Nara Lokesh: గోదావరి విషాద బాధిత కుటుంబాలకు మంత్రి నారా లోకేష్ పరామర్శ!

బాధిత కుటుంబాలతో కలిసి అల్పాహారం.. అన్ని విధాల అండగా ఉంటానన్న లోకేష్..

గోదావరి ప్రమాదంలో మృతుల కుటుంబాలకు ధైర్యం చెప్పిన మంత్రి లోకేష్..

రంపచోడవరం: కష్టకాలంలో పార్టీ కార్యకర్తల కుటుంబాలకు అండగా నిలవడం తెలుగుదేశం పార్టీ సంస్కృతిలో భాగమని మంత్రి నారా లోకేష్ మరోసారి చాటిచెప్పారు. గోదావరిలో చేపల వేటకు వెళ్లి ఇటీవల ప్రాణాలు కోల్పోయిన నలుగురు బాధిత కుటుంబాలను శుక్రవారం రంపచోడవరం సమీపంలోని గొల్లగూడెంలో ఆయన పరామర్శించారు. కుటుంబ సభ్యులతో కలిసి అల్పాహారం చేసి, వారి యోగక్షేమాలను అడిగి తెలుసుకుంటూ ధైర్యం చెప్పారు.

గోదావరిలో జరిగిన ఈ విషాద ఘటనలో ఊకె సుశీల, తుర్రం భారతి, బాసిబోయిన బాలరాజు, ఊకె రమేష్ ప్రాణాలు కోల్పోయారు. ఈ కుటుంబాలను స్వయంగా కలిసి మాట్లాడిన మంత్రి లోకేష్, జరిగిన సంఘటన ఎంతో బాధాకరమని పేర్కొన్నారు. కుటుంబ సభ్యులు ధైర్యంగా ఉండాలని, వ్యక్తిగతంగా కూడా, ప్రభుత్వపరంగానూ అవసరమైన సహాయ సహకారాలు అందిస్తానని హామీ ఇచ్చారు.

ఈ సందర్భంగా మంత్రి లోకేష్ మాట్లాడుతూ, పార్టీ జెండా మోసే ప్రతి కార్యకర్తను కుటుంబ సభ్యుడిగా భావించే పార్టీ తెలుగుదేశం పార్టీ అని అన్నారు. దేశంలోనే ప్రత్యేకంగా కార్యకర్తల సంక్షేమం కోసం ప్రత్యేక విభాగాన్ని ఏర్పాటు చేసి, వారి విద్య, వైద్యం, వివాహాలు, అత్యవసర ఆర్థిక అవసరాల్లో సహాయం అందిస్తున్నామని తెలిపారు. కార్యకర్తలకు ఎలాంటి ఇబ్బంది వచ్చినా పార్టీ అండగా ఉంటుందనే నమ్మకాన్ని బలోపేతం చేయడమే ఈ కార్యక్రమాల ఉద్దేశమని చెప్పారు.

టీడీపీ నాయకులు, కార్యకర్తల ఆరోగ్యాన్ని దృష్టిలో పెట్టుకుని రాష్ట్రవ్యాప్తంగా ప్రత్యేక ఉచిత వైద్య శిబిరాలు, ఆరోగ్య పరీక్షలు నిర్వహిస్తున్నామని మంత్రి వివరించారు. ఆరోగ్యవంతమైన కార్యకర్తలే పార్టీకి బలమని, అందుకే సంక్షేమ కార్యక్రమాలను మరింత విస్తరిస్తున్నామని పేర్కొన్నారు.

గోదావరి ప్రమాదంలో మృతిచెందిన కుటుంబాలకు ఇప్పటికే తెలుగుదేశం పార్టీ తరఫున రూ.5 లక్షల ఆర్థిక సహాయం అందించినట్లు మంత్రి తెలిపారు. భవిష్యత్తులో కూడా అవసరమైన ప్రతి సహాయాన్ని అందించేందుకు పార్టీ సిద్ధంగా ఉంటుందని మరోసారి భరోసా ఇచ్చారు.

మంత్రి లోకేష్ పర్యటన సందర్భంగా బాధిత కుటుంబ సభ్యులు తమ సమస్యలను వివరించగా, వాటిని పరిష్కరించేందుకు తగిన చర్యలు తీసుకుంటామని ఆయన హామీ ఇచ్చారు. ఈ పరామర్శ కార్యక్రమం బాధిత కుటుంబాలకు మానసిక ధైర్యాన్ని కలిగించడంతో పాటు, కష్టకాలంలో పార్టీ తమ వెంటే ఉందనే నమ్మకాన్ని మరింత బలపరిచిందని స్థానికులు అభిప్రాయపడ్డారు.