దుబాయ్‌లో మరో వండర్! ప్రపంచ తొలి 24-క్యారెట్ గోల్డ్ నడక దారి! డిసెంబర్ లో ఓపెన్!
Dubai Gold Walkway: ప్రపంచంలోనే మొట్టమొదటి, అత్యంత పొడవైన 24 క్యారెట్ల బంగారు నడక మార్గాన్ని (Gold Walkway) దుబాయ్ గోల్డ్ డిస్ట్రిక్ట్ 2026 చివరి నాటికి ప్రారంభించనుంది. దేరా ప్రాంతంలో నెలకొన్న ఈ డిస్ట్రిక్ట్‌లో పర్యాటకులకు నిజమైన బంగారు బాటపై నడిచే సరికొత్త అనుభూతిని అందించడమే లక్ష్యంగా దీన్ని నిర్మిస్తున్నారు. ఇటీవల జోయాలుక్కాస్ రూపొందించిన 16.5 కేజీల జుంకాలు రెండు గిన్నిస్ రికార్డులు సాధించగా, దానికి కొనసాగింపుగా ఈ గోల్డ్ వాక్‌వే మరియు మధ్యప్రాచ్యంలోనే అతిపెద్ద జ్యువెలరీ ఎగ్జిబిషన్ సెంటర్‌ను దుబాయ్ సిద్ధం చేస్తోంది.
గ్లోబల్ గోల్డ్ టూరిజంలో మరో సంచలనం: పర్యాటకులకు రాయల్ గోల్డెన్ ఎక్స్‌పీరియన్స్!
జోయాలుక్కాస్ 16.5 కేజీల 'సహస్ర మయూర' చెవిదిద్దులతో గిన్నిస్ రికార్డు.. అంతలోనే మరో అద్భుతం!
మధ్యప్రాచ్యంలోనే అతిపెద్ద బంగారు, ఆభరణాల ప్రదర్శన కేంద్రానికి దుబాయ్ సన్నాహాలు!
Gulf: ప్రపంచవ్యాప్తంగా విలాసవంతమైన పర్యాటకానికి, వినూత్న నిర్మాణాలకు మారుపేరుగా నిలిచే దుబాయ్ నగరం మరో చారిత్రక మైలురాయికి శ్రీకారం చుట్టింది. ప్రపంచంలోనే మొట్టమొదటి, అత్యంత పొడవైన 24 క్యారెట్ల స్వచ్ఛమైన బంగారు నడక మార్గాన్ని (World's First and Longest 24-Carat Gold Walkway) ఏర్పాటు చేయనున్నట్లు దుబాయ్ గోల్డ్ డిస్ట్రిక్ట్ అధికారికంగా ప్రకటించింది. 2026 చివరి నాటికి, అంటే రాబోయే రెండు నెలల్లోనే ఈ ప్రాజెక్ట్ ప్రజల సందర్శనార్థం అందుబాటులోకి రానుందని దుబాయ్ గోల్డ్ డిస్ట్రిక్ట్ కమర్షియల్ సెక్టార్ సీనియర్ డైరెక్టర్ రషీద్ అల్ హర్మూది వెల్లడించారు. సందర్శకులు, పర్యాటకులు నేరుగా బంగారంతో నిర్మించిన మార్గంపై నడిచే అద్భుతమైన రాయల్ అనుభవాన్ని ఇది అందిస్తుంది.
దేరా గోల్డ్ డిస్ట్రిక్ట్ కేంద్రంగా అభివృద్ధి
ఈ అద్భుతమైన గోల్డ్ వాక్‌వేను దుబాయ్‌లోని ప్రముఖ వాణిజ్య కేంద్రమైన దేరా (Deira) పరిధిలోని 'దుబాయ్ గోల్డ్ డిస్ట్రిక్ట్'లో ఏర్పాటు చేస్తున్నారు. జనవరి 2026లో ప్రారంభమైన ఈ డిస్ట్రిక్ట్.. బులియన్ ట్రేడింగ్, హోల్‌సేల్ కార్యకలాపాలు, లగ్జరీ వాచీలు, వజ్రాభరణాల విక్రయాలకు గ్లోబల్ హబ్‌గా నిలిచింది. ఇక్కడ ప్రస్తుతం 1,000 కంటే ఎక్కువ రిటైల్ ఆభరణాల, పెర్ఫ్యూమ్ వ్యాపార సంస్థలు కార్యకలాపాలు సాగిస్తున్నాయి. ఈ ప్రాంతంలో కొత్తగా హోల్‌సేల్ గోల్డ్ ట్రేడింగ్ కార్యాలయాలు 20% పెరగగా, రిటైల్ స్టోర్లు 15% వృద్ధిని నమోదు చేశాయి. ఈ వాక్‌వే రాకతో అంతర్జాతీయంగా దుబాయ్ బంగారు విపణి పరపతి మరింత ఉన్నత స్థాయికి చేరుకోనుంది.
మధ్యప్రాచ్యంలోనే అతిపెద్ద గోల్డ్ ఎగ్జిబిషన్ ప్రాజెక్ట్
కేవలం బంగారు వాక్‌వే మాత్రమే కాకుండా, మిడిల్ ఈస్ట్‌లోనే అతిపెద్ద బంగారు, ఆభరణాల ఎగ్జిబిషన్ కేంద్రాన్ని సైతం దుబాయ్ గోల్డ్ డిస్ట్రిక్ట్‌లో ఏర్పాటు చేయడానికి ప్రభుత్వం భారీ ప్రణాళికలు సిద్ధం చేస్తోంది. గోల్డ్ డిస్ట్రిక్ట్‌లోకి మరిన్ని అంతర్జాతీయ కంపెనీలను ఆకర్షించేందుకు వాణిజ్య సముదాయాలు, విస్తృత కార్యాలయ ప్రాంగణాలను అభివృద్ధి చేస్తున్నారు. 2027 నాటికి మరిన్ని గ్లోబల్ బ్రాండ్లు ఇక్కడికి తరలివస్తాయని అంచనా వేస్తున్నారు.
16.5 కేజీల బంగారు జుంకాలతో డబుల్ గిన్నిస్ రికార్డు
ఈ గోల్డ్ వాక్‌వే ప్రకటన వెలువడే సమయానికి ముందే, దుబాయ్ మరో అంతర్జాతీయ ఘనతను సొంతం చేసుకుంది. ప్రముఖ భారతీయ ఆభరణాల సంస్థ జోయాలుక్కాస్ (Joyalukkas) రూపొందించిన సాంప్రదాయ 'సహస్ర మయూర' (Mayura Sahasra) 22 క్యారెట్ల బంగారు జుంకాలు.. ప్రపంచంలోనే అత్యంత బరువైన, అతిపెద్ద జుంకాలుగా ఏకకాలంలో రెండు గిన్నిస్ వరల్డ్ రికార్డులను సాధించాయి. 16.514 కిలోగ్రాముల బరువున్న ఈ కళాఖండాన్ని యూఏఈ ఆర్థిక, పర్యాటక శాఖ మంత్రి అబ్దుల్లా బిన్ తౌఖ్ అల్ మర్రి సమక్షంలో ఆవిష్కరించారు. ఈ మైలురాయి వెనువెంటనే 24 క్యారెట్ల బంగారు వాక్‌వే ఏర్పాటు వార్త రావడంతో ప్రపంచవ్యాప్తంగా పర్యాటకుల్లో తీవ్ర ఉత్కంఠ నెలకొంది.
Tags
Be the first to react
