దేశవ్యాప్తంగా జరుగుతున్న కంబైన్డ్ గ్రాడ్యుయేట్ లెవెల్ ఎగ్జామినేషన్ (సీజీఎల్)–2025 పరీక్షల్లో కీలక పరిణామం చోటుచేసుకుంది. సెప్టెంబర్ 12న ప్రారంభమైన ఈ పరీక్షలు 26వ తేదీ వరకు కొనసాగనున్నాయి. అయితే కొన్ని కేంద్రాల్లో రిమోట్ హ్యాకింగ్ ప్రయత్నాలు జరిగినట్లు స్టాఫ్ సెలక్షన్ కమిషన్ (SSC) గుర్తించింది. ఆన్‌లైన్ విధానంలో జరుగుతున్న ఈ పరీక్షల సమయంలో కొంతమంది అభ్యర్థుల కంప్యూటర్లను దూరం నుంచే టేకోవర్ చేయడానికి యత్నించినట్లు అధికారులు బయటపెట్టారు.
ఈ సంఘటనలపై ఎస్ఎస్‌సీ వెంటనే స్పందించింది. అక్రమాలకు పాల్పడిన అభ్యర్థులను పరీక్షలకు డిబార్ చేయడంతోపాటు క్రిమినల్ కేసులు నమోదు చేస్తామని కఠిన హెచ్చరిక జారీ చేసింది. అలాగే ఇటువంటి అక్రమాలకు పాల్పడిన పరీక్షా కేంద్రాలపై కూడా చర్యలు తప్పవని స్పష్టం చేసింది. పరీక్షలు పారదర్శకంగా జరగాలనే ఉద్దేశంతో, ప్రతి అభ్యర్థి టెర్మినల్‌పై జరుగుతున్న కార్యకలాపాలను పర్యవేక్షించే ప్రత్యేక భద్రతా లక్షణాలను అమలు చేస్తున్నట్లు కమిషన్ తెలిపింది.
అదే సమయంలో, డిజిటల్ ఫింగర్‌ప్రింట్స్ సహా ఆధారాలను పరీక్షా ప్రక్రియ పూర్తయ్యాక విశ్లేషించి, ఎవరు ఈ రకమైన హ్యాకింగ్ లేదా దుష్ప్రవర్తనకు పాల్పడ్డారో గుర్తిస్తామని SSC స్పష్టం చేసింది. ఈ తరహా చర్యలు కఠిన శిక్షార్హమని, భవిష్యత్ పరీక్షల నుంచి శాశ్వతంగా తొలగించబడే అవకాశముందని అధికారులు హెచ్చరించారు. అభ్యర్థులు ఎటువంటి అక్రమ మార్గాలకు పాల్పడకుండా నిజాయితీగా పరీక్ష రాయాలని సూచించారు.
సీజీఎల్ పరీక్షలు భారతదేశంలోనే అతిపెద్ద పోటీ పరీక్షల్లో ఒకటిగా పేరుపొందాయి. ప్రభుత్వ విభాగాల్లోని గ్రూప్ B, C పోస్టుల నియామకాలకు లక్షలాది మంది యువత ప్రతి సంవత్సరం పోటీ పడుతుంటారు. అందుకే ఈ పరీక్షలను పూర్తిగా నిష్పాక్షికంగా, పారదర్శకంగా నిర్వహించడమే ఎస్ఎస్‌సీ ప్రధాన లక్ష్యమని వెల్లడించింది.
