Waste To Wonder: విశాఖ వాసులకు బంపర్ ఆఫర్.... చెత్తతో వండర్స్ చేస్తే రూ. 22.5 లక్షల ప్రైజ్ మనీ!

పాత ఇనుముతో కళాఖండాలు చేయండి.. లక్షల్లో గెలవండి….

జీవీఎంసీ వినూత్న పోటీ.. బహుమతుల వర్షం….

వేస్ట్ టు వండర్ దరఖాస్తులకు ఏప్రిల్ 10 లాస్ట్ డేట్…

Waste To Wonder Vishakapatnam: విశాఖపట్నం నగరాన్ని స్వచ్ఛ నగరంగా తీర్చిదిద్దే లక్ష్యంతో గ్రేటర్ విశాఖపట్నం నగరపాలక సంస్థ (GVMC) ఒక వినూత్న కార్యక్రమానికి శ్రీకారం చుట్టింది. ‘స్వచ్ఛ సర్వేక్షణ్ 2025-26’లో భాగంగా "వేస్ట్ టు వండర్" పేరుతో ఒక ఛాలెంజ్‌ను ప్రకటించింది. పనికిరాని పాత ఇనుము, ఇతర వ్యర్థాలతో అద్భుతమైన కళాఖండాలను సృష్టించే కళాకారులకు భారీ నగదు బహుమతులను అందించాలని జీవీఎంసీ నిర్ణయించింది.

ఈ పోటీలో విశాఖ నగరంలోని వెల్డింగ్ షాపుల యజమానులు, మెటల్ ఆర్టిస్టులు, ఫ్యాబ్రికేషన్ యూనిట్లు పాల్గొనవచ్చు. వ్యర్థ ఇనుమును ఉపయోగించి 4 నుండి 8 అడుగుల ఎత్తు గల కళాకృతులను తయారు చేయాల్సి ఉంటుంది. అయితే, ఈ కళాఖండాలలో కనీసం 80 శాతం ఇనుము ఉండాలని నిబంధన విధించారు. దీనివల్ల నగరంలోని పాత ఇనుప సామాగ్రి వినియోగంలోకి రావడమే కాకుండా, నగరానికి కొత్త అందాలు రానున్నాయి.

బహుమతుల విషయానికి వస్తే, జీవీఎంసీ మొత్తం రూ. 22.5 లక్షల నగదును విజేతలకు పంచనుంది. ప్రతి జోన్‌లో మొదటి బహుమతిగా రూ. 1,00,000, రెండో బహుమతిగా రూ. 50,000, మరియు మూడో బహుమతిగా రూ. 25,000 అందజేస్తారు. వీటితో పాటు మరో 10 మందికి ఒక్కొక్కరికి రూ. 5,000 చొప్పున ప్రోత్సాహక బహుమతులు ఇవ్వనున్నారు. పాల్గొన్న వారందరికీ ప్రశంసా పత్రాలు (Certificates) కూడా అందజేస్తారు.

విజేతలు రూపొందించిన కళాఖండాలను నగరంలోని ప్రధాన కూడళ్లు, పర్యాటక ప్రాంతాల్లో శాశ్వతంగా ఏర్పాటు చేస్తారు. ఆ కళాకృతుల పక్కనే వాటిని తయారు చేసిన కళాకారుల పేర్లు, వారి షాపుల వివరాలను కూడా పొందుపరుస్తారు. దీనివల్ల స్థానిక వెల్డింగ్ మరియు మెటల్ కళాకారులకు మంచి గుర్తింపు లభించనుంది. నగర ప్రజలకు కూడా వ్యర్థాల నిర్వహణపై అవగాహన కలుగుతుందని అధికారులు భావిస్తున్నారు.

ఈ ఛాలెంజ్‌లో పాల్గొనదలచిన వారు ఈ నెల (ఏప్రిల్) 10వ తేదీలోపు దరఖాస్తు చేసుకోవాలి. ఆసక్తి ఉన్నవారు తమ పరిధిలోని ‘స్వర్ణ వార్డు సచివాలయం’లోని శానిటరీ సెక్రటరీని సంప్రదించి పేర్లు నమోదు చేసుకోవచ్చు. దరఖాస్తులకు కేవలం మరికొన్ని రోజులే గడువు ఉన్నందున, ప్రతిభావంతులైన కళాకారులు త్వరగా స్పందించాలని జీవీఎంసీ కమిషనర్ పిలుపునిచ్చారు.