Elephant Attack: గగుర్పొడిచే ఘోరం.. వాసన పసిగట్టి 9 మైళ్లు వెతికి వచ్చి చంపేసిన 'ధ్రుబే' ఏనుగు! 14 ఏళ్ల క్రితం తల్లిదండ్రులు.. ఇప్పుడు..?

• 14 ఏళ్ల క్రితం తల్లిదండ్రులను చంపిన ఏనుగు నుంచి తప్పించుకోవడానికి ఊరు వదిలిన ఫ్యామిలీ..
  
  
• ధ్రుబే అనే ఈ ఏనుగు 2010 నుంచి ఇప్పటిదాకా 25 మందిని చంపినట్లు అధికారుల వెల్లడి..

Elephant Attack: విధి ఆడిన వింత నాటకంలో ఒక నిరుపేద కుటుంబం ఘోరంగా ఛిన్నాభిన్నమైంది. ఏ మృత్యువు నుంచి తప్పించుకోవాలని నాడు ప్రాణాలు అరచేతిలో పెట్టుకుని ఊరు విడిచి పారిపోయారో, సరిగ్గా 14 ఏళ్ల తర్వాత అదే రాకాసి మృత్యువు వారిని వెతుక్కుంటూ వచ్చి మరీ కబళించింది. ఒకే అడవి ఏనుగు దాడిలో ఒకే కుటుంబానికి చెందిన రెండు వేర్వేరు తరాల నాలుగు ప్రాణాలు గాల్లో కలిసిపోయిన ఈ అత్యంత హృదయవిదారక ఘటన పొరుగు దేశమైన నేపాల్లో చోటుచేసుకుంది. ప్రస్తుతం అంతర్జాతీయంగా సంచలనం సృష్టిస్తున్న ఈ ఉదంతం, రోజురోజుకూ పెరుగుతున్న మానవ-వన్యప్రాణి ఘర్షణల తీవ్రతకు సజీవ సాక్ష్యంగా నిలుస్తోంది.

ఈ విషాదకర కథనం వివరాల్లోకి వెళితే.. నేపాల్లోని ప్రసిద్ధ చిత్వాన్ నేషనల్ పార్క్ సమీప అటవీ ప్రాంతంలో నివసించే శనిచర బోటే కుటుంబానికి 'ధ్రుబే' (Dhrube) అనే అడవి ఏనుగు రూపంలో యమపాశం ఎదురైంది. గత 2012 డిసెంబర్ నెలలో మాడి అనే పట్టణంలో అకస్మాత్తుగా దాడి చేసిన ధ్రుబే ఏనుగు.. శనిచర కన్న తల్లిదండ్రులను అతి క్రూరంగా తొక్కి చంపేసింది. ఈ భయంకరమైన ఘటనతో తీవ్ర దిగ్భ్రాంతికి గురైన శనిచర, తన భార్యాపిల్లలనైనా ఈ రాకాసి ఏనుగు ప్రమాదం నుంచి కాపాడుకోవాలని గట్టిగా నిర్ణయించుకున్నాడు. ఎలాగైనా బతకాలనే ఆశతో, రాప్తి నదిని దాటి దాదాపు 9 మైళ్ల దూరంలో ఉన్న జగత్పూర్ అనే సురక్షిత ప్రాంతానికి తన నివాసాన్ని మార్చాడు. ఇంత దూరం దాటి అడవికి అవతలికి వచ్చేస్తే తమకు ఆ హంతక ఏనుగు నుంచి ఎలాంటి ప్రాణ భయం ఉండదని అతడు భావించాడు.

