NEET UG: నీట్ పేపర్ లీక్‌లపై కేంద్రం మరింత కఠిన చర్యలు.. చట్ట సవరణలకు సిద్ధం.. ఫాస్ట్‌ట్రాక్ కోర్టుల ఏర్పాటుకు మార్గం!

పేపర్ లీక్‌లకు చెక్.. శిక్షలు, జరిమానాలు పెంచనున్న కేంద్రం..

పేపర్ లీక్ కేసులకు ఫాస్ట్‌ట్రాక్ కోర్టులు.. కేంద్రం కీలక నిర్ణయం..

న్యూఢిల్లీ: దేశవ్యాప్తంగా నీట్ (NEET) పేపర్ లీక్ వ్యవహారంపై విద్యార్థుల ఆందోళనలు కొనసాగుతున్న వేళ, పరీక్షల్లో అక్రమాలను అరికట్టేందుకు కేంద్ర ప్రభుత్వం మరింత కఠిన చర్యలకు సిద్ధమైంది. ఇప్పటికే అమల్లో ఉన్న పబ్లిక్ ఎగ్జామినేషన్స్ (ప్రివెన్షన్ ఆఫ్ అన్‌ఫెయిర్ మీన్స్) చట్టం–2024ను మరింత బలోపేతం చేసేలా సవరణలు తీసుకురావాలని కేంద్రం నిర్ణయించినట్లు సమాచారం.

ప్రధానమంత్రి నరేంద్ర మోదీ ఇటీవల పేపర్ లీక్‌లపై మరిన్ని చర్యలు తీసుకుంటామని ప్రకటించిన నేపథ్యంలో, ఈ సవరణలకు కేంద్ర మంత్రివర్గం ఆమోదం తెలిపే అవకాశం ఉందని అధికార వర్గాలు వెల్లడించాయి. శుక్రవారం జరగనున్న కేంద్ర కేబినెట్ సమావేశంలో ఈ ప్రతిపాదనలకు ఆమోదం లభించే అవకాశముందని తెలుస్తోంది.

ప్రతిపాదిత సవరణల్లో అత్యంత కీలకమైన అంశం పేపర్ లీక్ కేసుల విచారణ కోసం ప్రత్యేక ఫాస్ట్‌ట్రాక్ కోర్టుల ఏర్పాటు. ఈ కేసుల్లో విచారణను వేగంగా పూర్తి చేసి నిందితులకు త్వరితగతిన శిక్షలు విధించేలా చట్టంలో ప్రత్యేక నిబంధనలు చేర్చే అవకాశం ఉంది.

ఇప్పటికే ప్రధానమంత్రి నరేంద్ర మోదీ సంబంధిత శాఖలకు ఫాస్ట్‌ట్రాక్ కోర్టుల ఏర్పాటుపై ఆదేశాలు ఇచ్చినట్లు వెల్లడించారు. ఇదే సమయంలో ఢిల్లీ హైకోర్టు కూడా పేపర్ లీక్ కేసుల విచారణ కోసం ప్రత్యేక ఫాస్ట్‌ట్రాక్ కోర్టును ఏర్పాటు చేయనున్నట్లు ప్రకటించింది.

ప్రస్తుతం అమల్లో ఉన్న చట్టం ప్రకారం పేపర్ లీక్ కేసులో దోషులుగా తేలితే మూడు నుంచి ఐదు సంవత్సరాల జైలు శిక్షతో పాటు రూ.10 లక్షల వరకు జరిమానా విధించే అవకాశం ఉంది. అలాగే పరీక్ష నిర్వహణకు సంబంధించిన సేవలందించే సంస్థలు అక్రమాలపై సమాచారం ఇవ్వకపోతే రూ.1 కోటి వరకు జరిమానా విధించే నిబంధన అమల్లో ఉంది.

