నేషనల్ క్రష్ రష్మిక మందన్నా వరుస సినిమాలతో ప్రేక్షకులను అలరిస్తోంది. 'పుష్ప 2' వంటి భారీ హిట్ తర్వాత హిందీలో హారర్ కామెడీ అయిన 'థామా'తో సందడి చేసిన రష్మిక, ఆ వెంటనే తన రొమాంటిక్ థ్రిల్లర్ డ్రామా చిత్రం 'ది గర్ల్‌ఫ్రెండ్' తో తెలుగు ఆడియెన్స్‌ ముందుకు వచ్చింది. తాజాగా, ఈ సినిమా ఓటీటీ విడుదల తేదీ ఖరారైంది.
'ది గర్ల్‌ఫ్రెండ్' సినిమా ఒక రొమాంటిక్ థ్రిల్లర్ డ్రామాగా తెరకెక్కింది. ఈ చిత్రానికి హీరో, డైరెక్టర్ అయిన రాహుల్ రవీంద్రన్ దర్శకత్వం వహించారు. రష్మిక మందన్నాకు జోడీగా దీక్షిత్ శెట్టి హీరోగా నటించారు. మరో అందాల నాయిక అను ఇమ్మాన్యూయెల్ కీలక పాత్ర పోషించింది. వీరితో పాటు రావు రమేష్, రోహిణి, దర్శకుడు రాహుల్ రవీంద్రన్ కూడా ముఖ్య పాత్రల్లో కనిపించారు.
గీత ఆర్ట్స్ బ్యానర్‌పై ప్రొడ్యూసర్ అల్లు అరవింద్ సమర్పణలో ధీరజ్ మొగిలినేని మరియు విద్య కొప్పినీడి ఈ చిత్రాన్ని నిర్మించారు. మ్యూజిక్ సెన్సేషన్ హేషమ్ అబ్దుల్ వహాబ్ సంగీతం అందించారు. ఈ సినిమా నవంబర్ 7న థియేటర్లలో భారీ అంచనాల మధ్య విడుదలైంది.
థియేటర్లలో 'ది గర్ల్‌ఫ్రెండ్' సినిమాకు మిక్స్‌డ్ టాక్ వచ్చింది. కొన్ని వర్గాల ప్రేక్షకులకు ఈ యూనిక్ స్టోరీ అంతగా రుచించలేదు. అయితే, సినిమా కథాంశం మరియు రష్మిక నటన మాత్రం ప్రత్యేకంగా నిలిచాయి. ఈ సినిమాకు ఐఎమ్‌డీబీ నుంచి పదికి 8.2 రేటింగ్ లభించడం విశేషం. అంటే, చాలా వరకు ప్రేక్షకులకు ఈ సినిమా బాగా నచ్చిందని ఇది సూచిస్తోంది.
'ది గర్ల్‌ఫ్రెండ్' సినిమా ఓటీటీ స్ట్రీమింగ్‌పై తాజాగా అధికారిక ప్రకటన వచ్చేసింది. ప్రముఖ డిజిటల్ స్ట్రీమింగ్ దిగ్గజ సంస్థ నెట్ఫ్లిక్స్ (Netflix) లో ఈ సినిమా ప్రీమియర్ కానుంది.
మరో ఐదు రోజుల్లో, అంటే డిసెంబర్ 5 నుంచి 'ది గర్ల్‌ఫ్రెండ్' సినిమా ఓటీటీ స్ట్రీమింగ్ అవ్వనున్నట్లు అఫిషియల్ అనౌన్స్‌మెంట్ వచ్చింది. ఈ సినిమా తెలుగుతో పాటు తమిళం, హిందీ, కన్నడ, మలయాళ భాషల్లో కూడా డిజిటల్ ప్రీమియర్ కానుంది.
థియేటర్లలో ఈ రొమాంటిక్ థ్రిల్లర్ చూడటం మిస్ అయిన వాళ్లు, నెట్‌ఫ్లిక్స్‌లో డిసెంబర్ 5 నుంచి ఎంచక్కా చూసేయొచ్చు. 'ది గర్ల్‌ఫ్రెండ్' సినిమా ఓటీటీ హక్కులకు భారీ డిమాండ్ ఏర్పడింది.
నెట్ఫ్లిక్స్ సంస్థ ఈ సినిమా డిజిటల్ హక్కుల కోసం రూ. 14 కోట్ల వరకు ఖర్చు చేసిందని సమాచారం. అలాగే, ఈ సినిమా ఆడియో రైట్స్ మరియు హిందీ డబ్బింగ్ రైట్స్ కూడా మంచి ధర పలికినట్లు తెలుస్తోంది.
