులను విశేషంగా ఆకట్టుకుంది. కార్యక్రమానికి విశిష్ట అతిథులుగా విచ్చేసిన వారికి, ప్రసంగించిన వైద్యులకు మరియు ఈ కార్యక్రమ విజయవంతానికి శ్రమించిన ప్రతి ఒక్కరికీ తానా ప్రపంచ సాహితీ వేదిక సమన్వయకర్త చిగురుమళ్ల శ్రీనివాస్ ప్రత్యేక ధన్యవాదాలు తెలియజేయడంతో ఈ అంతర్జాతీయ వర్చువల్ సమావేశం దిగ్విజయంగా ముగిసింది.