UIDAI New Guidelines: బిగ్ అలర్ట్.. మీ ఆధార్లో ఆ తప్పులున్నాయా? ఇకపై ఒక్క ఛాన్స్ మాత్రమే!
Aadhaar Card Update Rules 2026: ఆధార్ కార్డులో పుట్టిన తేదీ లింగం వంటి వివరాలను మార్చుకోవాలనుకుంటున్నారా? యూఐడీఏఐ తెచ్చిన కొత్త నిబంధనల ప్రకారం వీటిని జీవితంలో ఒక్కసారి మాత్రమే అప్డేట్ చేయగలరు.
Aadhaar Card Update Rules 2026: మన దేశంలో ఆధార్ కార్డు లేనిదే ఏ పనీ జరగడం లేదు. ప్రభుత్వ పథకాలు కావాలన్నా, బ్యాంక్ ఖాతా తెరవాలన్నా, చివరకు సిమ్ కార్డు తీసుకోవాలన్నా ఆధార్ తప్పనిసరి. అయితే, చాలామంది తమ ఆధార్లోని తప్పులను సరిదిద్దుకోవడానికి పదే పదే అప్డేట్లు చేస్తుంటారు. ఇలాంటి వారిని నియంత్రించేందుకు 'యూనిక్ ఐడెంటిఫికేషన్ అథారిటీ ఆఫ్ ఇండియా' (UIDAI) కీలక నిర్ణయం తీసుకుంది. ఇకపై కొన్ని వివరాలను జీవితంలో ఒక్కసారి మాత్రమే మార్చుకునేలా కఠిన నిబంధనలను అమలులోకి తెచ్చింది.
ముఖ్యంగా పుట్టిన తేదీ లింగం విషయంలో అధికారులు అత్యంత కఠినంగా వ్యవహరిస్తున్నారు. గతంలో చాలామంది వయస్సును పెంచి చూపించి పింఛన్లు పొందడం లేదా ఇతర ప్రభుత్వ ఫలాలను అక్రమంగా పొందడం వంటి ఘటనలు వెలుగుచూశాయి. ఇలాంటి మోసాలకు అడ్డుకట్ట వేయాలనే ఉద్దేశంతో, పుట్టిన తేదీని కేవలం ఒక్కసారి మాత్రమే మార్చుకునే అవకాశం కల్పించారు. ఒకసారి అప్డేట్ చేసిన తర్వాత మళ్లీ మార్చడం దాదాపు అసాధ్యమని అధికారులు స్పష్టం చేస్తున్నారు.
అయితే, పేరు మార్పు విషయంలో స్వల్ప వెసులుబాటు ఉంది. పేరులో ఏవైనా అక్షర దోషాలు ఉంటే జీవితంలో రెండు సార్లు మార్చుకునే అవకాశం ఉంటుంది. కానీ, చిరునామా మొబైల్ నంబర్, ఫోటో బయోమెట్రిక్ వివరాలను మాత్రం అవసరమైన ఎన్నిసార్లయినా అప్డేట్ చేసుకోవచ్చు. ఈ మార్పుల కోసం యూఐడీఏఐ నిర్ణయించిన రుసుమును చెల్లించాల్సి ఉంటుంది. మార్పులు చేసే సమయంలో సరైన ధృవీకరణ పత్రాలను సమర్పించడం తప్పనిసరి.
సామాన్యులకు ఈ ప్రక్రియను మరింత సులభతరం చేసేందుకు అధికారులు సరికొత్త ఆధార్ మొబైల్ యాప్ను అందుబాటులోకి తెచ్చారు. గతంలో చిన్న మార్పు చేయాలన్నా ఆధార్ సెంటర్ల చుట్టూ తిరగాల్సి వచ్చేది. ముఖ్యంగా గ్రామీణ ప్రాంత ప్రజలు పట్టణాలకు వెళ్లలేక ఇబ్బంది పడేవారు. ఇప్పుడు ఆ అవసరం లేకుండా, ఇంట్లోనే కూర్చుని స్మార్ట్ఫోన్ ద్వారా పుట్టిన తేదీ వంటి వివరాలను అప్డేట్ చేసుకోవచ్చు. ఇందుకోసం టెన్త్ క్లాస్ సర్టిఫికేట్ లేదా బర్త్ సర్టిఫికేట్ వంటి స్కాన్ చేసిన కాపీలను అప్లోడ్ చేయాల్సి ఉంటుంది.
నిబంధనలు కఠినతరం కావడంతో, ఆధార్ వివరాలను నమోదు చేసేటప్పుడు లేదా అప్డేట్ చేసేటప్పుడు ప్రజలు ఆచితూచి వ్యవహరించాలని నిపుణులు సూచిస్తున్నారు. ఒక్క చిన్న పొరపాటు జరిగినా, భవిష్యత్తులో అది మీ గుర్తింపు కార్డుపై శాశ్వతంగా ఉండిపోయే ప్రమాదం ఉంది. కాబట్టి, ఆధార్ సెంటర్కు వెళ్లినప్పుడు ఆపరేటర్ ఎంటర్ చేస్తున్న వివరాలను క్షుణ్ణంగా పరిశీలించుకోవాలి. ముఖ్యంగా పుట్టిన తేదీని మార్చే ముందు అది సరైనదేనా కాదా అని ఒకటికి రెండుసార్లు సరిచూసుకోవడం ఉత్తమం.
Be the first to react
