ఆంధ్రప్రదేశ్ ప్రభుత్వ పాఠశాలల్లో 1వ తరగతి నుంచి 10వ తరగతి వరకు చదువుతున్న విద్యార్థులకు ఫార్మేటివ్ అసెస్‌మెంట్ (FA), సమ్మేటివ్ అసెస్‌మెంట్ (SA) విధానాల్లో పరీక్షలు నిర్వహిస్తారు. ఇప్పటి వరకు ఒక్కో ఉపాధ్యాయుడు తన సబ్జెక్ట్‌కు అనుగుణంగా వేర్వేరు పద్ధతుల్లో పరీక్షలు నిర్వహించేవారు. కొంతమంది ఉపాధ్యాయులు విద్యార్థులకు జవాబులు రాయడానికి చిన్న పుస్తకాలు ఇచ్చేవారు, మరికొందరు తెల్లకాగితాలు లేదా రూల్డ్ షీట్లు ఉపయోగించేవారు.
ఈ భిన్నతలను తొలగించి, రాష్ట్రవ్యాప్తంగా ఒకే విధానాన్ని అమలు చేయాలని విద్యాశాఖ నిర్ణయించింది. ప్రతి విద్యాసంవత్సరంలో నాలుగు ఫార్మేటివ్ అసెస్‌మెంట్లు మరియు రెండు సమ్మేటివ్ అసెస్‌మెంట్లు నిర్వహించనున్నారు. వాటి షెడ్యూల్‌ను విద్యాశాఖ ముందుగానే ప్రకటిస్తుంది. ఈ నెల 11 నుంచి 13 వరకు FA-1 జరగనుంది.
ఈసారి విద్యార్థులకు 72 పేజీలతో కూడిన ప్రత్యేక బుక్‌లెట్‌ను అందించనున్నారు. ఒక్కో సబ్జెక్ట్‌కి ప్రత్యేక బుక్ ఇవ్వబడుతుంది. ప్రశ్నాపత్రంలోని ప్రశ్నలకు జవాబులు ఈ బుక్‌లోనే రాయాలి. దీనివల్ల విద్యార్థుల పురోగతిని ఒకేచోట రికార్డు చేయడం సులభం అవుతుంది. FA నుంచి FA వరకు ప్రతిభా మార్పులను అంచనా వేసేందుకు ఇది ఉపయుక్తం అవుతుంది అని అధికారులు చెబుతున్నారు.
జవాబులను పరిశీలించే ఉపాధ్యాయులు తప్పక రిమార్కులు రాయాలి. ఉదాహరణకు—ఒక ప్రశ్నకు తగిన జవాబు ఇవ్వకుండా, సంబంధం లేని జవాబు రాసినపుడు ఆ ప్రశ్నకు సున్నా మార్కులు ఇస్తారు. అంతేకాక, ఆ జవాబు పక్కనే ‘ఎందుకు తప్పు’ అనే రిమార్క్ రాయాల్సి ఉంటుంది.