కానీ విధి అతడిని అత్యంత దారుణంగా వెక్కిరించింది. కాలచక్రం తిరిగిన 14 సంవత్సరాల తర్వాత, అదే ధ్రుబే ఏనుగు ఎలాగోలా వాసన పసిగట్టి వారి కొత్త నివాసాన్ని వెతుక్కుంటూ రావడం స్థానికులను తీవ్ర భయాందోళనలకు గురిచేస్తోంది. ఈ నెల ఆరంభంలో జగత్పూర్లోని శనిచర ఇంటిపై అకస్మాత్తుగా దాడి చేసిన ఆ ఏనుగు, ఇంట్లోని అతని 25 ఏళ్ల కోడలు ఆషికా బోటేను, నిద్రపోతున్న 4 ఏళ్ల పసి మనవడు భరత్ బోటేను అత్యంత కిరాతకంగా తొక్కి చంపేసింది. ఒకేసారి కోడలు, మనవడి శవాల ముందు కూలబడిన శనిచర బోటే గుండెలు పగిలేలా రోదిస్తూ, నదులు దాటి ఇంత దూరం వస్తే మమ్మల్ని ఏమీ చేయలేదని నమ్మామని, కానీ ఇన్ని సంవత్సరాల తర్వాత కూడా అదే ఏనుగు తమను వెతుక్కుంటూ వచ్చి తన సర్వస్వాన్ని బలిగొందని కన్నీరుమున్నీరయ్యాడు. ఇక తాము ప్రాణాలు రక్షించుకోవడానికి పారిపోవడానికి కూడా చోటు లేదంటూ అతడు ఆవేదన వ్యక్తం చేయడం అక్కడి వారిని కన్నీళ్లకు గురిచేించింది.

నేపాల్ అటవీ చరిత్రలోనే అత్యంత ప్రమాదకరమైన, క్రూరమైన ఏనుగుగా ఈ 'ధ్రుబే' ముద్రపడింది. గత 2010 సంవత్సరం నుంచి ఇప్పటివరకు ఈ ఒక్క ఒంటరి ఏనుగే ఏకంగా 25 మంది మనుషులను ప్రాణాలతో బలితీసుకున్నట్లు చిత్వాన్ నేషనల్ పార్క్ ఉన్నతాధికారులు అధికారికంగా ధ్రువీకరించారు. జగత్పూర్లో జరిగిన ఈ తాజా ద్విగుణ మరణాలకు ముందు ధ్రుబే తమ అధికారిక రికార్డుల ప్రకారం 23 మందిని చంపగా, ఇప్పుడు ఆ సంఖ్య పాతికకు చేరిందని పార్క్ ప్రతినిధి అభినాష్ థాపా మగర్ వెల్లడించారు. ఈ అడవి ఏనుగు సృష్టించిన బీభత్సం ఏ స్థాయిలో ఉందంటే, దాని భయానక చరిత్రను వివరిస్తూ ఏకంగా వికీపీడియాలో ఒక ప్రత్యేక పేజీ కూడా ఉండటం గమనార్హం.

అడవిలో అత్యంత దూకుడుగా వ్యవహరించే ధ్రుబే కదలికలను నిరంతరం పర్యవేక్షించడానికి నేపాల్ అటవీ అధికారులు 2016 నుంచి శతవిధాలా ప్రయత్నిస్తూనే ఉన్నారు. దీని కోసం దానికి అత్యాధునిక శాటిలైట్ రేడియో కాలర్ను కూడా అమర్చారు. అనంతరం 2020 మరియు 2023 సంవత్సరాలలో ఆ కాలర్ను విజయవంతంగా మార్చినప్పటికీ, జనావాసాల్లోకి చొరబడే దాని వన్య ప్రవృత్తిని పూర్తిగా నియంత్రించడంలో అధికారులు ఘోరంగా విఫలమయ్యారు. అడవులు నానాటికీ తగ్గిపోవడం, అటవీ భూముల్లో మానవ నివాసాలు విపరీతంగా విస్తరించడం వల్లే నేపాల్ వ్యాప్తంగా ఇలాంటి ఘోరమైన ఘర్షణలు పెరుగుతున్నాయని, ఈ తాజా విషాదం పర్యావరణ సమతుల్యత దెబ్బతినడం వల్ల జరిగే వినాశనానికి సజీవ ఉదాహరణగా నిలిచిందని పర్యావరణ నిపుణులు ఆవేదన వ్యక్తం చేస్తున్నారు.