12 ఏళ్లుగా అంతుచిక్కని ఎంహెచ్ 370 మిస్టరీ.. ఆ 239 మంది ఏమయ్యారంటే...!

• 239 మంది ప్రయాణికులు ఏమయ్యారు?.. వేల కోట్లు ఖర్చు పెట్టినా వీడని ఎంహెచ్ 370 మిస్టరీ!

• ట్రాన్స్‌పాండర్ ఆఫ్ చేసి సడెన్‌గా వెనక్కి మలుపు.. రాడార్ కన్నుగప్పి 7 గంటల పాటు ప్రయాణం!

• పైలట్ ఆత్మహత్యనా?.. హైజాకా?.. కాక్‌పిట్‌లో చెలరేగిన మంటలా?.. తెరపైకి మూడు భయంకర థియరీలు!

Malaysia: ప్రపంచ విమానయాన చరిత్రలోనే అత్యంత సంక్లిష్టమైన, అంతుచిక్కని మిస్టరీగా మిగిలిపోయింది మలేషియా ఎయిర్‌లైన్స్ ఫ్లైట్ 'ఎంహెచ్ 370' (MH370) దుర్ఘటన. మార్చి 8, 2014 అర్ధరాత్రి కౌలాలంపూర్ నుంచి చైనా రాజధాని బీజింగ్‌కు బయలుదేరిన ఈ బోయింగ్ 777 విమానంలో ఇద్దరు చంటిపిల్లలతో సహా భారత్, చైనా, ఆస్ట్రేలియా, అమెరికా తదితర దేశాలకు చెందిన మొత్తం 239 మంది ఉన్నారు. విమానం గాల్లోకి ఎగిరిన గంట తర్వాత వియత్నాం ఎయిర్‌స్పేస్‌లోకి ప్రవేశిస్తున్న వేళ కాక్‌పిట్ నుంచి కెప్టెన్ "గుడ్ నైట్ మలేషియన్ 370" అని చివరిసారిగా మాట్లాడారు. ఆ తర్వాతే ఊహించని పరిణామాలు చోటుచేసుకున్నాయి.

ట్రాన్స్‌పాండర్ ఆఫ్ – రాడార్ల నుంచి మాయం

చివరి సందేశం వెళ్లిన కొద్ది నిమిషాలకే విమానం ఎక్కడుందో తెలిపే ట్రాన్స్‌పాండర్ సిస్టమ్ మాన్యువల్‌గా ఆఫ్ చేయబడింది. రాడార్ స్క్రీన్‌ల నుంచి విమానం అదృశ్యమైంది. చైనా వైపు వెళ్లాల్సిన విమానం హఠాత్తుగా వెనక్కి తిరిగి మలేషియా మీదుగా అండమాన్ సముద్రం వైపు మళ్లింది. మిలిటరీ రాడార్లలో కొంత దూరం కనిపించినప్పటికీ, ఆ తర్వాత పూర్తిగా సిగ్నల్స్ నిలిచిపోయాయి. అయితే ఉపగ్రహాల డేటా ప్రకారం రాడార్ల నుంచి తప్పించుకున్న తర్వాత కూడా ఆ విమానం మరో 6 నుంచి 7 గంటల పాటు గాల్లో ఎగురుతూనే ఉందని తేలింది. ఇంధనం అయిపోయాక దక్షిణ భారత మహాసముద్రంలో కూలిపోయి ఉంటుందని నిర్ధారించారు.

