మాజీ మంత్రి విడదల రజినికి షాక్! టీడీపీలో చేరిన వైసీపీ ఛైర్‌పర్సన్!

• చిలకలూరిపేటలో తిరిగిన చక్రం.. భర్త యూసఫ్ అలీతో కలిసి పచ్చ కండువా కప్పుకున్న కరీమూన్!

• జనసేన అభ్యర్థి తోట రాజరాజేశ్వరికి పూర్తి మద్దతు ప్రకటించిన వైసీపీ మాజీ చైర్‌పర్సన్ క్యాండిడేట్!

• ఎమ్మెల్యే ప్రత్తిపాటి పుల్లారావు సమక్షంలో చేరిక.. కూటమి తరఫున ప్రచారం చేస్తానని ప్రకటన!

Chilakaluripet: ఆంధ్రప్రదేశ్ స్థానిక సంస్థల ఎన్నికల సమరంలో పల్నాడు జిల్లా చిలకలూరిపేట రాజకీయాలు అనూహ్య మలుపు తిరిగాయి. వైసీపీ కీలక నేత, మాజీ మంత్రి విడదల రజినికి సొంత నియోజకవర్గంలో ఊహించని షాక్ తగిలింది. చిలకలూరిపేట మున్సిపల్ ఛైర్‌పర్సన్ పదవి కోసం రజిని స్వయంగా ఎంపిక చేసి రంగంలోకి దించిన వైఎస్సార్‌సీపీ అధికారిక అభ్యర్థిని షేక్ కరీమూన్ పోలింగ్‌కు ముందే పార్టీకి గుడ్‌బై చెప్పారు. ఆదివారం రాష్ట్ర ఎన్నికల సంఘం (SEC) అభ్యర్థుల తుది జాబితా ప్రకటించిన వెంటనే ఈ నాటకీయ పరిణామం చోటుచేసుకుంది.

ప్రత్తిపాటి సమక్షంలో చేరిక – జనసేన అభ్యర్థికి మద్దతు

షేక్ కరీమూన్ తన భర్త యూసఫ్ అలీతో కలిసి స్థానిక ఎమ్మెల్యే, మాజీ మంత్రి ప్రత్తిపాటి పుల్లారావు సమక్షంలో తెలుగుదేశం పార్టీలో చేరారు. చిలకలూరిపేట మున్సిపల్ కూటమి (జనసేన) ఛైర్‌పర్సన్ అభ్యర్థిని తోట రాజరాజేశ్వరి సమక్షంలో ప్రత్తిపాటి పుల్లారావు వారికి పసుపు కండువాలు కప్పి పార్టీలోకి ఆహ్వానించారు. ఈ సందర్భంగా కరీమూన్ మాట్లాడుతూ, రాబోయే ఎన్నికల్లో కూటమి అభ్యర్థి తోట రాజరాజేశ్వరి విజయానికి సంపూర్ణంగా సహకరిస్తామని, కూటమి తరఫునే పట్టణంలో ప్రచారం నిర్వహిస్తామని ప్రకటించారు.

అభివృద్ధిలో భాగస్వామ్యం కోసమే చేరిక – కరీమూన్ స్పష్టీకరణ

తాను వైఎస్సార్‌సీపీకి రాజీనామా చేయడానికి గల కారణాలను కరీమూన్ వివరించారు. ఎమ్మెల్యే ప్రత్తిపాటి పుల్లారావు చొరవతో, కూటమి ప్రభుత్వ సహకారంతో చిలకలూరిపేట పట్టణంలో శరవేగంగా జరుగుతున్న అభివృద్ధి పనులకు తాము ఆకర్షితులమయ్యామని తెలిపారు. పేట సమగ్ర అభివృద్ధిలో తాము కూడా భాగస్వాములు కావాలనే సదుద్దేశంతోనే టీడీపీలో చేరినట్లు స్పష్టం చేశారు. స్వలాభం చూడకుండా ప్రజా సమస్యల పరిష్కారానికి కృషి చేస్తున్న కూటమి నాయకత్వాన్ని బలపరుస్తామని ఆమె పేర్కొన్నారు.

పల్నాడులో ఏకగ్రీవాల జోరు – చిలకలూరిపేటలో 16 వార్డులు కైవసం

మరోవైపు పల్నాడు జిల్లాలోని పలు మున్సిపాలిటీల్లో కూటమి తిరుగులేని ఆధిక్యాన్ని ప్రదర్శిస్తోంది. జిల్లాలోని దాచేపల్లి, పిడుగురాళ్ల, గురజాల మున్సిపాలిటీలు, నగర పంచాయతీలు ఇప్పటికే ఛైర్మన్ పదవులతో పాటు అన్ని వార్డులను టీడీపీ ఏకగ్రీవంగా దక్కించుకుంది. ఇక చిలకలూరిపేట మున్సిపాలిటీలో ఏకంగా 16 వార్డులు కూటమి ఖాతాలోకి ఏకగ్రీవంగా చేరాయి. ఉమ్మడి గుంటూరు పరిధిలోని సత్తెనపల్లి, రేపల్లె, తెనాలి మున్సిపాలిటీలలో కూడా ఒక్కో వార్డు చొప్పున కూటమి పార్టీలు ఏకగ్రీవం చేసుకున్నాయి.

రజిని తోసివేత వివాదం – విచారణకు ఆదేశం, ఎస్సై వీఆర్‌కు బదిలీ

ఎంపీటీసీ, జెడ్పీటీసీ నామినేషన్ల పరిశీలన సమయంలో మాజీ మంత్రి విడదల రజినిని కిందకు తోసేశారన్న అంశం తీవ్ర దుమారం రేపింది. ఈ ఘటనపై రాష్ట్ర ఎన్నికల కమిషనర్ (SEC) ఏసీ పునేఠా స్పందిస్తూ విచారణకు ఆదేశించారు. రజినిని నెట్టివేశారన్న ఆరోపణలపై చిలకలూరిపేట రూరల్ ఎస్సై ప్రియాంకను తక్షణమే ఎన్నికల విధుల నుంచి తప్పించాలని కలెక్టర్‌కు ఆదేశాలు జారీ చేశారు. దీంతో పల్నాడు జిల్లా ఎస్పీ జగదీష్‌ ఆదహళ్లి సదరు మహిళా ఎస్సైను వీఆర్‌కు (వేకెన్సీ రిజర్వ్) పంపుతూ అధికారిక ఉత్తర్వులు ఇచ్చారు.