గుంటూరులో అక్రమ కట్టడాలపై మున్సిపల్ అధికారులు ప్రత్యేక చర్యలు ప్రారంభించారు. గత మూడు రోజులుగా కొనసాగుతున్న ఈ స్పెషల్ డ్రైవ్‌లో, అనుమతులు లేకుండా నిర్మించిన భవనాలను గుర్తించి కూల్చివేస్తున్నారు. టౌన్ ప్లానింగ్ విభాగం ఇందుకోసం ప్రత్యేక బృందాలను ఏర్పాటు చేసింది. ఇప్పటికే భవానీ నగర్, శ్రీరామనగర్ 7వ లైన్, బొంగరాల బీడు, అరండల్ పేట్ వంటి ప్రాంతాల్లో నిర్మాణాలను తొలగించారు. జీఎంసీ కమిషనర్ పులి శ్రీనివాసులు, నిబంధనలకు విరుద్ధంగా ఉన్న భవనాలపై ఎటువంటి జాప్యం లేకుండా చర్యలు తీసుకోవాలని స్పష్టం చేశారు.
ఇకపై అక్రమ లేఅవుట్లు, అనుమతి లేకుండా ఏర్పాటు చేసిన హోర్డింగులపై కూడా చర్యలు తీసుకోనున్నట్లు జీఎంసీ వెల్లడించింది. ఫీజు చెల్లించని హోర్డింగులను తొలగించడంతో పాటు, రోడ్లపై భవన నిర్మాణ సామగ్రి ఉంచిన వారికి జరిమానాలు విధించనున్నారు. వార్డు ప్లానింగ్ అధికారులు తమ పరిధిలోని ప్రాంతాల్లో పర్యటించి, అక్రమ నిర్మాణాలను గుర్తించి నోటీసులు జారీ చేయాలని ఆదేశాలు జారీ చేశారు. ఈ చర్యల ద్వారా నగరంలో శాస్త్రీయ పట్టణ ప్రణాళికను అమలు చేసి, ప్రజలకు భద్రతా ప్రమాణాలను కల్పించడమే జీఎంసీ లక్ష్యం.
