Health Tips: ఎండాకాలంలో రాగి, బార్లీ జావలు... ఎవరికి ఏది మంచిదో తెలుసా?

వేసవి తాపానికి చెక్ పెట్టే రాగి జావ….

కాల్షియం కావాలా? అయితే రాగి జావ తాగాల్సిందే!

ఎముకల బలానికి, షుగర్ కంట్రోల్‌కు రాగి జావ ఒక వరం…

Health Tips: వేసవి కాలం ప్రారంభం కావడంతో ఎండలు తీవ్రమవుతున్నాయి. ఈ సమయంలో వడదెబ్బ, నీరసం, డీహైడ్రేషన్ (Dehydration) వంటి సమస్యలు రాకుండా ఉండాలంటే ఆహారపు అలవాట్లలో మార్పులు చేసుకోవడం చాలా అవసరం. ముఖ్యంగా శరీరానికి చలువ చేసే రాగి జావ, బార్లీ జావలను తీసుకోవడం వల్ల ఎండల ప్రభావం నుండి మనల్ని మనం రక్షించుకోవచ్చని ఆరోగ్య నిపుణులు సూచిస్తున్నారు. ఇవి కేవలం దాహాన్ని తీర్చడమే కాకుండా శరీరానికి అవసరమైన శక్తిని కూడా అందిస్తాయి.

రాగుల్లో కాల్షియం (Calcium) పుష్కలంగా ఉంటుంది, ఇది ఎముకల బలానికి ఎంతో మేలు చేస్తుంది. ఇందులో విటమిన్ ఏ, బి, సి లతో పాటు శరీరానికి కావలసిన ముఖ్యమైన ఖనిజ లవణాలు ఉంటాయి. రాగి జావ తాగడం వల్ల జీర్ణశక్తి మెరుగుపడటమే కాకుండా రక్తంలో కొలెస్ట్రాల్ స్థాయిలు తగ్గుతాయి. రక్తహీనతతో బాధపడేవారికి, మధుమేహం ఉన్నవారికి మరియు బరువు తగ్గాలనుకునే వారికి రాగులు ఒక అద్భుతమైన ఆహారంగా (Super Food) ఉపయోగపడతాయి.

ఇక బార్లీ జావ విషయానికి వస్తే, ఇందులో పీచు పదార్థం (Fiber) అధికంగా ఉంటుంది. దీనివల్ల త్వరగా ఆకలి వేయదు, తద్వారా బరువును సులభంగా నియంత్రించుకోవచ్చు. బార్లీ జావలో మజ్జిగ, ఉప్పు, జీలకర్ర పొడి మరియు నిమ్మరసం కలుపుకుని తాగితే శరీరానికి తక్షణమే శక్తి లభిస్తుంది. ఇది శరీరంలోని వ్యర్థాలను బయటకు పంపడంలో మరియు మూత్రపిండాల పనితీరును మెరుగుపరచడంలో కీలక పాత్ర పోషిస్తుంది.

ఈ రెండు జావలు వేసవిలో అమృతంలా పనిచేసినప్పటికీ, కొన్ని జాగ్రత్తలు పాటించడం అవసరం. రాగుల్లో ఆక్సలేట్లు ఎక్కువగా ఉంటాయి కాబట్టి కిడ్నీలో రాళ్లు ఉన్నవారు వీటిని పరిమితంగా తీసుకోవాలి. అలాగే ఏదైనా అనారోగ్య సమస్యలకు చికిత్స తీసుకుంటున్న వారు వైద్యుల సలహా మేరకు వీటిని ఆహారంలో భాగం చేసుకోవాలి. ముఖ్యంగా మూత్రపిండాల వ్యాధిగ్రస్తులు తగిన జాగ్రత్తలు తీసుకోవడం మంచింది.

ఎండాకాలంలో శీతల పానీయాలకు బదులుగా సహజసిద్ధమైన రాగి, బార్లీ జావలను ఎంచుకోవడం వల్ల ఆరోగ్యం మెరుగుపడుతుంది. పిల్లల నుండి వృద్ధుల వరకు అందరూ వీటిని తీసుకోవడం వల్ల ఎముకలు దృఢంగా ఉండటంతో పాటు వేసవి తాపం నుండి ఉపశమనం లభిస్తుంది. శరీర ఉష్ణోగ్రతను తగ్గించి, రోజంతా ఉత్సాహంగా ఉండేలా చేయడంలో ఈ జావలు అద్భుతంగా తోడ్పడతాయి.