Crime News: కన్నవారే కాలయములైతే.. నడివీధిలో యువతిపై తల్లిదండ్రుల దాడి, సోషల్ మీడియాలో వీడియో వైరల్!

• బీహార్‌లోని మాధేపురాలో ఘటన.. సోషల్ మీడియాలో వీడియో వైరల్..
  
  
• ప్రేమ వివాహం చేసుకున్న కూతురిపై తల్లిదండ్రుల దాడి..

Crime News: ప్రేమించి పెళ్లి చేసుకుందన్న తీవ్ర ఆగ్రహంతో కన్న కూతురిపై తల్లిదండ్రులే అత్యంత పైశాచికంగా, అమానవీయంగా దాడి చేసిన ఘోర ఉదంతం బీహార్ రాష్ట్రంలో వెలుగుచూసింది. బాధితురాలిని రోడ్డుపై జుట్టు పట్టి ఈడ్చుకెళ్లి, కింద పడేసి ఇరుగుపొరుగు వారు చూస్తుండగానే చితకబాదారు. అంతటితో ఆగకుండా సదరు యువతి తండ్రి ఆమె మెడపై కాలు పెట్టి బలంగా నొక్కడం అక్కడి వారిని సైతం దిగ్భ్రాంతికి గురిచేసింది. బీహార్‌లోని మాధేపురా జిల్లాలో జరిగిన ఈ దారుణ ఘటనకు సంబంధించిన దృశ్యాలు సాషల్ మీడియాలో వైరల్ కావడంతో స్థానిక పోలీసులు వెంటనే రంగంలోకి దిగి దర్యాప్తు ప్రారంభించారు.

ఈ ఘటనకు సంబంధించిన వివరాల్లోకి వెళితే.. మాధేపురా జిల్లాలోని ఓ గ్రామానికి చెందిన పూజా కుమారి (22), అదే ప్రాంతంలో నివసించే బిట్టు కుమార్ (17) అనే యువకుడు గత కొంతకాలంగా ప్రేమించుకున్నారు. ఈ క్రమంలోనే సుమారు నెల రోజుల క్రితం వీరిద్దరూ ఎవరికీ చెప్పకుండా రహస్యంగా వివాహం చేసుకున్నారు. అయితే వీరిద్దరూ ఒకే సామాజిక వర్గానికి చెందిన బంధువులు కావడం, వారి ఇళ్లు కూడా దగ్గరదగ్గరగా ఉండటంతో ఈ వివాహం గురించి సమాచారం తెలియగానే ఇరు కుటుంబాల మధ్య తీవ్ర ఉద్రిక్తతలు నెలకొన్నాయి. ఈ సున్నితమైన సమస్యను పరిష్కరించడానికి గ్రామంలోని పెద్దలు అత్యవసరంగా ఒక పంచాయితీని నిర్వహించారు. విచారణ జరిపిన గ్రామ పంచాయితీ, సదరు జంటను తక్షణమే విడదీయాలని హుకుం జారీ చేస్తూ ఒక వివాదాస్పద తీర్పును ఇచ్చింది. అంతేకాకుండా చట్టవిరుద్ధంగా అబ్బాయి కుటుంబానికి రూ.1 లక్ష జరిమానా విధించి, ఆ మొత్తాన్ని అమ్మాయి కుటుంబానికి నష్టపరిహారంగా చెల్లించాలని ఆదేశించింది.

గ్రామ పంచాయితీ ఇచ్చిన ఈ తీర్పు తర్వాత పూజా తల్లిదండ్రులు ఆమెకు రకరకాలుగా నచ్చజెప్పి అత్తవారింటి నుంచి పుట్టింటికి తిరిగి తీసుకొచ్చారు. అయితే, ఆమె పుట్టింటికి అడుగుపెట్టిన వెంటనే పరిస్థితి ఒక్కసారిగా హింసాత్మకంగా మారింది. ఈ నెల 8వ తేదీన గ్రామస్థులందరూ చూస్తుండగానే పూజా తల్లి ఆమె జుట్టు పట్టి లాగి వీధిలోకి ఈడ్చుకొచ్చి కిందపడేయగా, ఆమె తండ్రి కూడా కర్కశంగా మారుతూ తీవ్రంగా కొట్టడం ప్రారంభించాడు. ఆ సమయంలో కూతురి మెడపై తండ్రి కాలు పెట్టి కదలకుండా నొక్కి ఉంచిన భయానక దృశ్యాలు చూసిన వారందరినీ తీవ్ర దిగ్భ్రాంతికి గురిచేశాయి.

ఈ అనాగరిక దాడికి సంబంధించిన వీడియో క్లిప్ సోషల్ మీడియా వేదికల్లో వేగంగా వైరల్ కావడంతో ఈ విషయం కాస్తా ఉన్నతాధికారుల ద్వారా స్థానిక పోలీసుల దృష్టికి వెళ్ళింది. దీనిపై వెంటనే స్పందించిన పోలీసులు సదరు గ్రామానికి చేరుకుని యువతిని తల్లిదండ్రుల బారి నుంచి రక్షించి తమ సంరక్షణలోకి తీసుకుని పోలీస్ స్టేషన్‌కు తరలించారు. ఈ ఘటనపై శంకర్‌పూర్ ఎస్హెచ్‌ఓ రాజీవ్ కుమార్ జాతీయ మీడియాతో ఫోన్‌లో మాట్లాడుతూ, బాధితురాలి నుంచి లిఖితపూర్వకంగా అధికారిక ఫిర్యాదును స్వీకరించామని వెల్లడించారు. ఇంటర్నెట్‌లో సర్క్యులేట్ అవుతున్న వైరల్ వీడియో క్లిప్పింగ్స్, బాధితురాలి ఫిర్యాదు ఆధారంగా కేసు నమోదు చేసి దర్యాప్తును వేగవంతం చేస్తున్నామని, ఈ అమానుష ఘటనలో దోషులుగా తేలిన వారు ఎంతటి వారైనా చట్టప్రకారం అత్యంత కఠిన చర్యలు తీసుకుంటామని ఆయన స్పష్టం చేశారు.