TANA: ఛార్లెట్‌లో తానా సేవా కార్యక్రమం.. విజయవంతమైన రక్తదాన శిబిరం!

తానా సేవా కార్యక్రమానికి విశేష స్పందన.. 63 మందికి ప్రాణదానం చేసే రక్తం సేకరణ..

లక్ష్యాన్ని మించి రక్త సేకరణ.. ఛార్లెట్‌లో తానా సేవలకు ప్రశంసలు..

ఛార్లెట్ (అమెరికా): ఉత్తర అమెరికా తెలుగు సంఘం (తానా) మరోసారి తన సేవా దృక్పథాన్ని చాటుకుంది. సమాజానికి ఉపయోగపడే కార్యక్రమాల్లో భాగంగా అమెరికాలోని ఛార్లెట్ నగరంలో అమెరికన్ రెడ్ క్రాస్, 'సాయి అనుగ్రహ' సంస్థలతో కలిసి తానా ఆధ్వర్యంలో నిర్వహించిన రక్తదాన శిబిరం విజయవంతంగా ముగిసింది. తీవ్ర ఎండలను కూడా లెక్కచేయకుండా పెద్ద సంఖ్యలో దాతలు స్వచ్ఛందంగా ముందుకు వచ్చి రక్తదానం చేయడం విశేషంగా నిలిచింది.

ఈ శిబిరానికి నిర్వాహకులు ముందుగా 20 యూనిట్ల రక్త సేకరణ లక్ష్యంగా పెట్టుకోగా, దాతల విశేష స్పందనతో ఆ లక్ష్యాన్ని అధిగమించి 21 మంది దాతల నుంచి 21 యూనిట్ల రక్తాన్ని సేకరించారు. ఇందులో 19 యూనిట్లు హోల్ బ్లడ్, 2 యూనిట్లు పవర్ రెడ్ రూపంలో సేకరించినట్లు నిర్వాహకులు తెలిపారు.

వైద్య నిపుణుల అంచనా ప్రకారం, ఈ రక్త సేకరణ ద్వారా దాదాపు 63 మంది ప్రాణాలను కాపాడే అవకాశం ఉందని నిర్వాహకులు పేర్కొన్నారు. ప్రతి రక్తదానం ఒక ప్రాణాన్ని నిలబెట్టగలదనే సందేశంతో నిర్వహించిన ఈ కార్యక్రమానికి స్థానిక తెలుగు సంఘాల సభ్యులు, వాలంటీర్లు, దాతలు విశేషంగా సహకరించారు.

ఈ కార్యక్రమంలో తానా ఎగ్జిక్యూటివ్ వైస్ ప్రెసిడెంట్ శ్రీనివాస్ లావు, తానా బోర్డ్ డైరెక్టర్ మల్లి వేమన, తానా పూర్వ ఫౌండేషన్ చైర్మన్ శ్రీనివాస గోగినేని, సోషల్ వెల్ఫేర్ కోఆర్డినేటర్ సునీల్ దేవరపల్లి, అలాగే ఛార్లెట్ ప్రాంత తానా నాయకులు రవి (నాని) వడ్లమూడి, నాగ పంచుమర్తి, ఠాగూర్ మల్లినేని, కిరణ్ కొత్తపల్లి, మాధురి ఏలూరి తదితరులు పాల్గొన్నారు. రక్తదానం చేసిన ప్రతి దాతను, కార్యక్రమ నిర్వహణలో కీలకంగా పనిచేసిన వాలంటీర్లను వారు అభినందించారు.

ఈ సందర్భంగా అమెరికన్ రెడ్ క్రాస్, సాయి అనుగ్రహ సంస్థల భాగస్వామ్యాన్ని తానా నాయకులు ప్రత్యేకంగా ప్రశంసించారు. ముఖ్యంగా ఈ కార్యక్రమం విజయవంతం కావడంలో విశేష సహకారం అందించిన ఎం.ఆర్.కె. కిషోర్ సేవలను వారు ప్రత్యేకంగా గుర్తించి కృతజ్ఞతలు తెలిపారు.

తీవ్రమైన ఎండలో కూడా దాతలకు స్వాగతం పలుకుతూ, రిజిస్ట్రేషన్ ప్రక్రియను సమర్థంగా నిర్వహిస్తూ నిరంతరం సేవలందించిన వాలంటీర్ల అంకితభావాన్ని నాయకులు కొనియాడారు. రక్తదానం చేసి ప్రాణదాతలుగా నిలిచిన ప్రతి ఒక్కరికీ, కార్యక్రమాన్ని విజయవంతం చేసిన నిర్వాహకులు, వాలంటీర్లు, భాగస్వామ్య సంస్థలకు తానా హృదయపూర్వక ధన్యవాదాలు తెలిపింది.

సమాజానికి అవసరమైన సమయంలో రక్తం అందుబాటులో ఉండేలా ఇటువంటి సేవా కార్యక్రమాలను భవిష్యత్తులో కూడా కొనసాగిస్తామని తానా నాయకులు వెల్లడించారు. విదేశాల్లో నివసిస్తున్న తెలుగు సమాజం సేవా కార్యక్రమాల్లోనూ ముందుండి ఆదర్శంగా నిలుస్తోందని ఈ రక్తదాన శిబిరం మరోసారి నిరూపించింది.