Nipah Virus: నిపా వైరస్ నియంత్రణ చర్యలపై సమీక్ష.. కోజికోడ్కు చేరుకున్న NCDC నిపుణుల బృందం!
Nipah Virus: కేరళలో నిపా వైరస్ కేసు వెలుగులోకి వచ్చిన నేపథ్యంలో వైరస్ నియంత్రణ చర్యలను పరిశీలించేందుకు నేషనల్ సెంటర్ ఫర్ డిసీజ్ కంట్రోల్ (NCDC) నిపుణుల బృందం కోజికోడ్ జిల్లాకు చేరుకుంది. వైరస్ వ్యాప్తిని అడ్డుకునేందుకు తీసుకుంటున్న చర్యలను బృందం సమీక్షిస్తోంది.
కేరళలో నిపా వైరస్పై అప్రమత్తత.. 87 మంది కాంటాక్టులపై నిఘా..
కోజికోడ్లో నిపా వైరస్ నియంత్రణ చర్యలు ముమ్మరం..
కోజికోడ్: కేరళలో నిపా వైరస్ కేసు వెలుగులోకి వచ్చిన నేపథ్యంలో వైరస్ నియంత్రణ చర్యలను పరిశీలించేందుకు నేషనల్ సెంటర్ ఫర్ డిసీజ్ కంట్రోల్ (NCDC) నిపుణుల బృందం కోజికోడ్ జిల్లాకు చేరుకుంది. వైరస్ వ్యాప్తిని అడ్డుకునేందుకు తీసుకుంటున్న చర్యలను బృందం సమీక్షిస్తోంది.
కోజికోడ్లోని రామనట్టుకర ప్రాంతానికి చెందిన 43 ఏళ్ల వ్యక్తికి నిపా వైరస్ నిర్ధారణ కావడంతో ఆయనకు కోజికోడ్ మెడికల్ కాలేజీ ఆసుపత్రిలో చికిత్స అందిస్తున్నారు. ప్రస్తుతం ఆయనకు వెంటిలేటర్ సహాయంతో వైద్య సేవలు కొనసాగుతున్నాయి.
మెడికల్ బోర్డు సూచనల మేరకు బాధితుడికి మోనోక్లోనల్ యాంటీబాడీ చికిత్సలో భాగంగా తొలి డోస్ ఇప్పటికే అందించినట్లు అధికారులు తెలిపారు. రోగి ఆరోగ్య పరిస్థితిని వైద్య బృందాలు నిరంతరం పర్యవేక్షిస్తున్నాయి.
ఇప్పటివరకు వైరస్ మరింతగా వ్యాప్తి చెందలేదని కేరళ ఆరోగ్య శాఖ మంత్రి కె. మురళీధరన్ తెలిపారు. బాధితుడితో సంబంధం ఉన్న వ్యక్తుల నుంచి సేకరించిన నమూనాల పరీక్షల్లో ఇప్పటివరకు వచ్చిన అన్ని ఫలితాలు నెగెటివ్గా ఉన్నాయని వెల్లడించారు. బాధితుడి కాంటాక్ట్ లిస్ట్లో మొత్తం 87 మందిని గుర్తించినట్లు అధికారులు తెలిపారు. వీరిపై ప్రత్యేక నిఘా కొనసాగిస్తూ, అవసరమైన వైద్య పరీక్షలు నిర్వహిస్తున్నారు.
ప్రభావిత ప్రాంతాల్లో ముందస్తు జాగ్రత్త చర్యలను మరింత వేగవంతం చేశామని ఆరోగ్య శాఖ పేర్కొంది. ప్రజల్లో అవగాహన పెంచడం, అనుమానిత కేసులను గుర్తించడం, వైరస్ వ్యాప్తిని అడ్డుకోవడం కోసం అధికారులు పర్యవేక్షణను ముమ్మరం చేశారు. నిపా వైరస్ నియంత్రణకు కేంద్ర, రాష్ట్ర వైద్య బృందాలు సమన్వయంతో పనిచేస్తున్నాయని అధికారులు తెలిపారు. పరిస్థితిని ఎప్పటికప్పుడు సమీక్షిస్తూ అవసరమైన చర్యలు తీసుకుంటామని వెల్లడించారు.
Be the first to react