చరిత్రలోనే అతిపెద్ద సెర్చ్ ఆపరేషన్ – దొరికిన శకలాలు

విమానం ఆచూకీ కోసం ఆస్ట్రేలియా, మలేషియా, చైనా సహా పలు దేశాలు వేల కోట్ల రూపాయలు ఖర్చు చేసి సముద్రం అడుగుభాగం వరకు మునుపెన్నడూ చూడని రీతిలో భారీ గాలింపు చర్యలు చేపట్టాయి. 2015లో ఆఫ్రికా తీరంలోని రీయూనియన్ ఐలాండ్‌లో విమానం రెక్క భాగం కొట్టుకొచ్చింది. ఆ తర్వాత మారిషస్, మడగాస్కర్‌లలో దాదాపు 30కి పైగా శకలాలు దొరికాయి. విమానం సముద్రంలో కూలిపోయిందని చెప్పడానికి ఇవి ఆధారంగా మారినప్పటికీ, ప్రధాన విమాన శకలాలు, బ్లాక్ బాక్స్ మరియు ప్రయాణికుల మృతదేహాలు మాత్రం ఇప్పటివరకు లభించలేదు.

మానవ ప్రమేయంపై ఫైనల్ రిపోర్ట్ – షాకింగ్ నిజాలు

2018లో విడుదలైన అధికారిక నివేదిక ప్రకారం విమానంలో ఎలాంటి సాంకేతిక లోపం లేదని స్పష్టమైంది. కమ్యూనికేషన్ వ్యవస్థలన్నీ ఎవరో ఉద్దేశపూర్వకంగా కావాలనే ఆఫ్ చేశారని, ఇది మానవ ప్రమేయంతో జరిగిన చర్యేనని తేలింది. ఈ క్రమంలో మూడు ప్రధాన థియరీలు తెరపైకి వచ్చాయి. మొదటిది కెప్టెన్ జహారి అహ్మద్ షా ఉద్దేశపూర్వకంగా ఆక్సిజన్ కట్ చేసి సామూహిక హత్యకు లేదా ఆత్మహత్యకు పాల్పడ్డారా? అనే అనుమానం. ఎందుకంటే ఆయన ఇంట్లోని కంప్యూటర్ ఫ్లైట్ సిమ్యులేటర్‌లో అదృశ్యమైన రూట్‌లోనే ప్రాక్టీస్ చేసినట్లు విచారణలో వెల్లడైంది.

హైజాక్ లేదా కాక్‌పిట్ ప్రమాదం థియరీలు

రెండవ థియరీ ప్రకారం విమానంలో ప్రయాణిస్తున్న కొందరు వ్యక్తులు కాక్‌పిట్‌ను హైజాక్ చేసి తమ ఆధీనంలోకి తీసుకున్నారా? అనే వాదన ఉంది. మూడవది, కాక్‌పిట్‌లో అనుకోకుండా అగ్నిప్రమాదం జరిగి విషపూరిత పొగ వల్ల పైలట్లు, ప్రయాణికులు స్పృహ తప్పిపోగా విమానం ఆటో-పైలట్ మోడ్‌లో ఇంధనం అయిపోయేంతవరకు సముద్రం వైపు వెళ్లిపోయిందా? అనేది. అయితే ఈ థియరీలలో దేన్నీ అధికారికంగా నిరూపించలేకపోయారు.

ఆగని అన్వేషణ – కన్నీటి నిరీక్షణ

ఏళ్లు గడుస్తున్నా ఈ మిస్టరీకి తెరపడలేదు. 'ఓషన్ ఇన్ఫినిటీ' అనే అంతర్జాతీయ సంస్థ ఆధ్వర్యంలో దక్షిణ భారత మహాసముద్రంలో ఇప్పటికీ లోతైన అన్వేషణ సాగుతోంది. విజ్ఞాన శాస్త్రం, ఆధునిక సాంకేతికత ఇంతగా పురోగమించిన కాలంలో కూడా 239 మందితో వెళ్లిన భారీ విమానం జాడ తెలియకపోవడం ప్రపంచానికి పెను సవాలుగా నిలిచింది. తమ ఆత్మీయులు ఎప్పటికైనా తిరిగి రాకపోతారా అనే చిన్న ఆశతో ఆ కుటుంబాలు ఇప్పటికీ కన్నీటితో ఎదురుచూస్తున్నాయి.