Sports: కామన్వెల్త్ క్రీడల్లో భారత్‌ కొత్త దిశగా.. గ్లాస్గోలో క్రీడా మంత్రి మన్సుఖ్ మాండవీయ కీలక భేటీ!

గ్లాస్గోలో భారత్ క్రీడా సంస్కరణలను వివరించిన కేంద్ర మంత్రి మన్సుఖ్ మాండవీయ..

ఖేలో భారత్ నీతి, అస్మితా లీగ్స్‌పై కామన్వెల్త్ వేదికలో భారత్ దృష్టి..

గ్లాస్గో: కామన్వెల్త్ క్రీడల్లో భారత్‌ పాత్రను మరింత బలోపేతం చేసే దిశగా కేంద్ర యువజన వ్యవహారాలు, క్రీడల శాఖ మంత్రి డాక్టర్ మన్సుఖ్ మాండవీయ కీలక అడుగులు వేస్తున్నారు. స్కాట్లాండ్‌లోని గ్లాస్గోలో నిర్వహించిన కామన్వెల్త్ క్రీడా మంత్రుల సమావేశం సందర్భంగా కామన్వెల్త్ సంస్థ ఎన్నికైన ప్రధాన కార్యదర్శి షిర్లీ అయోర్కోర్ బోచ్‌వేతో ఆయన ప్రత్యేకంగా సమావేశమయ్యారు.

ఈ సమావేశంలో భారత క్రీడా రంగంలో గత కొన్నేళ్లుగా అమలు చేస్తున్న సంస్కరణలను మంత్రి మాండవీయ వివరించారు. ముఖ్యంగా 'ఖేలో భారత్ నీతి' (Khelo Bharat Niti), 'అస్మితా లీగ్స్' (ASMITA Leagues) వంటి కార్యక్రమాలు దేశంలో క్రీడలను గ్రామీణ స్థాయి వరకు తీసుకెళ్లడంలో కీలక పాత్ర పోషిస్తున్నాయని చెప్పారు.

మంత్రి సామాజిక మాధ్యమాల్లో చేసిన పోస్టులో, ఈ రెండు కార్యక్రమాలు దేశంలో గ్రాస్‌రూట్ స్థాయిలో క్రీడల అభివృద్ధికి, మహిళలకు క్రీడల్లో సమాన అవకాశాల కల్పనకు, అలాగే అంతర్జాతీయ స్థాయి క్రీడాకారులను తీర్చిదిద్దేందుకు బలమైన వేదికగా నిలుస్తున్నాయని పేర్కొన్నారు.

సమావేశంలో భారత్‌–కామన్వెల్త్ దేశాల మధ్య క్రీడా భాగస్వామ్యాన్ని మరింత విస్తరించేందుకు తీసుకోవాల్సిన చర్యలపై కూడా చర్చ జరిగింది. కామన్వెల్త్ వేదికను ఉపయోగించి క్రీడలతో పాటు వాణిజ్యం, పెట్టుబడుల రంగాల్లో కూడా కొత్త అవకాశాలను సృష్టించే అంశాలపై ఇరు నాయకులు అభిప్రాయాలు పంచుకున్నారు.

2030 కామన్వెల్త్ క్రీడలకు ఆతిథ్యం ఇవ్వడానికి భారత్‌ సన్నాహాలు చేస్తున్న నేపథ్యంలో, ఈ సమావేశం ప్రాధాన్యత సంతరించుకుంది. అంతర్జాతీయ క్రీడా వేదికపై భారత్‌ నాయకత్వాన్ని మరింత బలోపేతం చేయడంతో పాటు, ప్రపంచ దేశాలతో సహకారాన్ని విస్తరించేందుకు ఇటువంటి సమావేశాలు దోహదపడతాయని క్రీడా నిపుణులు అభిప్రాయపడుతున్నారు.