Boat Accident: చేపల వేటకు వెళ్తే చేదు అనుభవం.. సముద్రంలో 15 కిలోమీటర్ల లోపల తగలబడిన బోటు!

• అందరినీ రక్షించిన మరో బోటులోని మత్స్యకారులు..
  
  
• భోజనం వండేందుకు స్టవ్ ఆన్ చేయగా అంటుకున్న మంటలు..

Boat Accident: ఆంధ్రప్రదేశ్ రాష్ట్రంలో ఇటీవల వరుసగా జరుగుతున్న మత్స్యకారుల బోటు ప్రమాదాలు తీరప్రాంత గ్రామాల్లోని ప్రజలను తీవ్ర భయాందోళనలకు గురిచేస్తున్నాయి. తాజాగా కాకినాడ జిల్లా తొండంగి మండల పరిధిలోని సముద్ర తీరంలో ఒక వేట పడవ ఘోర ప్రమాదానికి గురైంది. ఈ ప్రమాద ఘటనలో ఎల్లయ్యపేట గ్రామానికి చెందిన ఎరుపల్లి కోటేశ్, ఎరుపల్లి ప్రసాద్ అనే ఇద్దరు మత్స్యకారులు తీవ్రంగా గాయపడ్డారు. వీరు మరికొంతమంది తోటి వేటగాళ్లతో కలిసి సాంప్రదాయ బోటులో సముద్రంలోకి సుమారు 15 కిలోమీటర్ల దూరం వరకు చేపల వేటకు వెళ్లారు. అక్కడ మధ్యాహ్నం సమయంలో భోజనం వండుకునేందుకు గానూ బోటులో ఉన్న చిన్న గ్యాస్ స్టవ్ను ఆన్ చేయగా, ప్రమాదవశాత్తూ గ్యాస్ లీకై ఒక్కసారిగా మంటలు చెలరేగి క్షణాల వ్యవధిలోనే పడవ మొత్తానికి వ్యాపించాయి. మంటల తీవ్రతకు పడవ తగలబడిపోతుండటంతో ప్రాణాలు కాపాడుకునేందుకు అందులో ఉన్న మత్స్యకారులంతా ఒకరి తర్వాత ఒకరు సముద్రంలోకి దూకేశారు.

ఆ సమయంలో సమీపంలోనే వేరే బోటులో చేపల వేట సాగిస్తున్న తోటి మత్స్యకారులు సముద్రం మధ్యలో మంటలను గమనించి, హుటాహుటిన తమ పడవలతో సంఘటనా స్థలానికి చేరుకుని నీటిలో మునిగిపోతున్న వారందరినీ సురక్షితంగా రక్షించి ఒడ్డుకు చేర్చారు. అయితే ఈ మంటల్లో చిక్కుకుని తీవ్రంగా గాయపడిన కోటేశ్, ప్రసాద్లను వెంటనే కాకినాడ జిల్లా తుని పట్టణంలోని ఒక ప్రైవేటు ఆసుపత్రికి తరలించి అత్యవసర చికిత్స అందిస్తున్నారు. తీరప్రాంతంలో ఇప్పటికే జరిగిన ఒక భారీ బోటు ప్రమాదంలో ఆరుగురు మత్స్యకారులు సముద్రంలో గల్లంతై ఇంకా వారి ఆచూకీ లభించకపోగా, మరో ప్రమాదంలో 10 మంది మత్స్యకారులను కోస్ట్ గార్డ్ సిబ్బంది సురక్షితంగా కాపాడిన సంగతి తెలిసిందే. ఈ తాజా ప్రమాదంతో మత్స్యకార కుటుంబాలలో సముద్ర వేటకు వెళ్లాలంటేనే ఒకింత ఆందోళన వ్యక్తమవుతోంది.