బండారం బట్టబయలు... పుల్లారెడ్డి స్వీట్స్ లైసెన్స్ సస్పెండ్!

• పుల్లారెడ్డి స్వీట్స్తో పాటు మొత్తం 5 ప్రముఖ సంస్థల లైసెన్సులు రద్దు!

• అమెరికాకు సైతం ఎగుమతి అయ్యే ప్రముఖ బ్రాండ్‌లో అపరిశుభ్రత చూసి అధికారులే షాక్!

• చార్మినార్ ఆగ్రా మిఠాయి, వనస్థలిపురం స్వీట్ వన్ రుచులు, ఫలక్‌నుమా బాలాజీలపై వేటు!

Telangana: దీపావళి పండుగ సమీపిస్తుండటంతో ప్రజలు పెద్ద ఎత్తున మిఠాయిలు కొనుగోలు చేస్తారన్న ఉద్దేశంతో వ్యాపారులు నాణ్యతా ప్రమాణాలను గాలికొదిలేస్తున్న వైనంపై తెలంగాణ ఆహార భద్రతా విభాగం (TG-SAFE) రంగంలోకి దిగింది. 13 ప్రత్యేక బృందాలతో గ్రేటర్ హైదరాబాద్ పరిధిలోని 16 ప్రధాన స్వీట్ తయారీ కేంద్రాలు, దుకాణాలపై విస్తృత తనిఖీలు నిర్వహించారు. ఈ దాడుల్లో నగరవ్యాప్తంగా మొత్తం రూ. 16.86 లక్షల విలువ చేసే 3,546 కిలోల కల్తీ, పాడైపోయిన ఆహార పదార్థాలను అధికారులు గుర్తించి స్వాధీనం చేసుకున్నారు.

సనత్‌నగర్ పుల్లారెడ్డి స్వీట్స్‌లో దిగ్భ్రాంతికర పరిస్థితులు

తెలుగు రాష్ట్రాలతో పాటు విదేశాలకు, ముఖ్యంగా అమెరికాకు సైతం ఎగుమతి చేసేంత బ్రాండ్ ఇమేజ్ ఉన్న హైదరాబాద్‌లోని ప్రఖ్యాత 'జి. పుల్లారెడ్డి స్వీట్స్' తయారీ కేంద్రంలో భయంకరమైన పరిస్థితులు బయటపడ్డాయి. సనత్‌నగర్‌లోని తయారీ యూనిట్‌ను తనిఖీ చేసిన అధికారులకు అక్కడ ఎలుకల వ్యర్థాలు, కుళ్లిన కూరగాయలు, అపరిశుభ్రమైన వంటగదులు కనిపించడంతో మైండ్ బ్లాంక్ అయ్యింది. గడువు ముగిసిన (Expired) నిల్వలతో స్వీట్లు తయారు చేస్తున్నట్లు అధికారులు కనుగొన్నారు.

రూ. 15 లక్షల విలువైన 3,133 కేజీల నిల్వల ధ్వంసం – లైసెన్స్ సస్పెండ్

పుల్లారెడ్డి స్వీట్స్ యూనిట్ నుంచి ఏకంగా రూ. 15 లక్షల విలువైన 3,133 కిలోల ప్రమాదకర, నాసిరకం ఆహార పదార్థాలను అధికారులు సీజ్ చేసి అక్కడికక్కడే పూర్తిగా ధ్వంసం చేశారు. ప్రజారోగ్యానికి తీవ్ర విఘాతం కలిగిస్తున్నందుకు గాను సనత్‌నగర్ పుల్లారెడ్డి స్వీట్స్ లైసెన్స్‌ను అధికారులు తక్షణమే సస్పెండ్ చేశారు. స్వచ్ఛమైన నెయ్యి స్వీట్లకు మారుపేరుగా చెప్పుకునే ఇంత పెద్ద బ్రాండ్‌లో ఈ స్థాయి అపరిశుభ్రత బయటపడటం నగర ప్రజలను తీవ్ర దిగ్భ్రాంతికి గురిచేసింది.

మరో 4 ప్రముఖ సంస్థల లైసెన్సులు రద్దు

పుల్లారెడ్డి స్వీట్స్తో పాటు సరైన లైసెన్సులు లేకుండా, కల్తీ నిల్వలతో వ్యాపారాలు సాగిస్తున్న మరో నాలుగు ప్రముఖ స్వీట్ సంస్థల లైసెన్సులను కూడా టీజీ-సేఫ్ అధికారులు సస్పెండ్ చేశారు. చార్మినార్ సమీపంలోని ఆగ్రా మిఠాయి ఘర్, వనస్థలిపురంలోని స్వీట్ వన్ రుచులు, ఫలక్‌నుమాలోని బాలాజీ శ్రీకిషన్ బాయి బండార్, కాటేదాన్‌లోని హిరాణి ఫుడ్స్‌పై కఠిన చర్యలు తీసుకున్నారు. అలాగే చాంపేట్ బాలాజీ స్వీట్స్, సికింద్రాబాద్ మమతా స్వీట్ హౌస్‌లతో కలిపి మొత్తం 22 ఆహార నమూనాలను సేకరించి ఫోరెన్సిక్ ల్యాబ్ పరీక్షలకు పంపించారు.

కల్తీ వ్యాపారులపై అధికారుల ఉక్కుపాదం

ప్రజారోగ్యంతో చెలగాటమాడే ఏ ఒక్క సంస్థను విడిచిపెట్టే ప్రసక్తే లేదని ఆహార భద్రతా అధికారులు హెచ్చరించారు. గతంలో పేరెన్నికగన్న రెస్టారెంట్లు, బిర్యానీ హోటళ్లలో కుళ్లిన మాంసం నిల్వలను పట్టుకున్నట్లే, ఇప్పుడు స్వీట్ల కల్తీ నెట్‌వర్క్‌ను కూకటివేళ్లతో తొలగించేందుకు తనిఖీలను ముమ్మరం చేశారు. లైసెన్సులు లేకుండా వ్యాపారం చేస్తున్న దుకాణాలపై క్రిమినల్ కేసులు నమోదు చేయాలని ఆదేశించారు.