Indigo: విమాన ప్రయాణానికి కొత్త సౌకర్యం.. ‘క్యాబ్స్ విత్ ఇండిగో’ సేవలు ప్రారంభం!

ఎయిర్‌పోర్ట్ ప్రయాణం మరింత ఈజీ.. ఇండిగో క్యాబ్ సేవలకు శ్రీకారం..

రూ.49 నుంచి క్యాబ్ సౌకర్యం.. ప్రయాణికులకు ఇండిగో కొత్త ఆఫర్..

న్యూఢిల్లీ: విమాన ప్రయాణాన్ని మరింత సులభంగా, సౌకర్యవంతంగా మార్చే దిశగా ప్రముఖ విమానయాన సంస్థ ఇండిగో మరో కొత్త సేవను ప్రారంభించింది. విమాన టికెట్లతో పాటు ప్రయాణికులకు ఎయిర్‌పోర్ట్‌కు వెళ్లడం, తిరిగి ఇంటికి చేరుకోవడం కూడా సులభం చేయడానికి ‘క్యాబ్స్ విత్ ఇండిగో’ అనే కొత్త ఎయిర్‌పోర్ట్ ట్రాన్స్‌ఫర్ సర్వీస్‌ను అందుబాటులోకి తీసుకొచ్చింది.

జూన్ 18న ప్రకటించిన ఈ సేవను ప్రయాణికులు ఇండిగో వెబ్‌సైట్, మొబైల్ యాప్ ద్వారా బుక్ చేసుకోవచ్చు. ఇక నుంచి ఫ్లైట్ బుకింగ్‌తో పాటు ఎయిర్‌పోర్ట్ క్యాబ్‌ను కూడా ఒకే ప్లాట్‌ఫామ్‌లో ముందుగానే రిజర్వ్ చేసుకునే అవకాశం ఉంటుంది.

ఎయిర్‌పోర్ట్‌కు వెళ్లే సమయంలో క్యాబ్ లభించకపోవడం, చివరి నిమిషంలో బుకింగ్ రద్దు కావడం, డిమాండ్ పెరిగినప్పుడు అధిక ధరలు చెల్లించాల్సి రావడం వంటి సమస్యలు ప్రయాణికులకు ఎదురవుతుంటాయి.

ఈ సమస్యలను తగ్గించేందుకు ‘క్యాబ్స్ విత్ ఇండిగో’ సేవను ప్రారంభించినట్లు సంస్థ తెలిపింది. ఈ సేవను మోజోబాక్స్ (Mojoboxx) సాంకేతిక భాగస్వామ్యంతో అందిస్తోంది.

‘క్యాబ్స్ విత్ ఇండిగో’లో ప్రయాణికులకు పలు సౌకర్యాలు అందుబాటులో ఉంటాయి. అందులో కేవలం రూ.49 నుంచి క్యాబ్ బుకింగ్ అవకాశం, 100 శాతం రైడ్ కన్ఫర్మేషన్, ఖచ్చితమైన పికప్ హామీ, ముందస్తు బుకింగ్‌లకు పారదర్శక ధరలు, సర్జ్ ప్రైసింగ్ లేకుండా ప్రయాణం, పికప్ సమయం వరకు ఉచిత క్యాన్సిలేషన్ సౌకర్యం, క్యాబ్ కోసం 30 నిమిషాల ఉచిత వేచి ఉండే సమయం. ఈ సేవ ద్వారా ప్రయాణికులు విమానం ఎక్కే ముందు, ల్యాండ్ అయిన తర్వాత తమ ప్రయాణాన్ని మరింత సులభంగా పూర్తి చేసుకోవచ్చని ఇండిగో పేర్కొంది.

ఇండిగో తన లాయల్టీ ప్రోగ్రామ్ అయిన ఇండిగో బ్లూచిప్ (BluChip) తో ఈ క్యాబ్ సేవను అనుసంధానం చేసింది. క్యాబ్స్ విత్ ఇండిగో ద్వారా బుకింగ్ చేసే సభ్యులకు ప్రతి రూ.100 ఖర్చుపై 5 ఇండిగో బ్లూచిప్స్ రివార్డులుగా లభిస్తాయి. అంటే విమాన ప్రయాణంలోనే కాకుండా ఎయిర్‌పోర్ట్ ట్రాన్స్‌ఫర్ సమయంలో కూడా ప్రయాణికులు రివార్డులు పొందే అవకాశం ఉంటుంది.

విమాన ప్రయాణానికి మాత్రమే పరిమితం కాకుండా, ప్రయాణికులకు అవసరమైన అన్ని సేవలను ఒకే వేదికపై అందించాలనే లక్ష్యంతో ఇండిగో ఈ చర్య తీసుకుంది.

ఇటీవల ఇండిగో 7 లక్షలకు పైగా హోటల్ స్టే ఆప్షన్లు, ప్రత్యేక సైట్‌సీయింగ్ అనుభవాలను కూడా అందుబాటులోకి తీసుకొచ్చింది. ఇప్పుడు ఎయిర్‌పోర్ట్ క్యాబ్ సేవను జోడించడం ద్వారా ప్రయాణ అనుభవాన్ని మరింత విస్తరించింది.

ఇండిగో చీఫ్ డిజిటల్ అండ్ ఇన్ఫర్మేషన్ ఆఫీసర్ నీతన్ చోప్రా మాట్లాడుతూ, “మా లక్ష్యం కేవలం విమానాలను నడపడం మాత్రమే కాదు.. ప్రయాణికులు ఇంటి నుంచి బయలుదేరినప్పటి నుంచి గమ్యస్థానానికి చేరుకునే వరకు ప్రతి దశలో సౌకర్యవంతమైన అనుభవం అందించడమే” అని తెలిపారు. ‘క్యాబ్స్ విత్ ఇండిగో’ ద్వారా ప్రయాణం మరింత సులభంగా, నమ్మకంగా, ఒత్తిడి లేకుండా మారుతుందని ఆయన చెప్పారు.

ప్రయాణికులు ఇండిగో అధికారిక వెబ్‌సైట్ లేదా మొబైల్ యాప్‌లోకి వెళ్లి తమ ఫ్లైట్ వివరాలతో పాటు క్యాబ్ సర్వీస్‌ను కూడా బుక్ చేసుకోవచ్చు. విమాన ప్రయాణంతో పాటు నేలపై ప్రయాణాన్ని కూడా సులభతరం చేయాలనే ఉద్దేశంతో ఇండిగో తీసుకొచ్చిన ఈ కొత్త సేవ ప్రయాణికులకు మరింత సౌకర్యాన్ని అందించనుంది.