అర్నబ్ తుపాన్ నష్టంపై స్పందించిన ఎస్‌బీఐ.. CM నిధికి రూ.5.01 కోట్ల సాయం!

• అర్నబ్ తుపాన్ బాధితులను ఆదుకునేందుకు ఎస్‌బీఐ ముందుకొచ్చింది.
• ఎస్‌బీఐ ఎండీ అమర రామ్మోహన్ రావు బృందం సీఎం చంద్రబాబుకు రూ.5.01 కోట్ల విరాళం అందించింది.

అమరావతి: అర్నబ్ తుపాన్‌తో తీవ్రంగా నష్టపోయిన ఆంధ్రప్రదేశ్‌ను ఆదుకునేందుకు స్టేట్ బ్యాంక్ ఆఫ్ ఇండియా (ఎస్‌బీఐ) ముందుకొచ్చింది. తుపాన్ బాధితులకు సహాయం అందించేందుకు ముఖ్యమంత్రి సహాయ నిధికి రూ.5.01 కోట్ల విరాళాన్ని ప్రకటించింది.

ఈ మేరకు ఎస్‌బీఐ మేనేజింగ్ డైరెక్టర్ అమర రామ్మోహన్ రావు నేతృత్వంలోని ప్రతినిధి బృందం శనివారం అమరావతిలో ముఖ్యమంత్రి చంద్రబాబును క్యాంపు కార్యాలయంలో కలిసింది. ఈ సందర్భంగా రూ.5 కోట్ల 1 లక్షకు సంబంధించిన చెక్కును సీఎంకు అందజేసింది.

తుపాన్ కారణంగా నష్టపోయిన ప్రజలను ఆదుకునేందుకు ఉదారంగా విరాళం అందించిన ఎస్‌బీఐ యాజమాన్యానికి ముఖ్యమంత్రి చంద్రబాబు కృతజ్ఞతలు తెలిపారు. విపత్కర పరిస్థితుల్లో బాధితులకు అండగా నిలవడం అభినందనీయమని పేర్కొన్నారు.

ఈ కార్యక్రమంలో ఎస్‌బీఐ అమరావతి సర్కిల్ సీజీఎం సుశీల్ కుమార్, జీఎం కుందన్ జ్యోతి, ఏజీఎం షేక్ షమీన్ భాను తదితరులు పాల్గొన్నారు.