తగ్గినట్లే తగ్గి మళ్లీ వర్షాలు... మరో 3 రోజులు వాన గండం!
Weather Update: ఆంధ్రప్రదేశ్, తెలంగాణ రాష్ట్రాల్లో వర్షాల ముప్పు ఇంకా తొలగిపోలేదని, రాబోయే మూడు రోజుల పాటు అక్కడక్కడా తేలికపాటి నుంచి భారీ వర్షాలు కురిసే అవకాశం ఉందని భారత వాతావరణ శాఖ నివేదించింది. అల్పపీడనం బలహీనపడినప్పటికీ, ఉపరితల ఆవర్తనం కొనసాగుతుండటంతో గంటకు 30 నుండి 50 కి.మీ వేగంతో ఈదురుగాలులు వీచే అవకాశం ఉందని తెలిపింది. ముఖ్యంగా కోస్తాంధ్ర, రాయలసీమ మరియు తెలంగాణలోని పలు జిల్లాల్లో ఉరుములు, మెరుపులతో వర్షాలు పడతాయని, ప్రజలు, రైతులు అప్రమత్తంగా ఉండాలని హెచ్చరించింది.
కోస్తాంధ్ర, యానాంలో ఈదురుగాలులతో కూడిన తేలికపాటి నుంచి మోస్తరు వర్షాలు!
గంటకు 30 నుంచి 50 కి.మీ వేగంతో వీయనున్న ఈదురుగాలులు!
రాయలసీమలో ఉరుములు, మెరుపులతో కూడిన వర్షాలు కురిసే అవకాశం!
Andhrapradesh: ఆంధ్రప్రదేశ్, తెలంగాణ రాష్ట్రాల్లో వర్షాల తీవ్రత తగ్గినట్లే తగ్గి మళ్లీ మొదలయ్యే పరిస్థితులు కనిపిస్తున్నాయి. ఇటీవల కురిసిన మురసు తుపాను, కుండపోత వర్షాల కారణంగా ఇప్పటికే రెండు రాష్ట్రాల్లోని పలు ప్రాంతాలు అతలాకుతలమయ్యాయి. లోతట్టు ప్రాంతాలు జలమయమై పంట పొలాలు నీటమునిగిన నేపథ్యంలో, తెలుగు రాష్ట్రాల్లో రాబోయే మరో మూడు రోజుల పాటు వర్షాలు కురిసే అవకాశం ఉందని భారత వాతావరణ శాఖ (IMD) తాజా బులెటిన్‌లో వెల్లడించింది.
ఉపరితల ఆవర్తనం ప్రభావం – వాతావరణ మార్పులు
తూర్పు తెలంగాణ మరియు దానికి ఆనుకుని ఉన్న కోస్తాంధ్ర ప్రాంతంలో కొనసాగిన అల్పపీడనం గురువారం ఉదయం బలహీనపడింది. అయినప్పటికీ, దీనికి అనుబంధంగా ఏర్పడిన ఉపరితల ఆవర్తనం సగటు సముద్ర మట్టానికి 3.1 నుండి 4.5 కిలోమీటర్ల ఎత్తులో కొనసాగుతోంది. ఈ ఉపరితల ఆవర్తన ప్రభావం వల్లే తెలుగు రాష్ట్రాల్లోని పలు ప్రాంతాల్లో రాబోయే 72 గంటల పాటు ఉరుములు, మెరుపులతో కూడిన వర్షాలు కురిసేందుకు అనుకూల పరిస్థితులు ఏర్పడ్డాయని వాతావరణ శాఖ వివరించింది.
కోస్తాంధ్ర, రాయలసీమల్లో వర్షాల తీరు
ఆంధ్రప్రదేశ్ వ్యాప్తంగా కోస్తాంధ్ర, యానాం పరిధిలో గురువారం తేలికపాటి నుండి మోస్తరు వర్షాలు కురుస్తాయని, కొన్నిచోట్ల భారీ వర్షాలు పడే సూచనలున్నాయని అధికారులు తెలిపారు. ఈ సమయంలో గంటకు 30 నుండి 40 కిలోమీటర్ల వేగంతో, అప్పుడప్పుడు 50 కి.మీ వేగంతో ఈదురుగాలులు వీచే అవకాశం ఉంది. శుక్ర, శనివారాల్లోనూ కోస్తాంధ్రలో అక్కడక్కడా వర్షాలు కొనసాగుతాయి. రాయలసీమ జిల్లాల్లో గురువారం ఉరుములు, మెరుపులతో కూడిన వర్షాలు పడతాయని, శుక్ర, శనివారాల్లో తేలికపాటి జల్లులు కురుస్తాయని అంచనా వేశారు.
తెలంగాణలోనూ కొనసాగనున్న వర్షాలు
తెలంగాణలో సైతం మరో మూడు రోజుల పాటు వర్షాలు కురుస్తాయని వాతావరణ కేంద్రం స్పష్టం చేసింది. రాజధాని హైదరాబాద్‌తో పాటు రాష్ట్రంలోని పలు జిల్లాల్లో తేలికపాటి నుండి మోస్తరు వర్షాలు కురిసే అవకాశం ఉంది. అక్కడక్కడా భారీ వర్షాలతో పాటు గంటకు 30 నుండి 40 కిలోమీటర్ల వేగంతో ఈదురుగాలులు వీస్తాయని పేర్కొంది. ఆకాశం మేఘావృతమై ఉండి, సాయంత్రం వేళల్లో ఉరుములతో కూడిన జల్లులు పడే అవకాశముంది.
ప్రజలు, రైతులకు హెచ్చరికలు – జాగ్రత్తలు తప్పనిసరి
ఇప్పటికే అకాల వర్షాలతో తీవ్రంగా నష్టపోయిన అన్నదాతలు తాజా వాతావరణ హెచ్చరికలతో మరింత ఆందోళన చెందుతున్నారు. లోతట్టు ప్రాంతాల ప్రజలు, రైతులు వాతావరణ పరిస్థితులను గమనిస్తూ తగిన ముందస్తు జాగ్రత్తలు తీసుకోవాలని అధికారులు సూచించారు. వర్షం, ఉరుములు, మెరుపులు వచ్చే సమయంలో ఎట్టి పరిస్థితుల్లోనూ చెట్ల కింద, విద్యుత్ స్తంభాల వద్ద నిలబడవద్దని హెచ్చరించారు.
Be the first to react
