రాష్ట్ర అభివృద్ధి దిశగా యువత చూపుతున్న సంకల్పమే వికసిత భారత్ను ముందుకు నడిపించే అసలైన శక్తి అని ప్రధాన మంత్రి నరేంద్ర మోదీ తాజా మన్ కి బాత్ కార్యక్రమంలో పేర్కొన్నారు. నెలవారీ రేడియో సందేశం 128వ ఎపిసోడ్లో ప్రజలను ఉద్దేశించి మాట్లాడిన ఆయన, దేశంలోని Gen Z యువతలో కనిపిస్తున్న ధైర్యం, సృజనాత్మకత, విఫలమైనప్పటికీ మళ్లీ లేచి ప్రయత్నించే ధోరణి దేశ భవిష్యత్తుకు కొత్త ఆశలు నింపుతున్నాయని పేర్కొన్నారు.
మోదీ మాట్లాడుతూ, “మన హృదయంలో సంకల్పం ఉంటే, కలిసి పనిచేసే నమ్మకం ఉంటే, విఫలమై మళ్లీ లేచే ధైర్యం ఉంటే–ఎంత క్లిష్ట పరిస్థితులైనా విజయాన్ని అడ్డుకోలేవు” అన్నారు. భారతీయులు శతాబ్దాల క్రితమే ఆధునిక సాంకేతికత లేకుండా సముద్రాలను దాటి ప్రయాణించినట్లు గుర్తుచేసిన ఆయన, నేటి ప్రపంచం అంతరిక్ష సవాళ్లను ఎదుర్కొంటున్న నేపథ్యంలో యువత ఆలోచనా విధానం కూడా అదే ధైర్యంతో ముందుకు సాగుతోందని అభిప్రాయపడ్డారు.
ఇస్రో నిర్వహించిన డ్రోన్ పోటీలో జరిగిన ఒక సంఘటనను ప్రస్తావిస్తూ ప్రధాన మంత్రి, మార్స్ గ్రహం వంటి వాతావరణంలో GPS లేకుండా డ్రోన్ను ప్రయాణింపజేయాల్సిన పరిస్థితిని యువత గొప్పగా ఎదుర్కొన్నారని తెలిపారు. “GPS సపోర్ట్ లేకపోవడంతో డ్రోన్లు ఒక్కసారిగా నేలపై పడిపోయినా, యువత తలొగ్గలేదు. కెమెరాలు, అంతర్గత సాఫ్ట్వేర్ ఆధారంగా నేల ఆకృతులను గుర్తించి, అడ్డంకులను అర్థం చేసుకుని, సురక్షిత మార్గం కనుగొనడానికి చేసిన వారి ప్రయత్నాలు నాకు ఎంతో ప్రేరణనిచ్చాయి,” అని అన్నారు.
ఈ అనుభవం తనకు చంద్రయాన్-2 విఫలమైన రోజును గుర్తు చేసిందని ప్రధాని తెలిపారు. “ఆ విఫలం కేవలం కొద్దిసేపు నిరాశ కలిగించింది. కానీ అదే రోజు మన శాస్త్రవేత్తలు చంద్రయాన్-3 విజయకథ రాయడం ప్రారంభించారు. ఆత్మవిశ్వాసం, పట్టుదల ఎలా ఫలితాన్నిస్తాయో దేశం మొత్తం చూశింది,” అని మోదీ తెలిపారు.
భారత యువతలో కనిపిస్తున్న ఈ ‘మళ్లీ లేచే ధైర్యం’ దేశాన్ని వికసిత భారత్ లక్ష్యం వైపు నడిపిస్తోందని ఆయన గర్వంగా పేర్కొన్నారు. Gen Zలో కనిపిస్తున్న సృజనాత్మకత, శ్రమించే ధోరణి, సమస్యలను ఎదుర్కొనే సత్తా ప్రపంచ వేదికపై భారత ప్రతిభను మరింత ప్రగాఢంగా నిలబెడుతుందని మోదీ అభిప్రాయపడ్డారు.
యువతలోని శక్తి, శాస్త్రవేత్తల అచంచల నిబద్ధత తనకు ఎల్లప్పుడూ ప్రేరణ అని, అదే భారత భవిష్యత్తుకు నడిపించే ప్రధాన బలం అని ప్రధాని మోదీ ఈ సందర్భంగా చెప్పారు.
