జగన్ కి ఘోర పరాభవం! సొంత నియోజకవర్గాన్ని ఊడ్చేసిన తెలుగుదేశం!

• ఏడు ఎంపీపీ పదవులూ కూటమి ఖాతాలోకి.. సొంత గడ్డపై వైకాపాకు కోలుకోలేని దెబ్బ!

• పులివెందుల మున్సిపల్ పోరు: 40 వార్డుల్లో సగానికి సగం స్థానాలు ఏకగ్రీవం!

• 'గూబ గుయ్' అన్న కొద్ది గంటల్లోనే షాక్: జగన్ వ్యాఖ్యలపై తెదేపా శ్రేణుల కౌంటర్!

Pulivendula: 2024 సార్వత్రిక ఎన్నికలకు ముందు 'వైనాట్ 175.. వైనాట్ కుప్పం' అంటూ వైకాపా అధ్యక్షుడు వై.ఎస్. జగన్మోహన్ రెడ్డి పార్టీ శ్రేణుల్లో విపరీతమైన అతి విశ్వాసాన్ని నింపే ప్రయత్నం చేశారు. కుప్పంలో కూడా తామే గెలుస్తామని పదేపదే ధీమా వ్యక్తం చేసినప్పటికీ, తీరా సార్వత్రిక ఎన్నికల్లో వైకాపా రాష్ట్రవ్యాప్తంగా కేవలం 11 అసెంబ్లీ స్థానాలకే పరిమితమై ప్రతిపక్ష హోదాను కూడా కోల్పోయింది. అయితే ఆ పరాభవం కేవలం అసెంబ్లీ ఎన్నికలతోనే ఆగిపోలేదు. ఇప్పుడు ఆయన సొంత నియోజకవర్గమైన పులివెందుల గడ్డపైనే పార్టీకి తీవ్రమైన ఎదురుగాలి వీస్తోంది. తాజాగా జరుగుతున్న స్థానిక సంస్థల ఎన్నికల్లో ఆ పార్టీకి ఊహించని రీతిలో ఘోర పరాభవం ఎదురవుతోంది.

తాజాగా జరిగిన పులివెందుల స్థానిక సంస్థల ఎన్నికల ఫలితాలు రాజకీయ విశ్లేషకులను సైతం విస్మయానికి గురిచేస్తున్నాయి. పులివెందుల పురపాలక సంఘం ఎన్నికల్లో మొత్తం 40 వార్డులు ఉండగా, అందులో ఏకంగా 20 వార్డులను కూటమి అభ్యర్థులు ఏకగ్రీవంగా కైవసం చేసుకున్నారు. అంతటితో ఆగకుండా, నియోజకవర్గ వ్యాప్తంగా ఉన్న మొత్తం 65 ఎంపీటీసీ స్థానాలకు గానూ ఏకంగా 64 ఎంపీటీసీ స్థానాలు కూటమి అభ్యర్థులకే ఏకగ్రీవం కావడం చారిత్రక రికార్డుగా నిలిచింది. దీంతో నియోజకవర్గ పరిధిలోని మొత్తం ఏడు మండల పరిషత్ (ఎంపీపీ) పదవులను కూటమి క్లీన్ స్వీప్ చేయనుంది. అలాగే ఏడు జడ్పీటీసీ స్థానాలకు గానూ మూడు స్థానాలు ఇప్పటికే కూటమి పక్షాన ఏకగ్రీవమయ్యాయి.

ఈ రాజకీయ పరిణామాల వేళ జగన్ చేసిన వ్యాఖ్యలు రాష్ట్రవ్యాప్తంగా తీవ్ర చర్చనీయాంశంగా మారాయి. మంగళవారం పులివెందులలో నిర్వహించిన పార్టీ కార్యకర్తల సమావేశంలో జగన్ మాట్లాడుతూ.. 'పులివెందులలో గూబ గుయ్‌మనిపిస్తే ఆ సౌండ్ రాష్ట్రమంతా మోగాలి' అంటూ కార్యకర్తలను రెచ్చగొట్టేలా తీవ్ర వ్యాఖ్యలు చేశారు. అయితే ఆయన ఆ వ్యాఖ్యలు చేసిన కొద్ది గంటల వ్యవధిలోనే జడ్పీటీసీ, ఎంపీటీసీ, మున్సిపల్ వార్డుల ఏకగ్రీవాల ఫలితాలు వెలువడ్డాయి. 64 ఎంపీటీసీలు, సగం మున్సిపల్ వార్డులను కూటమి గెలుచుకున్న తీరు చూశాక, అసలు ఎవరి చెంప గుయ్‌మందో ఇప్పుడు స్పష్టంగా తేలిపోయిందని తెదేపా శ్రేణులు ఘాటుగా కౌంటర్ ఇస్తున్నాయి.