వ్యవస్థీకృత నేరాలకు సంబంధించిన పేపర్ లీక్ కేసుల్లో ప్రస్తుతం ఐదు నుంచి పది సంవత్సరాల జైలు శిక్షతో పాటు కనీసం రూ.1 కోటి జరిమానా విధించే అవకాశం ఉంది. కొత్త సవరణలతో ఈ శిక్షలు, జరిమానాలు మరింత పెరిగే అవకాశం ఉందని తెలుస్తోంది.

కేంద్ర మంత్రివర్గం ఆమోదం అనంతరం ఈ సవరణ బిల్లును సోమవారం లోక్‌సభలో ప్రవేశపెట్టే అవకాశం ఉంది. పార్లమెంట్ రెండో వారంలోనే బిల్లును ఆమోదింపజేయడానికి ప్రభుత్వం ప్రయత్నిస్తోందని సమాచారం.

పేపర్ లీక్ వ్యవహారంపై గురువారం రాత్రి విడుదల చేసిన వీడియో సందేశంలో ప్రధాని నరేంద్ర మోదీ స్పందించారు. "పేపర్ లీక్ అనేది సాధారణ విషయం కాదు. లక్షలాది మంది విద్యార్థులు, వారి కుటుంబాలకు ఇది తీవ్ర వేదన కలిగించే అంశం. అందుకే గత రెండున్నర నెలలుగా ప్రభుత్వం అనేక చర్యలు చేపట్టింది" అని అన్నారు.

పేపర్ లీక్‌లకు పాల్పడిన వారిని ఇప్పటికే అరెస్ట్ చేసి జైలుకు పంపినట్లు తెలిపారు. విద్యార్థులు ఒక విద్యా సంవత్సరం కూడా కోల్పోకుండా ఉండటం ప్రభుత్వ ప్రధాన బాధ్యతగా భావించి, సుమారు 22 లక్షల మంది విద్యార్థుల కోసం పరీక్షలను తిరిగి నిర్వహించేందుకు ప్రభుత్వం అన్ని చర్యలు తీసుకుందని వివరించారు.

ఫాస్ట్‌ట్రాక్ కోర్టుల ఏర్పాటుకు ఇప్పటికే ఆదేశాలు ఇచ్చానని, సంబంధిత శాఖలు ప్రతిపాదనలను సిద్ధం చేశాయని, కేబినెట్ చర్చ అనంతరం తుది రూపం ఇచ్చి పార్లమెంట్‌లో బిల్లును వీలైనంత త్వరగా ఆమోదింపజేస్తామని ప్రధాని తెలిపారు.

ఇదిలా ఉండగా ప్రతిపక్ష నేత రాహుల్ గాంధీ మరోసారి కేంద్ర ప్రభుత్వంపై విమర్శలు గుప్పించారు. గత పదేళ్లలో దేశంలో 150 పేపర్ లీక్ ఘటనలు జరిగాయని, ఒక్క కేసులో కూడా శిక్ష పడలేదని ఆయన ఆరోపించారు. ప్రధాని మోదీ వీడియో సందేశం అనంతరం స్పందించిన రాహుల్ గాంధీ, విద్యార్థులు కోరుకుంటున్నది కేంద్ర విద్యాశాఖ మంత్రి ధర్మేంద్ర ప్రధాన్ రాజీనామానే అని పునరుద్ఘాటించారు.

నీట్ పేపర్ లీక్ వివాదం దేశవ్యాప్తంగా రాజకీయ, విద్యా వర్గాల్లో తీవ్ర చర్చకు దారితీసింది. ప్రభుత్వం చట్టాన్ని మరింత కఠినతరం చేయాలని నిర్ణయించగా, విద్యార్థులు పారదర్శక పరీక్షా వ్యవస్థను కోరుతున్నారు. ప్రతిపాదిత సవరణలు అమల్లోకి వస్తే భవిష్యత్తులో పేపర్ లీక్‌లను అరికట్టడంలో కీలక అడుగుగా మారే అవకాశముందని నిపుణులు భావిస్తున్నారు.