పులివెందుల నియోజకవర్గ రాజకీయ చరిత్రను పరిశీలిస్తే 1978 నుంచి అక్కడ వైఎస్ కుటుంబం ఆధిపత్యమే నిరంతరాయంగా కొనసాగుతూ వచ్చింది. వైఎస్ కుటుంబంపై స్థానికంగా అసంతృప్తి, తీవ్ర వ్యతిరేకత ఉన్నప్పటికీ, వారికి ఎదురెళ్లలేక ప్రజలు, ప్రతిపక్షాలు భయంతో అణిగిమణిగి ఉండేవారు. వారి ఫ్యాక్షన్ రాజకీయాలకు, దాడులకు భయపడి గతంలో చాలా సందర్భాల్లో ప్రత్యర్థులు నామినేషన్లు వేసేందుకు కూడా ముందుకు వచ్చేవారు కాదు. వైఎస్ రాజశేఖరరెడ్డి కడప ఎంపీగా ఉన్న సమయంలో 1995లో జరిగిన స్థానిక సంస్థల ఎన్నికల్లో మాత్రమే లింగాల, వేముల, వేంపల్లె జడ్పీటీసీ స్థానాలను, వేంపల్లె, వేముల ఎంపీపీ పదవులను తెదేపా గెలుచుకుంది. ఆ తర్వాత తెదేపా ఎన్నడూ అక్కడ గెలవలేకపోయింది.

ఆ తదనంతర కాలంలో వైఎస్ రాజశేఖరరెడ్డి, ఆ తర్వాత వై.ఎస్. జగన్మోహన్ రెడ్డి ముఖ్యమంత్రులుగా పనిచేయడంతో పులివెందుల నియోజకవర్గంపై వారి పట్టు మరింత బిగుసుకుంది. వైఎస్ కుటుంబమే దశాబ్దాల పాటు ఈ నియోజకవర్గాన్ని శాసించింది. అయితే అక్కడి వివిధ వర్గాల ప్రజల్లో ఇన్నాళ్లూ గూడుకట్టుకున్న తీవ్ర అసంతృప్తి, నిరంకుశత్వంపై వ్యతిరేకత ఇప్పుడు లావాలా పెల్లుబికింది. దశాబ్దాల చరిత్రలో మొదటిసారి వైకాపా స్థానిక సంస్థల ఎన్నికల్లో అన్ని స్థానాలకు కనీసం నామినేషన్లు కూడా వేయలేక చేతులెత్తేయడం, అంతటి బేలగా మారిపోవడం రాజకీయ వర్గాలతో పాటు స్వయంగా తెదేపా వర్గాలనూ తీవ్ర ఆశ్చర్యానికి గురిచేస్తోంది.

గతంలో మాదిరిగా వైకాపా నాయకులు లేదా అభ్యర్థులు భయపడేంతగా క్షేత్రస్థాయిలో ఎక్కడా ఎలాంటి గొడవలు జరగలేదు. ఆ పార్టీ అభ్యర్థులను ఎవరైనా నామినేషన్లు వేయకుండా అడ్డుకున్నారా అంటే అదీ లేదు. అయినప్పటికీ కనీస పోటీ కూడా ఇవ్వకుండా మెజారిటీ స్థానాల్లో వైకాపా నామినేషన్లు వేయకుండా తప్పుకోవడం రాష్ట్రవ్యాప్తంగా పెను సంచలనంగా మారింది. వాస్తవానికి ఆరు నెలల క్రితం పులివెందుల జడ్పీటీసీ స్థానానికి జరిగిన ఉప ఎన్నికలో తెదేపా అనూహ్య విజయం సాధించిన నాటి నుంచే వైకాపాకు ఎదురుగాలి మొదలైంది. ఇప్పుడు పులివెందుల మున్సిపాలిటీ చైర్‌పర్సన్ పీఠాన్ని దక్కించుకునేందుకు హోరాహోరీగా పోరు సాగుతుండటంతో కంచుకోటపై పట్టు సాధించే దిశగా కూటమి దూసుకుపోతోంది.